Dina Ta Ta ai Iehova Hanamoa
1 Iseda Dirava, Iehova, be Havaraia Tauna lalokauna, mauri bona moale gaudia ibounai edia Badina. Unai dainai, namona be iena havaraia gaudia ibounai ese ia idia hanamoa. Salamo ia torea tauna hegeregerena, ita ta ta ita ura ita gwau: “Inai hanamoa ma do lau habadaia. Egu uduna ese oiemu kara maoromaoro do ia herevalaia, bona oiemu hamauria kara danu, be nega ibounai do lau gwauraia hedinarai.” (Sal. 71:14, 15) Unai ita karaia totona, dina ta ta ai, Iehova hanamoa daladia ita tahua bona mai eda ura ida ena kara maoromaoro bona ena hahemauri daladia ita kikilaia.
2 Keristani taudia gunadia be Iehova hanamoa karana idia haheitalaia namonamo. Kara 2:46, 47 ese Pentekoste dinana ai idia bapatiso taudia 3,000 ia herevalaia, ia gwau: “Dina ibounai mai laloa tamona danu Dubu Helaga lalonai idia haboua, . . . Dirava idia hanamoa noho, bona taunimanima ibounai be idia dekenai idia moale. . . . Vadaeni dina ibounai, [Iehova] ese mauri ia henia taudia, be abidadama taudia edia orea lalonai ia haboua.” Idia be Iehova bona ena Mesia edia hereva momokani, idia dibaia. Edia moale ese ma haida ia ha-uraia hereva momokani idia kamonai, bona dibaia, bona Iehova idia hanamoa totona.
3 Dina Iboudiai, Haroro Daladia Do Ita Davaria: Hari, momo idia davaria dina ta ta ai, nega bona gabu idaudia ai haroro gaukara amo Iehova idia hanamoa diba. Hegaegae guna karana ese anina namona ia havaraia. Taihu ta be ena lalona ia haidaua vadaeni unai bamona haroro gaukara do ia karaia, to ia davaria ta ese ena motuka ena uindo rua ia hamakohia, henaohenao totona. Uindo hanamoa gabuna ia rini henia murinai, bena ia hegaegae do idia siaia tauna ia haroro henia totona. Iena hegaegae karana ta be Iehova ia noia ena heduru ia abia totona. Hora ta lalonai, unai gaukara tauna ia haroro henia bona Mauri Hanaihanai bukana ia hariharilaia.
4 Taihu ma ta bona ena dekena hahine be edia sisia ida idia raka neganai, nega momo idia hedavari. Nega ta idia hedavari bona edia herevahereva lalonai mauri ena hekwakwanai idia kikilaia. Nega momo unai idia herevalaia. Gabeai, Baibel stadi idia hamatamaia. Hoa gauna be inai: Gabeai unai dekena hahine be ena lalohadai gunana ia hahedinaraia, ia gwau, bema Iehova ena Witness taudia be ena ruma dekenai idia lao, do ia kamonai lasi badina Dirava bona Baibel ia abidadama henidia lasi.
5 Tadikaka haida idia davaria bema haida be edia ruma dekenai idia lao, idia haroro henia diba. Ireland dekenai, tau ta be taihu ta ena ruma dekenai ia lao life insurance ia hoihoilaia totona. Taihu ia gwau iena helaro be mauri hanaihanai do ia moalelaia. Unai tau be ena mauri ibounai lalonai Katolik Dubu ia badinaia dainai, unai be lalohadai matamata ta ia dekenai. Ia ese Mauri Hanaihanai bukana ia abia, wiki ta murinai hebou dekenai ia lao, bena Baibel stadi ia hamatamaia. Hari unai hoihoi tauna be iseda bapatiso vadaeni tadikakana ta.
6 Namona be ita ibounai ese dina ta ta ai Iehova hanamoa daladia ita tahua. Heduru gauna be magasin eiava pepapepa haida be vadivadi taudia idia itaia diba gabudia ai oi atoa, bena oi hariharilaia haraga diba. Taunimanima be momo gabudia ai oi noho neganai, reana unai ese dala ia kehoa haida oi haroro henidia totona. Idia sikuli noho Witness memero kekeni haida be Baibel ia kikilaia bukadia edia pata latanai idia atoa, bena idia henanadai taudia ida herevahereva idia hamatamaia diba. Baibel siri ta o rua oi hegaegaelaia guna. Iehova oi noia oi ia durua. Unai oi karaia dainai, oi do ia hanamoa.—1 Ioa 5:14.