Hanaihanai Iseda Diari Ita Hahedinaraia

¹ Diari be dahaka? Diksenari ta ia gwau “ia dainai gau ita itadia diba.” Ena be taunimanima edia diba be bada, to idia be Iobu 38:24 ai ia noho henanadai, Iehova ese Iobu dekenai ia henia henanadai, ena haere idia diba momokani lasi. Bema diari be lasi, ita mauri diba, a? Lasi, ita mauri diba lasi. Ita itaia diba totona gau badana be diari ita abia, bona Baibel ese ita ia hamaoroa, lauma dalanai “Dirava be diari.” (1 Ioa. 1:5) “Diari ita dekenai ia henia” Tauna ese iseda mauri ia biagua.​—Sal. 118:27.

² Tauanina dalanai sibona lasi to lauma dalanai danu unai be momokani. Tomadiho koikoi ese taunimanima momo herea ia hakaua kerere dainai, lauma diburana lalonai idia noho, bona idia be ‘magu ia dogoatao, matakepulu tauna ese iena dala ia tahua noho’ bamona. (Isa. 59:​9, 10) Iena lalokau hereadaena bona ena hebogahisi dainai, Iehova ese ‘diari bona hereva momokani’ ia halasia. (Sal. 43:3) Unai idia laloa bada taudia milioni momo be “dibura dekena amo” idia raka lasi, bena “diari namo bada herea” lalonai idia noho.​—1 Pet. 2:9.

³ Tanobada dekenai unai diari ia abia mai tauna badana be Iesu Keriso. Ia gwau: “Lau be tanobada dekenai lau mai vadaeni, diari bamona. Unai dainai lau idia abidadama henia taudia ibounai be dibura lalonai do idia noho lasi.” (Ioa. 12:46) Iena nega, siahu, bona goada ia gaukaralaia, hereva momokani ena diari hahedinaraia totona. Ia vara tanona ena gabu iboudiai dekenai ia loaloa, siti bona hanua iboudiai dekenai haroro bona hahediba gaukara ia karaia. Dagedage karadia badadia ia haheaukalaia, bona hereva momokani ena diari hahedinaraia gaukarana ia rakatania lasi.

⁴ Iesu ese ena hahediba taudia ia abia hidi, ia hadibaia, bona ia siaia, gaukara ta idia karaia totona. Mataio 5:​14-16 ai idia ia hamaoroa, ia gwau: “Umui be tanobada taudia ibounai edia diari. . . . Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” Iesu hegeregerena, idia be ‘diari bamona do idia hedinarai,’ bona hereva momokani ena diari be gabu iboudiai dekenai do idia halasia. (Fil. 2:15) Mai moale ida unai gaukara idia abia dae bona edia mauri lalonai idia tahua guna. Nega sisina murinai, Paulo ia gwau diba sivarai namona be “tanobada ibounai dekenai ai harorolaia vadaeni.” (Kol. 1:23) Keristani kongregesen taudia iboudiai idia gaukara mai lalo-tamona ida, unai gaukara badana idia hagugurua totona.

⁵ Hari inai nega lalonai ita moale, badina be ita be “dibura ena kara” idia negea taudia bogaraginai ita noho. (Roma 13:​12, 13) Iesu bona Keristani taudia gunadia mai edia abidadama edia haheitalai tohotohoa karana amo, unai moale ita hahedinaraia diba. Nega ia kwadogi bona kahirakahira do ia ore dainai, hereva momokani ita harorolaia haraga be namo. Ma gaukara ta be unai gaukara bamona lasi; ena anina bona namo ese gaukara iboudiai edia ia hanaia.

⁶ Edena Bamona Diari Ita Hahedinaraia Diba? Iseda diari hahedinaraia dalana badana be Basileia harorolaia gaukarana ita karaia. Kongregesen ta ta iboudiai ese dala idia hegaegaelaidia, edia teritori lalonai haroro gaukara idia karaia totona. Buka bona magasin idauidau momo idia noho, gado idauidau momo gaudia idia noho danu. Edia hebou amo edukeisini namona idia henia, bona lo taudia ese matamata taudia idia hadibaia bona durudia. Tatau, hahine, buruka taudia, bona memero kekeni danu be unai gaukara lalonai idia vareai diba. Kongregesen taudia ta ta iboudiai idia hagoadaia edia diba bona edia mauri daladia hegeregerena, kongregesen gaukarana ai idia vareai totona. Kongregesen ese ia karaia gaudia iboudiai edia badina badana be haroro gaukara, bona kongregesen taudia iboudiai idia durua, idia karaia diba totona. Hanaihanai kongregesen ita bamoa be iseda diari hahedinaraia noho karana durua dalana badana.

⁷ Iseda hereva amo sibona lasi, to dala ma haida amo danu iseda diari ita hahedinaraia diba. Iseda kara amo ita hahedinaraia diba. Petero be unai ia laloa noho neganai, ia gwau: “Dirava idia diba lasi taudia edia vairanai, kara namodia do umui karaia. . . . Emui kara namodia idia itaia neganai, idia ese Dirava do idia hanamoa.” (1 Pet. 2:12) Taunimanima ese orea ta o gaukara ta idia gwauraia namo o dika, ia lalonai idia gaukara taudia edia kara hegeregerena. Bema idia itaia taudia idia lebulebu lasi, idia goeva, idia koikoi lasi, maino idia tahua, bona taravatu idia badinaia, vadaeni idia laloa unai taunimanima be idau bona idia badinaia taravatudia be namo herea. Bema tau ta ese ena adavana ia matauraia bona ia lalokau henia momokani, ena diari ia hahedinaraia unai; hahine ta ese ena tau ena kwara dagina ia matauraia neganai, unai ia karaia. Memero kekeni ese edia tama sina idia kamonai henia, sihari karana idia karaia lasi, bona drag idia ania kava lasi neganai, idia hahedinaraia idia be idau. Iena gaukara ia karaia namonamo, ia koikoi lasi, bona ma haida ia matauraia gaukara tauna idia laloa bada. Unai Keristani karadia ita karaia neganai, iseda diari ita hahedinaraia, bona ma haida idia diba iseda mauri dalana be namo.

⁸ Haroro gaukara ena anina be, Dirava ena Hereva amo ita dibaia vadaeni gaudia be ma haida dekenai ita herevalaia. Platfom amo eiava ruma ta ruma ta amo sibona lasi, to dala ma haida amo ita karaia diba danu. Dina ta ta ai taunimanima momo ita hedavari henidia. Dina ta ai, nega hida emu dekena taudia ida umui herevahereva? Nega hida ta be emu ruma ena iduara dekenai ia pidipidi? Oi lao sitoa, PMV oi guia, eiava moni gaukara oi karaia neganai, taunimanima hida ida oi hedavari? Bema oi be sikuli mero o kekeni ta, dina ta ta ai oi hereva henia taudia edia momo be hida? Haida hereva henia negadia be momo herea. Gau badana be Baibel siridia haida oi laloa guna, Baibel bona pepapepa oi abia hegaegae, bena dala ia kehoa neganai, mai gari lasi ida oi hereva.

⁹ Ena be nega idaudia bona gabu idaudia ai haroro gaukarana be auka lasi, to haida idia ura lasi idia karaia toho. Reana idia be hemarai taudia, bona idia gwau idia hemarai eiava idia gari dainai idia hegeregere lasi idau taudia do idia hereva henidia. Idia gari, haida ese do idia raraia garina, eiava ta ese do ia haere auka henia garina. Unai gaukara idia manadalaia vadaeni taudia idia gwau unai ita lalo-hekwarahilaia be badina lasi. Unai taudia edia ura gaudia, idia lalo-hekwarahilaia gaudia, bona idia bona edia famili totona idia ura karaia gaudia be idau lasi; ita danu ese unai gaudia ita tahua. Momo idia moale, iseda moale toana idia itaia bona ita hanamodia neganai. Emu hereva hamatamaia totona, namona be emu lalona oi “hagoadaia.” (1 Tes. 2:2) Hereva oi hamatamaia murinai, reana do oi hoa bada bona do oi moale, anina namona ia havaraia dainai.

¹⁰ Iseda Diari Ita Hahedinaraia Neganai, Hahenamo Ita Abia: Ekspiriens namodia haida, nega idaudia bona gabu idaudia ai idia haroro dainai idia abia, be inai: Lagani 55 hahinena ta ese dala ia hanaia toho. Motuka ese ia bampaia gwauraia neganai, taihu ta ese ena imana ia dogoatao bona ia veria siri, bena ia gwau: “Mani oi naria namonamo. Gau dikadia momo idia vara negana ai ita noho!” Bena ia hahedinaraia dahaka dainai iseda nega be nega dikana. Unai hahine ese ia nanadaia, ia gwau: “Oi be Iehova ena Witness hahinena, a?” Guna, ena kakana amo iseda buka ta ia abia, bona ia ura Iehova ena Witness taudia do ia davaria. Vadaeni, unai dala amo ta ia davaria.

¹¹ Doketa ena opesi dekenai idia naria noho neganai, taihu ta be hahine ta ida idia herevahereva. Unai hahine ia kamonai namonamo bena ia gwau: “Nega daudau lalonai, Iehova ena Witness taudia idauidau be lau dekenai idia hereva; to bema gabeai lau be Iehova ena Witness hahine ai do lau lao, unai be hari oi herevalaia gauna dainai. Emu hereva lau kamonai neganai, ia be hegeregere dibura gabuna dekenai diari ta lau itaia matamaia bamona.”

¹² Hebogahisi hahedinaraia karana ta danu ese haida ia durua diba, hereva momokani idia dibaia totona. Haroro gaukara ia ore murinai, taihu rua idia raka lao edia ruma dekenai. Basi amo ia diho hahine burukana ta idia itaia, ena toana be ia gorere. Idia nanadaia ia ura do idia durua, eiava. Ia idia diba lasi taudia rua idia ura durua dainai, ia hoa maragi lasi bona ia ura dikadika do ia diba dahaka dainai unai hebogahisi karana idia karaia. Dala ia kehoa dainai idia haroro henia diba. Unai hahine ese ena adres ia henidia bona idia ia hamaoroa namona be do idia vadivadi henia. Baibel stadi idia hamatamaia. Karaharaga hebou lao henia karana ia matamaia, bona hari ia ese hereva momokani ia harorolaia danu.

¹³ Taihu ta be ena moni gaukara gabuna dekenai gaukara hahine ta ia kamonaia, politikol pati ia gwauraia, ia gwau ia laloa tanobada ena hekwakwanai do ia hanamoa diba. Taihu ia hereva hedinarai, Dirava ena Basileia ena gaukara gwauhamatadia ia herevalaia. Ena hereva dainai, unai hahine ese Baibel stadi be ena ruma ai ia abia, bena gabeai ia bona ena adavana be Witness taudia ai idia lao.

¹⁴ Laloaboio Lasi, Oi be Witness Tauna! Iesu be ena hahediba taudia be “tanobada taudia edia diari” ia gwauraia neganai, ia gwau namona be idia ese ma haida do idia durua, Dirava ena Hereva amo ia mai lauma diarina amo namo do idia abia totona. Bema Iesu ena sisiba ita badinaia, iseda hesiai gaukara be edena bamona do ita laloa?

¹⁵ Ita diba vadaeni pat-taim Keristani taudia be lasi, bona ita gwauhamata vadaeni, ‘siboda eda ura’ do ita karaia lasi, to Iesu ena “murina dekenai do” ita raka hanaihanai. (Mat. 16:24) Dala ia noho neganai, herevana unai be edeseniai, iseda ura be ‘mai iseda kudou ibounai ida’ taunimanima dekenai iseda diari do ita hahedinaraia. (Kol. 3:​23, 24) Namona be tanobada taudia edia lalohadai do ita dadaraia, do ita gaukara goadagoada noho, matamana ai ita gaukara hegeregerena, bona iseda diari ita hahedinaraia goevagoeva noho. Reana haida edia haroro gaukara karaia urana ia manoka bona edia diari be sisina sibona, itaia be auka. Reana idia do ita durua, bena haroro gaukara do idia ura henia bada lou.

¹⁶ Reana haida idia haroro momo lasi, badina be taunimanima momo idia ura lasi ita harorolaia sivaraina do idia kamonai. Paulo ia gwau Iesu Keriso sivaraina “be kavakava” unai “mase ena dala dekenai idia raka noho taudia dekenai.” (1 Kor. 1:18) Herevana dahaka idia gwau, ia be mai goada ida ia gwau: “Lau be Sivarai Namona dekenai lau hemarai lasi momokani.” (Roma 1:16) Ia hemarai tauna be ia laloa ia be anina bada lasi gauna. Ita ese guba bona tanobada edia Atai Lohiana bona ita moale hanaihanai totona ia karaia vadaeni karadia be ita herevalaia neganai, ita hemarai diba, a? Namo lasi unai hereva momokani ita harorolaia neganai, ita laloa ita be anina lasi. To, namona be ita gaukara goada bona ita hahedinaraia ita “hemarai lasi.”​—2 Tim. 2:15.

¹⁷ Tanobada hegegemadai, tano idauidau momo lalodiai, hereva momokani ena diari ia hedinarai noho bona paradaiso lalonai mauri hanaihanai helarona ia hahedinaraia. Namona be ita hahedinaraia inai sisiba, hanaihanai iseda diari do ita hahedinaraia sisibana, ita abia dae momokani! Bema unai bamona ita karaia, hahediba taudia gunadia bamona do ita moale bada herea; idia ese “taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi” bona do ita hadokoa lasi danu.​—Kara 5:42.