Kamonai Sibona Lasi—Badinaia Danu
1 Keristani taudia korikoridia ese Baibel ena sisiba idia laloa namonamo, ena hereva idia kamonai sibona lasi, to idia badinaia danu. (Iam. 1:22) Sibodia idia gwauraia Keristani taudia, edia bibinadia sibona dekena amo Dirava idia hanamoa taudia, amo, idia idau vaitani. (Isa. 29:13) Iesu ese ia hahedinaraia goevagoeva Dirava ena ura idia karaia taudia sibona do idia roho mauri.—Mat. 7:21.
2 Tomadiho lalonai, bema Dirava kamonai henia karadia be lasi, ia be anina lasi. (Iam. 2:26) Unai dainai namona be ita be sibona do ita henanadai, ‘Egu kara be edena bamona egu abidadama idia hamomokania? Dahaka ese idia hahedinaraia egu mauri dalana be egu abidadama hegeregerena? Edena bamona Iesu lau tohotohoa momokani diba?’ Mai momokani ida ita haerelaidia neganai, ita do ia durua bena do ita diba Dirava ena ura ita karaia lalonai gau haida ita hanamoa vadaeni o do ita hanamoa be namo.
3 Ita be Iesu murinai ita raka taudia dainai, iseda mauri lalonai iseda tahua gauna badana be salamo ia torea tauna ena hegeregerena, ia gwau: “Ai ese nega ibounai oi [Dirava] do ai hanamoa, bona oi do ai tanikiu henia ela bona hanaihanai.” (Sal. 44:8) Keristani dalana badinaia be dina ta ta ai bona iseda kara iboudiai amo ita hahedinaraia; ia be mauri dalana ta. Bema mai eda ura ida iseda kara iboudiai amo Iehova ita hanamoa, do ita moale bada!—Fil. 1:11.
4 Iehova Hanamoa Karana Ena Anina be Iseda Mauri Lalonai Kara Maorodia Karaia Sibona Lasi: Bema Dirava ia ura unai sibona ita karaia, vadaeni, iseda kara idauidau do ita hanamoa sibona be hegeregere. To, iseda tomadiho ena kahana ta be Iehova ena ladana bona hoa kara badadia taunimanima edia vairanai ita harorolaia!—Heb. 13:15; 1 Pet. 2:9.
5 Iseda mai anina gaukaradia ta be taunimanima edia vairanai sivarai namona ita harorolaia bona ena anina be bada herea. Iesu be sivarai namona harorolaia gaukarana ia goadalaia badina ia diba ia amo kamonai taudia ese mauri hanaihanai do idia abia. (Ioa. 17:3) Hari iseda nega lalonai ‘haroro do ita goadalaia noho’ be mai anina; ia be taunimanima ese mauri do idia davaria dalana tamona sibona. (Kara 6:4; Roma 10:13) Anina badana ia havaraia dainai, hari ita diba dahaka dainai Paulo ese ita ia sisiba henia, ‘sivarai namona do ita harorolaia goadagoada’ totona.—2 Tim. 4:2.
6 Iseda mauri lalonai, Iehova hanamoa gaukarana ena bada be edena bamona? Salamo ia torea tauna ia gwau nega ibounai ia laloa. Iseda hemami be unai bamona, ani? Oibe, bona taunimanima ida ita hedavari negadia ibounai, do ita ura Iehova ena ladana do ita herevalaia. Dala do ita tahua lauma gaudia ita kikilaia totona. Do ita hekwarahi hanaihanai kongregesen ese ia hegaegaelaia haroro hebou negana ai do ita lao. Bema ita haida dekenai dala ia hegeregere, painia gaukarana do ita lalohadailaia namonamo diba, badina unai ese ita do ia durua iseda mauri lalonai dina ta ta ai haroro gaukara ita atoa guna totona. Dirava ena Hereva ese ita ia hamaoroa bema Dirava ena ura ita karaia momokani noho, do ita moale.—Iam. 1:25.