Ruma Ta Ruma Ta ai Iseda Magasin Gaukaralaidia
1 Noga! idia karaia ena badina be unai magasin iboudiai edia rau 4 dekenai idia torea hedinarai, ia gwau: “Inai magasin ese taunimanima ia durudia, do idia diba momokani, gau ibounai ia karaia Diravana ese maino bona noho namo tanobada matamatana do ia karaia, lagani 1914 ai idia vara gaudia idia itaia uruna idia do mase ore lasi neganai.” Unai magasin namona be iseda ruma-ta-ruma-ta haroro gaukarana lalonai ita hariharilaia momo be gau badana!
2 Noga! magasin be gau namona lauma gaudia idia laloa lasi taudia edia lalona veria totona. Magasin matamata ta ta iboudiai ita duahidia neganai, namona be taunimanima ida do ita kikilaia diba herevadia ita tahudia. Pablisa haida be sibodia edia magasin ta ta iboudiai lalonai, heduru hereva haida idia torea hegaegae, bona unai magasin be ruma-ta-ruma-ta gaukara lalonai idia hariharilaia gwauraia neganai, edia magasin lalonai idia torea herevadia idia riviulaidia, unai neganai idia diba edena hereva ruma taudia ida do idia kikilaia diba.
3 Iseda hereva ita hamatamaia totona reana ita gaukaralaia Noga! magasin dekenai ia noho sivaraina ita kikilaia diba.
Bema ruma tauna ia kamonai, namona be magasin ia dekenai ita hahedinaraia, reana inai bamona do ita hereva:
◼ “Inai Noga! magasin lalonai ita kikilaia sivarai ena hereva ma haida idia noho.” Bena murinai ita abia hidi guna paragraf ena hereva haida ita duahia, bena ita gwau: “Lau itaia inai sivarai oi ura henia bada, unai dainai oi ura inai Noga! magasin lalonai unai sivarai bona sivarai ma haida do oi duahidia, a? Bema oibe, inai magasin bona ia ida ai henia Gima Kohorona magasin oi abidia diba, ruaosi edia davana be 50 toea sibona.” Bema ruma tauna ese unai magasin rua ia abidia, namona be ita hamaoroa ita ura ma nega ta ai do ita giroa lou ena lalohadai unai magasin dekenai do ita kamonai totona.
4 Bema ruma tauna ese ia hahedinaraia ia ura lauma gaudia ia kamonai henia, namona be Baibel ena siri ta ita duahia, hegeregere 2 Timoteo 3:1-5, unai siri ese nega dokona ia kikilaia. Unai ita duahia murinai, magasin do ia laloa totona, namona be Gima Kohorona ena rau 2 dekenai “Gima Kohorona ai karaia . . . ” henunai ia noho herevana oi duahia. Murinai, ia dekenai Gima Kohorona bona Noga! magasin oi henia toho.
5 Ruma-ta-ruma-ta gaukara ita karaia lalonai, namona be ita laloatao taunimanima be lauma dalanai idia tubu totona, ita dekenai magasin namodia rua idia noho durudia totona, unai be Gima Kohorona bona Noga! magasin. Namona be nega ibounai dala ita tahua unai magasin ita hariharilaidia totona bona ita goada karaia ruma taudia edia lalona ita veria unai magasin rua idia ura henidia totona.
[Questions]
1. Noga! magasin idia karaia ena badina be dahaka?
2. Edia Noga! magasin hariharilaia gaukara durua totona pablisa haida be dahaka idia karaia?
4. Gima Kohorona magasin ita hahedinaraia dalana ta be dahaka?