Edia Abidadama Do Umui Tohotohoa
1 Aposetolo Paulo ese abidadama ena anina ia hahedinaraia, ia gwau: “Ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” Ma ia gwau: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia.” (Heb. 11:1, 6) Paulo ese ita ia hagoadaia namona be ita abidadama noho, ita abidadama goada, bona abidadama ita badinaia.—2 Kor. 4:13; Kol. 2:7; 2 Tim. 2:22.
2 Baibel ese abidadama ena haheitalai namodia momo ia gwauraia. Heberu karoa 11 lalonai, Paulo ese abidadama goadana idia hahedinaraia taudia edia lista latana ia hahedinaraia. Unai lista ese Abela, iena abidadama dainai ia mase tauna ginigunana, ia gwauraia. Noa ia gwauraia badina iena abidadama dainai Dirava gari henia karana ia hahedinaraia bona unai amo iena ruma bese idia roho mauri. Aberahamo ia hanamoa badina ia be mai abidadama bona ia kamonai henia dainai. Mose ese hanamoa herevana ia abia badina iena abidadama dainai ia haheauka bona matana amo itaia diba lasi Diravana ia itaia bamona. Haheitalai edia lista be lata herea dainai Paulo ia gwau nega be ia hegeregere lasi idia iboudiai ia gwauraia totona. Ita tanikiu bada badina edia ‘helaga karadia bona Dirava badinaia karadia’ ita lalohadailaia karana amo iseda abidadama ita hagoadaia diba!—2 Pet. 3:11.
3 Aposetolo edia negai, Iesu ia henanadai: “Taunimanima ena Natuna do ia mai neganai, tanobada dekenai abidadama do ia davaria o?” (Luka 18:8) Vadaeni, hari iseda negai ita bogaraginai abidadama ena haheitalai idia noho, a? Dirava ena taunimanima ese Baibel ena negai idia karaia hegeregerena, mai goada ida Iehova idia abidadama henia tatau bona hahine, matamatadia bona burukadia ita itaia diba, a?
4 Abidadama Ena Haheitalai Hari Inai Negai: Abidadama ena haheitalai namodia be ita bogaraginai ita davaria diba! Ita idia hakaua naria taudia edia abidadama ita badinaia be namo. (Heb. 13:7) To idia sibona lasi be abidadama ena haheitalai namodia. Kongregesen iboudiai lalonai nega daudau mai abidadama ida Iehova idia badinaia taudia idia noho, bona nega momo mauri ena hekwarahi aukadia lalonai unai idia hahedinaraia.
5 Abidadama lasi adavana ena dagedage dainai lagani momo lalonai idia hekwarahi abidadama taihudia ita laloa bada be namo. Adavana lasi tamana o sinana be idia hekwarahi idia sibona ese edia natudia idia naria totona. Ita bogaraginai vabu burukadia idia noho bona ena be idia be famili lasi heduru abia totona, kongregesen gaukara ta idia reaia lasi. (Luka 2:37 itaia.) Ore lasi goreredia idia haheaukalaia taudia edia abidadama ita hoalaia. Ena be haida edia goada ia hegeregere lasi hesiai gaukara ma haida idia karaia, to mai abidadama ida Dirava idia hesiai henia noho. Witness natudia momo be gari lasi dalanai idia abidadama noho, ena be sikuli dekenai hekwakwanai idia vara. Mai abidadama painia taudia ese lagani ta ta lalonai idia davaria hekwakwanai momo idia haheaukalaia ita itaia neganai, iseda Dirava badinaia karana ia goada ia lao. Paulo bamona, iseda nega ia hegeregere lasi unai tadikaka bona taihu be Basileia hesiai gaukara lalonai idia davaria ekspiriens bona edia abidadama karadia ita gwauraia totona!
6 Unai abidadama taudia edia haheitalai ese iseda lalona idia hanamoa bona ita idia hagoadaia. (1 Tes. 3:7, 8) Edia abidadama do ita tohotohoa be namo, badina “idia kara momokani [“abidadama,” NW] noho taudia dekenai, Lohiabada ia moale noho.”—Aon. 12:22.