Hetura Dalanai Herevahereva Karana ese Kudouna Ia Veria Diba
1 Herevahereva ena anina ita gwauraia diba “uduna amo lalohadai henia heheni karana.” Taunimanima idia laloa gaudia be hetura dalanai ita herevalaia matamaia neganai edia lalona ia veria bona ita ia durua Basileia ena sivarai amo edia kudouna ita veria. Ita diba hetura dalanai mai moale ida taunimanima ita hereva henia karana ese anina namona ia havaraia, haroro aukana ese unai bamona anina ia havaraia lasi.
2 Hetura Dalanai Herevahereva Hamatamaia Dalana: Lalohadai badadia bona siri momo ita hahedinaraia be herevahereva dalana lasi. Ena anina be ta ena lalona ita veria ita ida do ia ura herevahereva. Haheitalai be inai, iseda dekena tauna ida hetura dalanai ita herevahereva neganai, ita hereva auka lasi to mai moale ida ita hereva. Do ita gwauraia herevadia ita palanilaia momo lasi to ia gwauraia lalohadai hegeregerena ita hereva. Ia gwauraia gaudia ita laloa bada neganai, reana ia ura ita ida do ia herevahereva noho. Unai be momokani haroro gaukara dekenai danu.
3 Hereva badadia, hegeregere raskol karadia, matamata taudia edia hekwakwanai, iseda noho gabuna ai idia vara gaudia, tanobada ai idia vara gaudia, eiava medu o dina ena siahu amo danu herevahereva namona ita hamatamaia diba. Taunimanima edia mauri lalonai idia vara gaudia herevalaia karana ese edia lalona idia veria haraga. Herevahereva ita hamatamaia murinai, metairametaira Basileia ena sivarai ita herevalaia matamaia diba.
4 Ita laloa lasi mai moale ida ita herevahereva totona hegaegae be anina lasi. Lasi, hegaegae be mai anina. To, namo lasi ita be autlain aukana ita karaia eiava iseda haroro ena hereva iboudiai ita laloatao toho, bema unai bamona ita karaia iseda herevahereva dalana be idia vara gaudia hegeregerena ita haidaua be auka. (1 Korinto 9:20-23 itaia.) Hegaegae dalana namona be Baibel ena hereva badadia ta o rua ita abia hidi, unai gaudia do ita herevalaia totona. Unai totona Herevalaia bukana lalonai idia noho herevadia ita duahia lou be namo.
5 Kara Badadia Hetura Dalanai Herevahereva Lalonai: Haida ida ita herevahereva neganai, gau badana be mai hebogahisi bona mai lalona momokani ida ita karaia. Kiri bona moale toana ese unai idia hahedinaraia. Ita gwauraia sivaraina ese tanobada sivaraidia iboudiai ia hereaia; ia be kudou namo taudia idia ura bada gauna. Bema mamina idia abia mai momokani ida ita ura sivarai namona ta idia dekenai ita gwauraia, reana do idia ura kamonai.—2 Kor. 2:17.
6 Herevahereva heheni ese mamina namona ia havaraia be gau badana. Unai dainai, namona be Basileia ena sivarai ita gwauraia neganai ita hebogahisi bona manau. (Gal. 5:22; Kol. 4:6) Namona be oi hekwarahi ruma tauna oi rakatania murinai mai moale ida Iehova ena Witness taudia do ia laloatao. Unai dala amo, ena be ita ese iena kudouna ita veria lasi, to reana gabeai Witness tauna ta ese ia hereva henia neganai do ia kamonai.
7 Hetura dalanai ita herevahereva be haroro hereva badana amo ia vara lasi. To tau ta ese ia laloa bada gauna herevalaia karana amo iena lalona ita veria. Bema ita hegaegae guna, ita hegeregere hetura dalanai taunimanima ida do ita herevahereva. Namona be ita goada karaia ita davaria taudia edia kudouna ita veria sivarai hereadaena, Basileia ena hahenamo ela bona hanaihanai sivaraina amo.—2 Pet. 3:13.