Gau Namo Hereana Ena Sivarai Namona Harorolaia
1 Lagani 117 lalonai, Gima Kohorona ese Baibel ena hereva ia hamomokania. Hari, magasin ta ta edia kopi 18,950,000 idia printaia gado 125 dekenai. Awake! danu ese Dirava ena Hereva ia gwauraia, bona hari magasin ta ta edia kopi be 15,730,000 gado 80 dekenai.—Kolose 1:23 itaia.
2 Magasin be Lauma Dalanai Durua Gaudia: Gima Kohorona bona Awake! ese lalo-momokani taudia milioni momo idia durua lauma dalanai. Abidadama hagoadaia hereva momo idia halasia. Hegeregere, Gima Kohorona February 1, 1996 lalonai, Iehova bona ena Hereva ita abidadama henia be namo ia gwauraia herevana ita stadilaia. March 1, 1996 ena Gima Kohorona ese ita ia hagoadaia Iehova ena hesiai gaukara lalonai ita bisi bona ia ita naria noho. Sepanaia ena peroveta herevana stadilaia namonamo karana ita moalelaia bada! Bona abidadama hagoadaia herevana Keristani taudia edia badinaia karana dekenai be Gima Kohorona March 15, 1996 lalonai ia noho. May 15, 1996 ena magasin ese Dirava ena Hereva dina ta ta ai ita duahia bona stadilaia ena namo ia herevalaia badabada. Unai hereva ese iseda lalo-parara Dirava ena Hereva dekenai idia habadaia, bona ena Basileia ita laloa bada karana idia hagoadaia.
3 Ma danu, unai magasin lalonai Dirava badinaia karadia, Keristani karadia, bona mai anina bada gaudia ma haida idia herevalaia. Iseda mauri lalonai idia vara anina bada gaudia idia herevalaia. Unai dainai, Dirava ese ia gwauhamatalaia gau namo hereana vaira negana totona ita naria lalonai, mauri namona hari ita moalelaia vadaeni.—Isa. 48:17; 1 Tim. 6:19.
4 Awake! ta ta iboudiai ena rau 4 dekenai idia torea herevana ita laloa lou ese ita dekenai badina namona ia henia dainai, gabu iboudiai ai idia noho taunimanima iboudiai dekenai, matamata bona buruka taudia dekenai, ita hahedinaraia inai magasin be duahiduahi gauna namona. Unuseniai ia gwau: “Awake! magasin ese ruma bese ibounai ia durudia diba. Hari inai negai idia vara hekwakwanaidia haheaukalaidia dalana ia gwauraia. Tanobada ena sivarai ia ripotilaia, tano idauidau taudia edia sivarai ia gwauraia, tomadiho bona saiens edia kara ia tahua. To, unai sibona lasi. Idia vara gaudia edia anina ia hahedinaraia danu, to politikol karana o bese abia isi karana dekenai ia vareai lasi. Gau badana be inai: Inai magasin ese taunimanima ia durudia, do idia diba momokani, kahirakahira Dirava ese inai tanobada dikana mai ena taravatu utua karadia do ia haorea bena ena gabunai maino bona noho namo tanobada matamatana do ia karaia.”
5 Ma Haida Dekenai Magasin Hariharilaia: Mai moale ida Gima Kohorona bona Awake! do oi hariharilaia. (1 Timoteo 6:18 itaia.) Namona be oi dekenai magasin haida idia noho, do oi davaria taudia iboudiai dekenai oi hariharilaia totona. (Had. 11:6) Ita ibounai, memero kekeni bona pablisa matamata danu, be hari hua lalonai magasin edia hereva namodia ita gaukaralaia amo magasin hariharilaia gaukarana ita goadalaia diba. Namona be edia hereva oi diba namonamo, bona mai lalo-momokani bona mai abidadama ida do oi hahedinaraia.
6 Gima Kohorona bona Awake! lalonai ia noho dibana be taunimanima iboudiai idia abia be namo. Idia ita hariharilaia be dala namo hereana ma haida ita durua inai sivarai namona idia kamonai: Kahirakahira gau namo hereana do ia mai!