Ruma Bese Durudia Mauri Namona Abia Totona
1 Bisinesi ai moni gaukaralaia daladia ia diba momo tauna ta ese koledi taudia haida ia hamaorodia, ia gwau: “Mataganigani be kara namona. Oi mataganigani diba bona sibona oi do lalo-namo henia.” Unai be vaia taunimanima ese sibona edia ura tahua guna karana idia goadalaia dalana, sibona edia mauri namona abia totona. Iesu ena hereva be idau momokani, ia gwau namona be Keristani tauna ese “sibona ena ura do ia laloa lasi. . . . Bema tau ta ese tanobada ibounai ia abia, to iena mauri ia halusia, be edena bamona namo do ia abia?” (Mat. 16:24-26) Ta ese mauri namona do ia abia totona, iena mauri ibounai lalonai Dirava ena ura do ia laloa be namo—hari inai negai ruma bese ese do idia tahua gauna badana unai. (Sal. 143:10; 1 Tim. 4:8) Unai lalohadai be Emu Ruma Bese Hamoalea Dalana bukana ena karoa ginigabena dekenai ia hedinarai. Unai buka ese taunimanima ia durua do idia itaia mauri lalonai dahaka be gau badana bona edena dala ai edia ruma bese idia hanamoa diba. Sivarai namona be gabu iboudiai ita harorolaia neganai, ita davaria taudia be edena bamona ita hagoadaia diba, idia ese Ruma Bese bukana do idia duahia totona? Ita gwauraia diba herevadia haida be inai:
2 Ruma dekenai bona dala dekenai hereva hamatamaia totona reana “Emu Famili Oi Moalelaia” pepapepana oi gaukaralaia. Oi henanadai diba:
◼ “Inai nega maurina ena lalo-hekwarahi idauidau lalonai, oi laloa ruma bese maurina namona ita abia diba, a? [Haere naria.] Inai pepapepa ia gwau ita abia diba. Oi ura duahia, a?” Bema ia abia, reana ma oi gwau: “Oi ese unai oi laloa dainai, reana oi ese inai buka danu do oi moalelaia, ia ese ruma bese lalonai moale davaria dalana ia hahedinaraia.” Ruma Bese bukana ena anina oi hahedinaraia. Karoa edia sinado namodia haida oi gwauraia. Rau 2 oi hahedinaraia bona ena hereva oi duahia. Buka oi hariharilaia, ena davana be 50 toea. Oi hamaoroa ma gau haida oi ura herevalaia, bona oi nanadaia edena negai ia do oi davaria diba.
3 Guna ruma bese maurina namona umui herevalaia bena oi giroa lou neganai, reana do oi gwau:
◼ “Lau ura oi abia bukana lalonai hereva ta lau hahedinaraia, lau laloa unai hereva do oi ura henia. Karoa ginigabena ese ruma bese lalonai moale davaria dalana korikorina ia hahedinaraia. [Rau 185 ai paragraf 9 ena sentens ginigabedia ruaosi duahia.] Itaia, moale dalana be Baibel ena hakaua herevadia ibounai ita badinaia. Ai ese ruma bese ai hagoadadia Baibel do idia stadilaia hebou, Dirava ena ura do idia diba totona, bona ruma bese maurina lalonai badinaia dalana idia diba totona. Ai ese davana lasi Baibel kosi ai karaia bona ena lata be hua haida sibona. Bema ia hegeregere oi dekenai, ai karaia dalana do lau hahedinaraia.” Do oi lou henia bona Dirava Ia Ura Dahaka Ita Karaia? buklet eiava Diba bukana, edena be namo, do oi mailaia.
4 Sikuli turadia eiava teritori dekenai matamata taudia oi hereva henidia neganai, reana inai henanadai ese edia lalona ia veria:
◼ “Oi laloa tama sina bona natudia idia herevahereva namonamo be gau badana, a? [Haere naria.] Mani inai ruma bese maurina ia herevalaia bukana ena hereva oi itaia. [Ruma Bese bukana ena rau 146 ai paragraf 3 duahia.] Inai buka ena karoa 12 ese oi bona emu tama sina emui turana namonamo daladia ia herevalaia. Inai buka ena ladana be Emu Ruma Bese Hamoalea Dalana. Bema kopi ta oi ura emu tama sina ida do umui duahia totona, ena davana be 50 toea sibona.” Oi hamaoroa gabeai ia duahia gaudia dekenai ena lalohadai do oi ura kamonai.
5 Mero o kekeni ta ida tama sina bona natudia idia herevahereva karana ma umui herevalaia lou neganai, oi gwau diba:
◼ “Lau moale oi ese ruma bese taudia idia herevahereva namonamo karana ena anina oi laloa danu. Dahaka oi laloa be mai anina bada gauna, tama sina bona natudia idia herevalaia totona?” Haere oi naria. Ruma Bese bukana ena rau 185 oi kehoa bona paragraf 10 lalonai oi davaria haere oi duahia. “Pura ta ta ibounai Baibel stadi umui karaia be dala namona Dirava dibaia totona.” Dirava Ia Ura Dahaka Ita Karaia? buklet oi hahedinaraia. Oi hadibaia ena kahana 16 ese Baibel ena hereva badadia ia gwauraia. Hamatamaia herevana rau 2 dekenai oi duahia, bona kahana ginigunana umui herevalaia.
6 Bema tamana o sinana ta oi davaria ruma-ta-ruma-ta gaukarana ai, eiava loaloa uma gabuna ai, eiava gadara gabuna ai, reana ena lalona veria totona oi gwau:
◼ “Lau laloa oi danu oi diba hari natudia ita hadibaia be auka. Oi laloa dahaka ese lalohadai kereredia amo oiemu ruma bese ia gimaia diba? [Haere naria.] Inai sisiba namodia lau moalelaia.” Ruma Bese bukana ena rau 159 ai paragraf 29 oi duahia. Oi hahedinaraia edena bamona ia ese hadikaia gaudia amo ruma bese naridia dalana namona ia gwauraia. Kopi ta oi hariharilaia ena davana be 50 toea sibona, bona oi hadibaia ena henanadai be gabeai do oi haerelaia diba.
7 Guna “Ruma Bese” bukana ia abia dae tamana o sinana oi lou henia neganai, reana inai dala ai emu hereva oi hamatamaia:
◼ “Guna ita hedavari neganai, lau itaia oiemu natudia oi laloa bada bona oi hekwarahi hadikaia gaudia amo idia oi naria totona. Reana lau rakatania bukana oi do duahia lasi, to ia lalonai hereva namona ta oi itaia be namo. [Rau 168 ai paragraf 16 ena sentens ginigabedia 4 duahia.] Dirava ita tura henia totona, gau badana be ena Hereva, Baibel, amo ia do ita diba. Oi ura ruma bese taudia ese Baibel idia stadilaia hebou dalana lau hahedinaraia, a?”
8 Tanobada ena aonega taudia ese ruma bese hamoalea dalana idia hahedinaraia diba lasi to edia lalohisihisi sibona idia havaraia. Namona be ita ese Ruma Bese bukana do ita hariharilaia goadagoada, unai amo gabu iboudiai taunimanima be Dirava ena Hereva amo mauri namona do idia abia diba.—1 Tim. 6:19.