Henanadai Mauana
◼ Edena bamona buka bona magasin be Haroro Sikuli laiberi dekenai ita atoa diba?
Buka bona magasin momo idia noho lauma dalana ai Dirava ena taunimanima durua totona. Reana pablisa momo dekenai unai buka eiava magasin idia noho lasi dainai, Kingdom Hall dekenai ia noho Haroro Sikuli laiberi dekenai idia noho buka bona magasin idia gaukaralaia diba, hereva haida tahua totona. Baibel idauidau bona diksenari namona ta, bema idia noho, be laiberi dekenai umui atoa diba. Society ese ia halasia buka matamatadia bona Iseda Basileia Gaukara pepadia umui atoa be namo. Gima Kohorona volume bona lagani ta ta edia magasin ibounai be magasin udaia gauna lalonai umui haboua bona umui atoa danu. Bema kongregesen lalonai English gado idia duahia bona lalo-parara diba taudia idia noho, Watch Tower Publications Index bukadia bona Watchtower bona Awake! volume umui atoa be namo. Reana unai bamona kongregesen lalodiai Encyclopedia, mapu, bona gado ena taravatu eiava idau negai sivarai idia gwauraia bukadia haida danu idia noho be durua gauna, to idia be mai anina bada gaudia lasi. Ita laloa bada gaudia be “hesiai tauna mai ena kamonai, bona mai ena kara maoromaoro” ese idia halasia bukadia bona magasin.—Mat. 24:45.
Gori sivarai bukadia, Baibel idia hakoikoia toho taudia edia buka, eiava tanobada ena aonega kavakavadia eiava meamea karadia idia herevalaia bukadia be iseda laiberi dekenai ita atoa lasi. Namona be Haroro Sikuli laiberi dekenai lauma dalanai ita idia durua diba bukadia bona magasin sibona idia noho.—1 Tim. 4:15.
Laiberi naria gaukarana be Haroro Sikuli ia naria tauna ena maduna, ena be ma tadikaka ta ia abia hidi diba ia durua naria totona. Namona be ia itaia, laiberi dekenai buka bona magasin matamatadia idia noho. Namona be buka ta ta ena kopina ena lalona kahana ai kongregesen ena ladana idia torea. Lagani ta ta ai, namona be buka idia sekea idia haida hanamoa totona, eiava matamatana ta idia atoa.
Ibounai idia heduru diba laiberi naria totona. Namona be buka idia gaukaralaia namonamo. Natudia be unai buka danu idia gadaralaia lasi be namo, bona buka dekenai ita toretore lasi be namo. Namona be hadibaia herevana ta idia torea namonamo, buka be Kingdom Hall ena laiberi amo idia kokia lasi be namo bona laiberi dekenai oi atoa diba.
Bema emu kongregesen be mai ena laiberi lasi, eiava ena kahana ta sibona ia noho, namona be umui hekwarahi umui hamaoromaoroa totona. Reana pablisa haida idia ura edia buka gunadia idia henia kongregesen dekenai. Reana sekit naria tauna ese kongregesen haida ia durua diba edia laiberi karaia haorea totona, hegeregere kongregesen ma haida do ia nanadaia bema buka o magasin haida idia henia toho diba. Buka Edia Lista dekenai idia noho Society ena Watchtower volume oi oda diba. Hari Hiri Motu bona New Guinea Pidgin gado dekenai volume idia karaia lasi dainai, namona be lagani ena hua ta ta ena magasin umui haboua faila ta dekenai. Reana laiberi totona sabskripsen umui abia diba, bena unai amo magasin ta do umui reaia lasi. Unai dala amo Haroro Sikuli laiberi be ibounai do ia durua, Dirava ena Hereva ena dava bada gaudia, diba, aonega, bona lalo-parara, idia davaria totona.—Aon. 2:4-6.