Kingdom Hall Ena Laiberi Naria Dalana Matamatana

Lagani momo lalodiai, tanobada hegegemadai kongregesen taudia ese edia Kingdom Hall ena laiberi, guna idia gwauraia Tiokratik Haroro Sikuli ena laiberi, idia gaukaralaia amo namo bada idia abia. Guna, kongregesen ta ta be sibodia mai edia laiberi ta ta be namo. To, Kingdom Hall haida be kongregesen momo ese idia gaukaralaia bona vaira neganai unai bamona dala dainai, toana be dala hereana be Kingdom Hall tamona ai gado tamona idia gaukaralaia kongregesen ibounai be Kingdom Hall ena laiberi tamona sibona do idia gaukaralaia, idia hegaegaelaia namonamo bona buka maorodia idia noho ena laiberi unai.

Ai laloa unai bamona dala ese gabu ena bada do ia koua lasi bona moni bada do ita negea lasi. Danu, kongregesen rua eiava ma haida edia laiberi hatamonaia karana ese laiberi namona do ia havaraia. Unai laiberi hatamonaia karana dainai, buka ma haida edia kopi idia atoa siri diba bona gabeai Kingdom Hall matamata idia haginia neganai idia gaukaralaia diba.

Kingdom Hall ta ta edia laiberi totona, tadikaka tamona, reana ia be Tiokratik Haroro Sikuli naria tauna ta, be laiberi do ia naria. Namona be laiberi ai buka maorodia ia atoa, bona buka ta ta edia kopina edia lalona kahana ai Kingdom Hall ena laiberi ena ladana ia torea hedinarai goevagoeva. Lagani ta ta lalonai, namona be ia sekea laiberi bukadia ibounai idia noho bona idia dika lasi. Kingdom Hall ena laiberi bukadia be ruma dekenai idia abia lao lasi be namo.

Kongregesen taudia ibounai be Kingdom Hall ena laiberi idia laloa bada noho. Ita hahedinaraia unai dala namona ita laloa bada totona, namona be laiberi ita naria namonamo, bona ita gaukaralaia ‘Dirava do ita diba’ totona.​​—Aon. 2:5.