Hebou ese Ita Idia Hagoadaia Gaukara Namodia Karaia Totona
1 Gau badadia rua iseda tomadiho lalonai be kongregesen hebou lao henia karana bona haroro gaukara. Idia ruaosi idia gaukara hebou. Ta ese ta ia durua. Keristani hebou ese ita idia hagoadaia gaukara namodia ita karaia totona, bona Basileia harorolaia bona hahediba taudia halaoa gaukarana be unai gaukara namo hereana ta. (Heb. 10:24) Bema hebou lao henia karana ita rakatania, reana daudau lasi murinai, haroro gaukara do ita hadokoa danu, badina ta ese ita ia hagoadaia lasi.
2 Pura ta ta ena hebou ai lauma dalanai heduru ita abia, ita ia ha-uraia haroro gaukara ita karaia totona. Inai gaukara karaia haraga negana be ita dekenai idia gwauraia loulou, ita idia hagoadaia mauri ia henia Baibel sivaraina be ma haida dekenai ita abia lao. Ita idia hagoadaia bona durua haroro gaukara do ita goadalaia noho totona. (Mat. 24:13, 14) Hebou dekenai ita haere neganai, unai ese ita ia durua ma haida vairanai iseda abidadama ita gwauraia hedinarai karana do ita manadalaia. (Heb. 10:23) Haroro Sikuli ita vareai neganai, ita do ia durua hesiai taudia namodia ai ita lao totona bona iseda hadibaia dalana do ia hanamoa.—2 Tim. 4:2.
3 Edena Bamona Hesiai Hebou ese Ita Ia Hagoadaia Haroro Gaukara Ita Karaia Totona: Ita ibounai idia hagoadaia namona be Iseda Basileia Gaukara pepana lalonai idia noho herevadia ita itaia guna. Unai amo Hesiai Hebou ita lao henia bona platfom amo idia karaia haheitalai ita itaia neganai, iseda lalona dekenai ita laloatao. Haroro gaukara ita karaia neganai, Iseda Basileia Gaukara pepana, bona idia haheitalaia hamatamaia herevadia ita laloa lou, bena anina bada ia havaraia dalana ai do ita haroro. Pablisa momo be unai bamona idia davaria.
4 Hesiai Hebou murinai, haida be nega idia abia hidi haroro gaukara idia karaia hebou totona. Hari unai pablisa taudia be haroro gaukara ai do idia gwauraia diba gaudia idia laloa noho, bona do idia gaukaralaia badina unai hebou ese ia hagoadadia pura ta ta ai haroro gaukara do idia karaia.
5 Gau ta ese iseda Keristani hebou ena gabu ia abia lasi, ia be iseda tomadiho tamona taudia ida hebou gabuna bona gaukara namona hagoadaia gabuna. Bema ita ura iseda gaukara ese anina ia havaraia, namona be hanaihanai kongregesen hebou ita lao henia. Namona be Iehova amo ita abia gau namona unai ita laloa bada bona ‘iseda guriguri hebou karana ita hadokoa lasi.’—Heb. 10:25.