Sikuli amo Anina Namona Oi Abia
1 Ena be sikuli dekenai idia lao matamata taudia be hekwakwanai bona lalo-hekwarahi haida idia davaria, to bema idia hekwarahi edia edukeisini amo anina namona idia abia totona, gau namodia momo do idia davaria.
2 Edukeisini namona ese ta ia durua diba lauma dalanai ia goada ia lao totona. Ta ia do matamata neganai ia karaia karadia edia anina be bada gabeai taunimanima badana ai ia lao bona dahaka ia karaia diba karadia dekenai. Sikuli ita herevalaia neganai danu unai be momokani, “tau ta [ese] aniani uhena ia hadoa, vadaeni unai bamona aniani sibona be do ia abia.” (Gal. 6:7) Sikuli dekenai idia hadibaia gaudia idia stadilaia namonamo matamata taudia ese diba idia abia bona unai diba dainai Iehova ena hesiai gaukara idia karaia namonamo diba.
3 Laloa namonamo guna karana ese ta ia durua sikuli kosi maorona abia hidi totona. Namona be tama sina ese edia natudia idia durua kosi namodia idia abia hidi, bena edia mauri lalonai lauma dalanai tahua gaudia namodia do idia davaria diba. Unai diba idia gaukaralaia neganai, matamata taudia ia durua painia gaukara idia karaia lalonai sibodia idia naria totona. Edia edukeisini ese idia ia durua Iehova idia hanamoa totona, herevana edena dala amo ia idia hesiai henia.
4 Matamata taudia e, namona be emui sikuli laganidia amo anina namona umui abia. Unai bamona umui karaia lalonai, emui mauri ai hesiai gaukara helagana do umui laloa guna, tanobada ena dagi bada gaukara umui tahua lasi. Emui mauri umui gaukaralaia Iehova ena ura karaia totona. Unai amo mai kwalimu danu do umui raka, bona Iehova do umui hanamoa.—Sal. 1:3.