Edukeisen Bona Oiemu Lauma Dalanai Oi Tahua Gaudia
1 Oi matamata neganai, edukeisen ese diba ia henia oi duahiduahi bona toretore namonamo totona bona tanobada ena toana, taunimanima edia sivarai, matematik, bona saiens gaudia oi lalo-pararalaia totona. Danu laloa namonamo, tahua namonamo, hekwakwanai hanaia, bona lalohadai namodia havaraia dalana oi dibaia. Unai bamona edukeisen ese emu mauri ibounai lalonai oi do ia durua. Edena bamona oiemu edukeisen be lauma dalanai oi tahua gaudia ida oi hakapua diba bona oi ia durua “aonega namona, bona laloa kehoa” oi abia totona?—Aon. 3:21, 22.
2 Dirava Ena Hesiai Gaukara Do Oi Karaia Namonamo: Sikuli dekenai oi noho neganai, namona be klas lalonai oi kamonai namonamo bona emu sikuli gaukarana oi karaia namonamo. Bema duahiduahi namonamo bona stadi karana namona oi manadalaia, Dirava ena Hereva do oi tahua namonamo diba bona lauma dalanai do oi gini goada. (Kara 17:11) Diba namona ese oi do ia durua emu haroro gaukara lalonai oi davaria taudia edia mauri, edia ura, bona idia badinaia gaudia idauidau oi lalo-pararalaia totona. Sikuli dekenai oi abia edukeisen be mai anina bada, oiemu Keristani maduna Dirava ena orea lalonai oi karaia namonamo totona.—Mani 2 Timoteo 2:21; 4:11 itaia.
3 Emu Mauri Durua Dalana Oi Diba: Bema oi hekwarahi, diba namona oi abia totona, sikuli oi haorea murinai mauri durua gaudia davaria daladia do oi diba. (1 Timoteo 5:8 itaia.) Do oi stadilaia gauna oi abia hidi namonamo. Gaukara gabudia be momo lasi gaukarana oi tahua lasi, to namona be gabu idauidau dekenai gaukara do oi davaria diba ima gaukarana eiava gaukara ma ta oi dibaia be namo. (Aon. 22:29) Unai bamona edukeisen o diba ese oi do ia durua sibona emu mauri durua gaudia oi abia, bena tadikaka be momo lasi gabudia dekenai do oi ura hesiai gaukara oi karaia.—Kara 18:1-4 itaia.
4 Sikuli dekenai edukeisen namona abia karana ese oi do ia durua emu hesiai gaukara oi habadaia totona. Dirava ena hesiai gaukara dekenai oi goada oi lao noho lalonai, namona be oi hekwarahi gaukara ta oi dibaia bona sibona emu mauri durua gaudia oi abia diba totona. Unai dala ai, oi abia edukeisen ese oi do ia durua, lauma dalanai oi tahua gaudia oi abia totona.