Namona be Ita be Hadibaia Taudia, Haroro Taudia Sibona Lasi
1 Momo idia itaia, “Iehova ena Witness taudia be tanobada hegegemadai idia haroro.” Edena bamona unai idia karaia? Taunimanima edia goada eiava siahu amo lasi, to Dirava ena lauma be iena hesiai taudia dekenai ia gaukara bona ia henia gaudia idia gaukaralaia edia haroro bona hadibaia gaukara idia karaia totona.—Sek. 4:6; Kara 1:8.
2 Buka bona magasin gaukaralaia be dala namona iseda haroro gaukara ita karaia namonamo totona. Lagani momo lalodiai, Iehova ena Witness taudia be buka, buklet, magasin, bona pepapepa maragidia momo herea idia printaia bona idia halasia Basileia ena sivarai namona idia hahedinaraia totona. Sivarai haida 1997 Yearbook lalonai ese idia hahedinaraia buka karaia gaukara be hari ia bada herea. Ema bona hari, New World Translation Baibel ena kopi 91,000,000 mai kahana idia printaia vadaeni. United States ai, lagani tamona lalonai, idia printaia Watchtower bona Awake! magasin edia namba be 7.1 pesen amo ia bada daekau. Germany ai, idia printaia magasin edia namba be 35 pesen amo ia bada daekau. Germany dekenai idia printaia magasin toi toi amo ta ta be Russia gado dekenai.
3 Dahaka dainai buka bona magasin momo idia karaia be namo? Tanobada hegegemadai, ita momo be inai hagoadaia herevana ita badinaia, herevana taunimanima be edeseniai idia noho to ita haroro henidia be namo. Ita momo be iseda haroro gaukara ita habadaia—taunimanima idia hebou gabudia ai, dala dekenai, bona bisinesi teritori gabudia ai—unai dainai idia ura kamonai taudia dekenai buka bona magasin momo herea ita hariharilaia. Idia momo be guna Basileia ena sivarai idia kamonai lasi. Unai taudia durua totona, kongregesen dekenai buka bona magasin idauidau idia noho be namo bona haroro gaukara ena dala idauidau dekenai idia gaukaralaia diba.
4 Buka Bona Magasin Ita Hariharilaia Neganai Iseda Tahua Gauna be Dahaka? Iseda tahua gauna be buka bona magasin ita hariharilaia sibona lasi. Taunimanima be hahediba taudia ai ita halaoa gaukarana be mai ena kahana rua—haroro bona hadibaia. Ginigunana be, Basileia ena sivarai namona harorolaia gaukarana ena hahenamo ita abia, taunimanima ita hadibaia Basileia be tanobada taudia ibounai edia helaro tamona. (Mat. 10:7; 24:14) Iseda Baibel idia gwauraia buka bona magasin be ita idia durua namo herea taunimanima edia ura ita habadaia bona idia dekenai Basileia ita hadibaia totona.
5 Iharuana be, taunimanima be hahediba taudia ai ita halaodia totona, namona be Iesu ena hahegani herevadia ibounai ita hadibadia. (Mat. 11:1; 28:19, 20) Buka bona magasin ese ita idia durua bada hereva momokani be iseda Baibel stadi taudia edia kudouna dekenai ita atoa bona ita durudia hahediba taudia ai idia lao totona.
6 Reana buka bona magasin idia abia taudia be ‘hereva idia kamonai’ taudia, to badinaia taudia ai do idia lao lasi bema ta ese ia durudia lasi. (Iam. 1:22-25) Momo lasi be hahediba taudia ai do idia lao bema ta ese ia hakaua lasi. (Kara 8:30, 31) Hadibaia tauna ese do ia durudia Baibel lalonai idia davaria hereva momokani be idia sibona dekenai idia hamomokania totona. (Kara 17:2, 3) Iseda tahua gauna be do ita durudia ela bona edia mauri idia gwauhamatalaia bona bapatiso idia abia, bona ita hadibadia namonamo dainai do idia hegeregere ma haida idia hadibaia totona.—2 Tim. 2:2.
7 Gau Badana be Hadibaia Taudia Ma Haida Ita Abia: Ita haroro neganai, sivarai namona be taunimanima vairanai ita gwauraia. To, hadibaia gaukara be ma haida edia diba ita habadaia. Ena be haroro gaukara ese taunimanima ia durua Basileia ena sivarai idia diba totona, to hadibaia gaukara ese taunimanima ia durua sivarai namona idia abia dae bona idia badinaia. (Luka 8:15) Hadibaia tauna ta be ia haroro sibona lasi; ena sivarai ia gwauraia hedinarai, ena badina namodia ia herevalaia, hamomokania herevadia ia henia, bona lalona idia veria herevadia ia gaukaralaia.
8 Gau badana be ita momo be hadibaia taudia be namo, haroro taudia sibona lasi. (Heb. 5:12a) Iseda gaukara ena kahana badana be buka bona magasin hariharilaia, to iseda tahua gauna iharuana ita abia totona, iseda hadibaia gaukara be mai anina bada. Buka bona magasin ita hariharilaia neganai ita moale diba, to iseda hesiai gaukara ita karaia namonamo totona, bema buka ta eiava magasin ta ita hariharilaia vadaeni, namo lasi ita laloa unai be iseda tahua gauna ginigabena. (2 Tim. 4:5) Ita hariharilaia vadaeni buka bona magasin be dala idia kehoa ma haida dekenai hereva momokani ita hadibaia totona.
9 Lou Henia Karaia Baibel Stadi Hamatamaia Totona: Reana ita ibounai be buka, buklet, bona magasin haida ita hariharilaia vadaeni, unai amo lou henia ena lista ita karaia. Namona be nega ita atoa ita lou henia bona edia ura ita habadaia totona. Ita lou henia ena badina badana be buka bona magasin ma haida ita hariharilaia sibona lasi, to taunimanima ita hagoadaia idia abia vadaeni buka bona magasin idia duahia bona idia amo namo idia davaria. Bema ta ese ita dekenai ia giroa loulou lasi bona diba maoromaorona ita abia totona heduru ia henia lasi, ita sibona be lauma dalana ai edena bamona ita goada ita lao?—Ioa. 17:3
10 Dirava Ia Ura Dahaka Ita Karaia? buklet dekenai eiava Diba Ese Mauri Dekenai Ita Ia Hakaua Lao buka dekenai baibel stadi ita hamatamaia totona, kamonai taudia ibounai ita lou henidia. Inai buka bona buklet ese Basileia ena sivarai be auka lasi dalanai idia herevalaia, taunimanima idia lalo-pararalaia haraga totona. Dahaka Ita Karaia? buklet be Baibel stadi kosi namona bona ia ese Baibel ena hereva badadia ia gwauraia. Diba buka ese hadibaia tauna ia durua hereva momokani ia hadibaia bona ena anina ia habadaia totona. To, ia ese auka lasi herevadia amo hereva momokani ena anina ia hahedinaraia goevagoeva bona hereva momo lasi amo unai ia karaia.
11 June 1996 Iseda Basileia Gaukara lalonai idia udaia pepana ia hahedinaraia auka lasi hadibaia program ese hadibaia tauna ia durua hadibaia gaukara ia karaia namonamo totona bona stiuden tauna ia durua diba ia abia haraga totona. Namona be unai pepa oi atoa gabu namona ta dekenai bena ia gwauraia hadibaia daladia namodia do oi duahia lou diba. Ena sisiba haida be stiuden tauna ena namo laloa badabada daladia be dahaka, paragraf hida ita karaia stadi tamona dekenai, dahaka ita karaia bema ia henia henanadai be karoa ena hereva hegeregerena lasi, edena bamona hadibaia tauna bona stiuden tauna be stadi totona idia hegaegae, bona stiuden tauna be edena bamona ita hakaua lao Iehova ena orea dekenai. Unai sisiba ita badinaia neganai, ita momo, matamata taudia danu, be stadi namodia ita karaia diba.
12 Sivarai Namodia Haroro Gaukara Amo: Dahaka Ita Karaia? buklet bona Diba buka be heduru bada gaudia, idia ese hahediba taudia halaoa gaukarana idia haharagaia. Bolivia dekenai, tadikaka ta ese Dahaka Ita Karaia? buklet ia abia neganai, maoromaoro ia gaukaralaia tau ta ida stadi ia hamatamaia totona. Hua hani murinai, distrik hebouhebou dekenai, unai stiuden tauna be bapatiso idia abia gwauraia taudia huanai ia noho!
13 Diba buka idia stadilaia haorea murinai, taunimanima momo be Iehova dekenai edia mauri idia gwauhamatalaia. Angola dekenai, Diba buka be hua hani sibona idia gaukaralaia murinai, kongregesen ta ena pablisa taudia edia Baibel stadi edia namba be 190 amo ia bada daekau 260 dekenai bona hebou dekenai idia mai taudia edia namba be nega rua amo idia habadaia, 180 amo ia lao 360 dekenai. Daudau lasi murinai, kongregesen ma ta idia karaia.
14 Diba buka lalonai stadi ginigunana ia hamatamaia murinai, tadikaka ta ia gwau stadi karaia dalana be “auka lasi bema hadibaia tauna be henanadai ia henia sibona, mai anina bada siri haida ia duahia, bona ia hamomokania iena stiuden tauna be ia lalo-parara.” Ena be guna ia laloa ia hegeregere lasi bona idia hegeregere momokani pablisa sibodia ese Baibel stadi idia karaia diba, to gabeai ia lalo-parara ia karaia diba, ia gwau: “Bema lau karaia diba, tadikaka iboudiai idia karaia diba.”
15 Iseda hesiai gaukara dekenai Baibel stadi ita karaia karana amo, hadibaia taudia halaodia gaukarana ita hagugurua noho. Baibel stadi karaia karana idia diba vadaeni taudia be edia gaukara amo ahuna namona bona mamina namona idia abia. Namona be ita danu be ‘Dirava ena Basileia ita harorolaia, bona Lohiabada Iesu Keriso ena sivarai ita hadibaia. Ita hereva mai goada danu, bona tau ta ese ita ia koua lasi.’—Kara 28:31.