Hadohado bona Dairia Gaukarana—Hahediba Taudia Karaia Dalana
(Kahana 1)
1 “Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua.” (1 Kor. 3:6) Unai siri dekenai aposetolo Paulo ese taunimanima be Keriso ena hahediba taudia ai idia lao ena karaia daladia toi ia hahedinaraia. Karaia daladia ginigunadia rua be hadohado bona dairia gaukaradia, bona Dirava ena gwauhamata bona bapatiso hesiai taudia ese unai gaukara edia maduna namona idia huaia.
2 Unai anina be ruma ta ruma ta dekenai, idau nega bona idau gabu dekenai taunimanima idia davaria neganai, bona ma dala haida dekenai danu, haroro gaukara idia karaia. Danu sisina sisina taunimanima idia hadibaia Iesu ena taravatu ibounai do idia diba bona do idia badinaia totona. (Mat. 28:19, 20) Hadibaia gaukara ita karaia totona gau badana be kamonai taudia ita lou henidia, idia danu Bible ena hereva ita kikilaia, bona idia dekenai Bible stadi ita karaia. Oi be mai emu abidadama danu Iehova ena ura oi karaia dainai hereva momokani ena uhe oi hadoa bena murinai oi dairia bona oi naria, a?—1 Kor. 3:9.
3 Basileia sivaraina ita harorolaia bona kamonai taudia ita davaria neganai, namona be ita ura idia dekenai Bible stadi ita karaia badina idia ita lalokau henidia dainai. Iehova bamona namona be mai lalokau danu ita ura taunimanima ita durua, badina ita diba lauma dalanai idia goada neganai mauri do idia davaria diba. (1 Pet. 2:2) Tubutubu gaudia idia tubu goada totona gau badana be ranu idia abia hanaihanai, unai hegeregerena, Basileia ena sivarai idia kamonai henia matamaia taudia be maoromaoro hebou dekenai do idia mai lasi, to bema hanaihanai idia dekenai Bible stadi ita karaia bona ita durudia Dirava ena orea idia laloa bada totona, do idia ura hebou dekenai idia mai.
4 Dirava ena hereva ita badinaia danu be gau badana. Iesu ia gwau hereva momokani idia abia dae taudia ese iena hereva idia kamonai henia. (Ioane 18:37) Ia ese ena hahediba taudia ia haganidia haroro bona hahediba gaukara do idia karaia totona, bona idia ia hadibaia unai gaukara do idia karaia namonamo totona. Ia be hahediba tauna namona bona ia ura dikadika taunimanima ia durudia, unai dainai, taunimanima ita durudia dalana ena haheitalai namona ia hahedinaraia ita tohotohoa totona. (Luka 6:40; Ioane 13:13; 14:12) Bema ita hekwarahi noho do ita mauri bona ita hadibaia taudia ita durua do idia mauri totona danu.—1 Tim. 4:16.
DURUA GAUDIA BIBLE STADI HAMATAMAIA TOTONA
5 Ena gaukara do ia karaia namonamo totona, diba momo gaukara tauna ese gaukara gaudia idauidau do ia gaukaralaia. Ita be hahediba karaia taudia, bona ita gaukaralaia buka bona magasin be idauidau momo. Buklet bona pepapepa danu be gaukara gaudia namodia. Ena be taunimanima edia mauri dalana bona edia lalohadai be idauidau, to unai gaudia ese ita idia durua hereva momokani edia kudouna dekenai ita atoa totona.
6 Pablisa haida be pepapepa bona buklet idia gaukaralaia dainai, nega momo taunimanima danu Bible ena hereva idia kikilaia hamatamaia diba. Haheitalai ta be inai: Mauri mai Mainona Tanobada Matamatana Lalonai pepapepana lalonai, Bible siri idauidau 20 bona ma haida idia noho unai helaro namona hamomokania totona. Unai siri ita gaukaralaia diba taunimanima danu Bible ena sivarai ita kikilaia hebou totona. Iseda buklet edia toana idia namo bona edia hereva idia auka lasi, to idia danu be heduru namodia taunimanima be Bible ena hahediba herevadia idia diba totona, bona edia lalona ia doria unai bamona hereva ma haida do idia tahua totona.
7 Idia sikuli bada lasi eiava edia matana idia namo lasi taudia haida oi diba, a? Oi ese Mauri Hanaihanai Tanobada Dekenai Oi Abia! buklet oi gaukaralaia toho idia ta dekenai Bible ena sivarai umui kikilaia noho totona, a? “Itaia!” buklet be gaukara gauna namona ta danu, ena paragraf ginigunadia ese taunimanima edia lalona idia veria Dirava ena dina vairai gwauhamatana idia diba totona. Lagani 1982 ai, English gado dekenai, bona lagani 1983 ai, Motu gado dekenai Mauri Hanaihanai Paradaiso Lalonai buka idia halasia, bona unai lagani amo ia mai hari, idia bapatiso taudia 1,700,000 bona ma haida amo unai buka ese momo ia durudia.
Hadohado bona Dairia Gaukarana Hahediba Taudia Karaia Dalana
(Kahana 2)
KAMONAI TAUDIA DURUDIA NAMONAMO
1 Teritori dekenai oi davaria kamonai taudia oi durudia namonamo eiava lasi oi diba totona, namona be oiemu Publisher Record Card oi itaia. Ia ore hua 12 lalonai buka, buklet, bona magasin hida oi hariharilaidia? Unai gaudia oi hariharilaidia sibona, a? Eiava unai hadohado gaukara murinai ma kara ta oi karaia, a? Iseda buka eiava magasin idia abia badina idia ura idia duahia taudia be hida oi davaria lou? Oi hadoa uhena ia tubu eiava lasi oi itaia totona oi giroa lao, a? Unai uhena oi dairia bona guriguri amo Iehova oi noia ia hatubua totona, a? Kara 16:14 bona 2 Tesalonika 3:1 oi itaia.
2 Reana oi be lou-henia oi karaia lasi, eiava ta dekenai Bible stadi ta oi do karaia lasi, badina oi laloa oi do hegeregere lasi unai gaukara oi karaia totona. Ena be emu aonega ia hegeregere unai gaukara oi karaia totona, to reana emu lalona oi hadaia momokani lasi do oi karaia totona. Iehova ese iena taunimanima ia siaia gaukara ta idia karaia totona, to idia ia siaia kava lasi, gaukara gaudia idia ia henia bona idia ia hadibaia namonamo guna. Iena Hereva helagana amo bona iena orea dekena amo ia ese ita ia hadibaia “kara namodia ibounai” do ita karaia totona. (2 Tim. 3:16, 17; 2 Kor. 3:5, 6) Dirava ese iena lauma helaga amo, idia printaia revareva amo, ita idia hadibaia herevadia amo, haheitalai platfom dekena amo, bona mai edia aonega bona mai edia abidadama bada tadikakadia amo, heduru ia henia ita dekenai. Bible stadi karaia totona sikuli ena edukeisini bada ita abia be anina lasi. Iehova ena orea dekena amo lauma dalanai edukeisini hereadaena ita ia henia, bona unai hereva ita badinaia be gau badana.—Kara 4:13 oi itaia.
3 Iseda Basileia Gaukara pepana, Haroro School, Hesiai Hebou, bona ma dala haida amo ita idia hadibaia neganai, ita ibounai ese unai hereva ita badinaia be gau badana. Aposetolo Paulo ese Heberu Keristen taudia ia hereva auka henidia, ia gwau: “Nega ia ginidae vadaeni, umui be hadibaia taudia do umui halaoa totona. To umui be do diba maragi taudia. Unai dainai tau ta ese Dirava ena hereva, diba hamatamaia gaudia umui dekenai ia hadibaia lou be namo.” (Heb. 5:12) Bema tau ta be lagani momo lalonai gaukara ta ia karaia, taunimanima idia laloa unai tau ese ena gaukara gaudia gaukaralaia dalana ia diba. Bema ita ura momokani bona ita hekwarahi bada, unai ese ia hahedinaraia ita ura iseda diba Bible kikilaia dalana dekenai ita habadaia noho.—Her. 12:24; 22:29.
4 Basileia ena sivarai idia ura kamonai henia taudia dekenai ita giroa lao bona Bible ena sivarai ma ta do ita kikilaia totona, iseda nega ita haorea bona ita hekwarahi. To namona be ita laloaboio lasi, Iehova ena lalokau bona ena hebogahisi dainai ita be hereva momokani dekenai ita vareai. Hereva momokani do ita diba totona, taunimanima ta ese mai haheauka danu hora momo ia negea ita ia hadibaia totona. Ia hegeregerena, namona be lalokau ese ita ia doria dainai nega ita atoa, bona unai nega ita gaukaralaia hahediba taudia do ita halaoa ena gaukara badana ita karaia totona.—2 Kor. 5:14, 15; Ef. 5:15, 16.
5 Raskol momo lasi gabudia dekenai, kongregesen haida ese Society ena hereva idia badinaia bona adorahi kahanai haroro gaukara idia karaia. Adorahi kahana be nega namona kamonai taudia ita lou henidia totona. Kamonai tauna danu Bible ena sivarai kiki hebou namonamo lou totona, gau badana be guna umui kikilaia herevana, ena ladana, ruma ena namba bona ia abia bukana oi torea ruma ta ruma ta rekod pepana eiava noutbuk dekenai. Namo lasi pepa ta dekenai unai sivarai oi torea bena buka eiava Bible dekenai oi atoa bona oi laloaboio. Pura haida murinai unai gabu dekenai oi haroro lou neganai bona unai tau oi laloatao dainai oi lou henia be reana hegeregere lasi, badina Satana ena hesiai tauna ta be mai ena nega bada unai tau ia vadivadi henia totona. Unai bamona tauna ia ura dikadika kamonai tauna ena kudouna dekenai oi hadoa uhena ia kokia. (Luka 8:12) Namona be Satana ena kara oi koua totona oi giroa lou haraga, ani? Bema unai gaukara ena maduna oi huaia namonamo bona unai gaukara oi moalelaia, idia dekenai do oi giroa lou haraga.—1 Kor. 9:16, 23.
Hadohado bona Dairia Gaukarana Hahediba Taudia Karaia Dalana
(Kahana 3)
1 Bible stadi ta hamatamaia totona oi be kara idauidau momo do oi karaia lasi. Nega haida bema taunimanima oi nanadaia, idia ura Bible stadi idia abia. To, pablisa momo idia ura lasi stadi herevana idia gwauraia haraga, to sisina sisina Bible ena sivarai idia kikilaia bona gabeai Bible stadi idia hamatamaia.
2 Taunimanima oi lalokau henidia bona oi ura dikadika oi durudia be gau badana. Oi hegaegae namonamo danu be gau badana. Unai anina be guna kamonai tauna danu umui kikilaia herevana oi laloa lou, bona ia dekenai do oi giroa lao neganai edena Bible sivarai do oi kikilaia oi laloa danu. Namona be dahaka do oi hereva oi lalohadailaia hegaegae. Reana Bible siri ma haida do oi abia hidi diba bona guna umui herevalaia herevana dekenai do oi hakapua diba, ani? Eiava bema unai kamonai tauna ese guna pepapepa ta eiava buka ta ia abia, unai oi kehoa diba bona paragraf rua eiava toi umui kikilaia diba, ani? Eiava guna ia ura kamonai henia sivaraina ena hereva ma haida do oi kikilaia diba. Nega ginigunana oi giroa lao neganai, namona be miniti 10 eiava 15 sibona do umui kiki hebou. Bema ia kamonai noho, sisina sisina unai nega do oi halataia diba. Bema oi stadi henia tauna ena kara toana oi itaia namonamo, do oi diba dahaka do oi karaia bona oi diba ia dekenai stadi ena lata be edena daudau oi karaia be ia namo.
3 Stadi karaia dalana oi diba totona, namona be Kongregesen Buka Stadi idia karaia dalana oi itaia namonamo. Buka stadi dekenai do idia karaia paragraf edia namba idia torea hegaegae, to Bible stadi dekenai do umui kikilaia paragraf edia namba be unai bamona lasi, unai dainai stadi tauna ena diba bona ura hegeregerena paragraf umui kikilaia diba. Danu, haroro naria tauna eiava idia manada vadaeni pablisa bona pioneer taudia idia ura oi idia bamoa Bible stadi oi karaia neganai, bona stadi oi karaia namonamo totona idia ese heduru hereva oi idia henia diba.
4 Taunimanima ita durudia toho neganai, ita diba Iehova dekenai ita tabekau be gau badana. Unai dainai, ia dekenai ita guriguri henia, kamonai tauna ta do ita davaria bona ita stadi henia totona, bona ita davaria vadaeni kamonai taudia do idia goada idia lao totona. Namona be iseda lalohadai be aposetolo Paulo ena lalohadai hegeregerena, ia ese Pavapava Agripa ia haroro henia neganai, ia gwau: “Nega kwadogi eiava daudau be herevana, to Dirava vairanai lauegu ura tamona be inai, oi bona egu hereva idia kamonai taudia ibounai be lau hegeregere do umui lao.” (Kara 26:29) Ena be nega kwadogi eiava nega daudau heduru idia abia, to Paulo ia ura ena hereva idia kamonai henia taudia be Keriso ena hahediba taudia korikori ai do idia lao.
5 Bible stadi ita karaia neganai, ita ese “Dirava ena hariharibada Sivarai Namona do [ita] gwauraia hedinarai.” (Kara 20:24) Reana taunimanima momo be dibura do idia rakatania, diari dekenai do idia giroa, Satana ena siahu do idia rakatania bona Dirava dekenai do idia giroa. (Kara 26:18) Ita ta ta ibounai be Iehova ena gwauhamata bona bapatiso hesiai taudia, unai dainai gau badana be hadohado gaukara do ita karaia, bena murinai taunimanima ita lou henidia Bible ena sivarai ita kikilaia totona bona hanaihanai idia dekenai Bible stadi ita karaia, unai amo ita hadoa uhena do ita dairia. Ita moale bada taunimanima be hahediba taudia ai idia lao neganai, bena murinai ita danu do idia gaukara bona haida idia durua Iesu Keriso ena hahediba taudia ai idia lao totona.
[Questions for Part 1]
1, 2. (a) Hahediba taudia karaia daladia toi be dahaka? Daidia ese unai gaukara ena karaia daladia ginigunadia rua idia karaia? (b) Iehova ena ura ita karaia totona ita ta ta ibounai be dahaka do ita karaia?
3. (a) Petero Ginigunana 2:2 ena hereva hegeregerena ita ta ta ibounai be dahaka do ita karaia mauri hanaihanai do ita abia totona? Dahaka ita karaia taunimanima durudia totona? (b) Nega momo, dahaka ese taunimanima ia durudia Kingdom Hall dekenai idia mai idia hebou totona?
4. (a) Iesu Keriso ena hereva ita kamonai henia totona, ita ta ta ibounai be dahaka do ita karaia? (b) Iesu be haheitalai namona ita tohotohoa totona; taunimanima ita durudia totona Iesu ese haheitalai ia karaia be Bible ena siri amo oi hamomokania.
5. Diba momo gaukara tauna bona hahediba gaukara ia karaia tauna be edena dala dekenai idia hegeregere?
6, 7. Hahediba taudia namodia ese idia gaukaralaia namonamo gaudia haida be dahaka? Edena negai unai gaukara gaudia ta ta do ita gaukaralaia diba?
[Questions for Part 2]
1. (a) Dahaka dainai ita ta ta eda Publisher Record Card ita itaia be namo? (b) Oi itaia murinai, oi sibona dekenai dahaka henanadai do oi henia be namo?
2. (a) Timoteo Iharuana 3:16, 17 bona 2 Korinto 3:5, 6 oi duahia. Vadaeni, edena dala rua amo Iehova ese ita ia durua kamonai taudia ita hadibaia namonamo totona oi gwauraia. (b) Witness taudia namodia ai do ita lao totona, edena bamona edukeisini do ita abia be namo? (c) Edena edukeisini do ita abia ena namo be bada lasi?
3. (a) Lagani momo lalonai tau ta ese gaukara ia karaia neganai, taunimanima idia laloa ia be dahaka ia karaia diba? (b) Heberu Keristen taudia dekenai dahaka ia vara? (c) Dahaka do ita karaia ita dekenai unai bamona do ia vara garina?
4. (a) Namona be lalokau ese ita ia doria dahaka ita karaia totona? (b) Korinto Iharuana 5:14, 15 oi duahia. Keriso Iesu ese ita ia lalokau henia dainai, mai ena ura danu dahaka ia karaia?
5. (a) Luka 8:12 ena hereva hegeregerena, dahaka kara ta do ita karaia lasi neganai Satana do ita durua? (b) Korinto Ginigunana 9:16, 23 ena hereva hegeregerena Paulo ena lalohadai haroro gaukara dekenai be dahaka?
[Questions for Part 3]
1, 2. (a) Pablisa taudia be Bible stadi idia karaia namonamo totona, dahaka gau haida do idia laloa hegaegae be namo? (b) Nega ginigunana eiava iharuana kamonai tauna dekenai stadi ita karaia neganai, dahaka dainai ena kara toana ita itaia namonamo be gau badana?
3. Bible stadi oi karaia namonamo totona edeseniai heduru do oi abia diba?
4. (a) Paulo ese haroro gaukara ia karaia neganai iena ura be dahaka? (b) Iseda Bible stadi taudia dainai iseda guriguri be dahaka?
5. (a) Ita be pablisa taudia dainai, iseda maduna be dahaka? (b) Bema iseda gaukara ita karaia namonamo neganai, dahaka dainai do ita moale?