Iseda Hesiai Gaukarana—Lalokau Momokani Hahedinaraia Karana Ta
1 Iseda hesiai gaukarana amo taravatu hereadaedia ruaosi kamonai henia karana ita hahedinaraia. (Mat. 22:37-39) Iseda lalokau Iehova dekenai ese ita ia doria iena namo ita herevalaia totona. Iseda lalokau iseda dekena taudia dekenai ese ita ia doria idia ita hagoadaia Dirava ena ura bona kara ena diba idia tahua totona. Unai amo idia be, ita bamona, Iehova idia lalokau henia bona mauri hanaihanai ena ahuna do idia abia dalana ai idia vareai diba. Vadaeni, iseda hesiai gaukarana amo Iehova ena ladana ita abia isi bona iseda dekena taudia dekenai Basileia ena helaro namo hereana ita hadibaia. Oibe, iseda hesiai gaukarana be Dirava bona taunimanima dekenai lalokau momokani hahedinaraia karana ta.
2 Iseda lalokau ese ita ia doria taunimanima idauidau gabu idauidau dekenai, ita hereva henidia totona. (1 Kor. 9:21-23) Haheitalai ta be inai: Keristani elda ta be peleini dekenai Roman Katolik pris tauna badibadinai ia helai. Unai elda ese mai hemataurai ida henanadai haida amo pris tauna ena lalona ia veria ia hereva totona, bena Basileia ia herevalaia. Unai pris tauna be peleini amo ia diho neganai, ia be iseda buka rua ia abia vadaeni. Unai elda ese lalokau momokani iena dekena tauna dekenai ia hahedinaraia dainai namo ia davaria!
3 Lalokau Momokani ese Ita Ia Doria Ita Haroro Totona: Heduru bona ful-taim painia gaukarana idia karaia taudia ese edia lalokau momokani Dirava bona edia dekena taudia dekenai idia hahedinaraia. Painia taudia be hanaihanai edia nega bona goada idia gaukaralaia lauma dalana ai ma haida idia durua totona. Dahaka ese idia ia doria unai idia karaia totona? Painia ta ia gwau: “Lau diba lalokau be Dirava ena lauma ena huahua ta. Bema lalokau be lasi, lau be hereva momokani lalonai lau noho lasi, bona lauegu painia gaukarana dekenai lau kwalimu diba lasi. Lalokau ese lau ia durua taunimanima bona edia dabu gaudia lau laloa totona, bona lau diba taunimanima ese lalokau idia laloa bada.” Iesu ese unai bamona lalokau taunimanima dekenai ia hahedinaraia. Nega ta, ia bona iena hesiku hahediba taudia be “laga-ani sisina” totona gabu ta dekenai idia lao neganai, taunimanima hutuma be unuseniai idia ginidae guna. Iesu ese dahaka ia karaia? “Ia bogahisihisi idia dekenai,” bona idia dekenai “mauri sivarai momo ia hadibaia” totona sibona ena ura ia dadaraia.—Mar. 6:30-34.
4 Taunimanima be ita gwauraia sivarai namona idia dadaraia neganai danu, iseda lalona ia moale, badina ita diba lalokau ese ita ia doria dainai, iseda goada hegeregerena idia ita durua hahemauri idia abia totona. Keriso ese ita ibounai ia kota henia neganai, do ita moale bada herea, badina lalokau momokani ita hahedinaraia dainai iseda hesiai gaukarana ita hagugurua.—2 Tim. 4:5.