Taunimanima Edia Lalona Veria Totona Hereva Namodia Oi Abia Hidi
1 Peva idia gaukaralaia taudia be edia diba idia poinia namonamo hegeregerena, kongregesen pablisa taudia bona painia taudia momo be edia teritori dekenai idia noho taudia edia lalona idia veria totona, Gima Kohorona bona Awake! magasin edia hereva haida idia abia hidi bona idia gaukaralaia namonamo dainai anina namona idia moalelaia. Idia laloa guna edena bamona taudia be unai magasin ena hereva do idia ura idia duahia. Edena bamona unai idia karaia?
2 Gau ginigunana be idia ese magasin ta ta ena hereva ibounai idia duahia. Bena sibona idia nanadaia, Unai hereva ta ta be edena bamona taudia edia lalona do ia veridia? Bena idia gaukara goada unai hereva do idia ura idia duahia taudia idia vadivadi henia totona. Idia laloa taunimanima momo edia teritori dekenai be magasin ta do idia ura henia bada neganai, unai magasin ma haida idia oda.
3 Iseda Magasin Idia Matauraia Bada: Iseda magasin sabskripsen ia abia tauna ta, Nigeria ena intenesenel magasin badana totona ia gaukara tauna, be Awake! ia herevalaia, ia gwau: “Tanobada ibounai lalonai taunimanima totona hereva idauidau ia herevalaia magasin hereadaena umui karaia dainai, umui lau hanamoa.” Iseda magasin ia duahia loulou tauna ta ia gwau: “Idia be dava bada nadidia bamona, edia aonega herevadia be gau namo hereadia! Inai [magasin] edia rau lalonai be lau ura henia hereva iboudiai idia herevalaia.”
4 Magasin be gau idauidau momo idia herevalaia, Baibel, tanobada dekenai idia vara gaudia, ruma bese idia lalo-hekwarahilaia gaudia, taunimanima edia hekwakwanai, histori, saiens, animal bona tubutubu gaudia be idia herevalaia gaudia haida sibona. Momokani, tau ta be magasin ta do ia ura ia duahia bema ena ura gaudia, ena mauri dalana, eiava ena gaukara ia herevalaia. Ita be taunimanima idauidau momo ita hereva henia, bona ta ta be mai edia ura gaudia bona hekwakwanai dainai, ita hedavari henia taudia edia lalona do idia veria herevadia ita abia hidi be namo.
5 Mani oi itaia dahaka ia vara Witness taudia rua be niuspepa ia torea tauna dekenai September 8, 1996, Awake! idia hariharilaia neganai. Ia gwau: “Lau ura lasi herevana lau do gwauraia lasi neganai, idia ta ia gwau: ‘Hereva ta be American Indian taudia ia herevalaia. Ai diba oi be unai hereva oi torelaia momo.’ ” Ia ese unai magasin ia abia bona daba aniani ia ania neganai, Indian taudia ia herevalaia herevana ia duahia, bona gabeai ia gwau “ia be namo herea” bona “ia herevalaia mai ena momokani ida.”
6 Dahaka ese Oiemu Teritori ai Idia Noho Taudia Edia Lalona Ia Veria?: Idia hanaia hua haida lalonai, magasin lalonai edena hereva oi itaia vadaeni bona oi laloa reana idia ese emu teritori dekenai idia noho sitoa naria taudia bona bisinesi taudia, eiava emu dekena taudia, gaukara taudia, bona sikuli taudia edia lalona do idia veria? Edena hereva ese loea taudia, sikuli ena hadibaia taudia, ruma bese bona sikuli sisiba henia taudia, matamata taudia idia sisiba henia taudia, heduru gaudia idia henia taudia, bona doketa taudia edia lalona do idia veria? Magasin ta ta oi itaia neganai, do oi haroro henia taudia oi laloa noho, unai ese dala namodia do ia kehoa hereva momokani oi harorolaia totona.
7 Gima Kohorona eiava Awake! ta ena hereva ia laloa bada bona ia abia dae tauna ta oi davaria neganai, reana inai bamona oi hereva diba: “Gabeai do lau abia magasin lalodiai bema hereva ta ia noho bona lau laloa do oi ura oi itaia, mai moale ida kopi ta do lau mailaia oi dekenai.” Reana unai tauna ena ladana do oi torea emu magasin henia loulou listana dekenai, bona nega ta ta ai magasin matamatadia do oi mailaia ia dekenai. Unai hegeregerena, tadikaka haida be inai bamona taudia idia davaria, idia ese iseda magasin lalonai gau tamona idia herevalaia herevadia idia ura duahia, bona idia gwau magasin dekenai idia hedinarai neganai, oi lou henia be namo.
8 Lauma Tahua Gauna Oi Abia: Lagani haida gunanai, ia ura bada moni gaukarana ia karaia tauna ta ese ia ura henia herevana ia herevalaia Awake! magasin ta ia abia. To, unai tomadiho ia laloa bada tauna ese Gima Kohorona magasin ia duahia danu, bona iena hereva ta ese ia doria iena mauri ibounai lalonai ia abia dae Toi Tamona herevana ia tahua namonamo totona. Hua 6 murinai bapatiso ia abia! Unai dainai, iseda magasin idia duahia taudia ida Baibel ita herevalaia mai gari lasi danu be namo. Reana Dirava Ia Ura Dahaka Ita Karaia? buklet oi hariharilaia diba, bona oi gwau magasin matamatadia oi mailaia negadia ta ta ai, miniti haida sibona do oi gaukaralaia buklet amo kahana tamona oi herevalaia totona.
9 Oi laloa namonamo daidia, emu lou henia bona bisinesi taudia amo, be Gima Kohorona bona Awake! magasin matamatadia do idia ura idia abia. Bena gaukara goada, idia oi davaria totona. Oi davaria diba taunimanima iboudiai dekenai inai magasin namodia oi henia toho. Bona inai oi laloaboio lasi, oi hekwarahi taunimanima oi durua iseda magasin idia duahia totona, ‘oiemu aniani be davara ena kopina dekenai oi negea lao.’ Gabeai, hahediba taudia matamata tahua gaukarana dekenai do oi kwalimu.—Had. 11:1, 6.