Magasin Oi Duahidia, A?
1 Misinari tauna ta bona ena adavana Africa dekenai be inai bamona iseda magasin idia herevalaia: “Gima Kohorona ese ai ia durua aiemai teritori lalonai lauma dalanai ai noga noho totona. Magasin ta ta amo heduru bona goada ai abia.” Iseda magasin dekenai unai bamona laloa bada karana oi mamia, a? Bona oi ura dikadika idia oi duahia, a?
2 Magasin ena hereva idauidau, miniti haida sibona lalonai ita duahia diba herevadia, idia hegaegaelaia totona nega bada idia gaukaralaia. Unai oi diba dainai, magasin ena hereva do oi duahia haraga sibona, laulau do oi itaia, eiava nega ta ta sibona emu lalona ia veria herevana ta do oi duahia, a? Ita be mai eda aonega bema kara ma haida danu ita karaia. Namona be nega ita atoa, magasin ta ta edia hereva ibounai ita duahia bona laloa namonamo totona. Gima Kohorona be iseda magasin badana, ia ese nega korikori ai lauma aniani ia halasia. Awake! lalonai taunimanima edia lalona idia veria bona diba idia henia herevadia idauidau idia noho. Unai magasin duahiduahi karana amo ita dibaia gaudia ese lauma dalanai ita ia hagoadaia sibona lasi, to ita idia hegaegaelaia haroro gaukara ita karaia namonamo totona. Bema hanaihanai magasin ita duahidia, taunimanima ma haida dekenai mai goada ida do ita hariharilaidia.
3 Duahiduahi Goadalaia Karana Hanamoa Dalana: Sibona emu sediual magasin duahiduahi totona oi hanamoa diba, a? Taunimanima momo idia badinaia heduru herevadia rua be inai. (1) Duahiduahi sediual oi karaia. Bema dina ta ta ibounai miniti 10 eiava 15 sibona oi atoa duahiduahi totona, do oi hoa badina wiki tamona lalonai gau momo herea oi duahia diba. (2) Oi duahia vadaeni gaudia edia ladadia oi laloatao totona dala ta oi badinaia. Reana oi duahia vadaeni hereva ena matamaia kahana dekenai inai maka ✔ oi torea diba. Bema unai oi karaia lasi, hereva haida eiava magasin ta oi reaia diba. Gau badana be oi totona ia hegeregere duahiduahi sediual oi karaia bona oi badinaia.—Filipi 3:16 itaia.
4 “Hesiai tauna mai ena kamonai, bona mai ena kara maoromaoro” ese mai aonega ida taunimanima idia durua momokani herevadia idia halasia. (Mat. 24:45) Momokani, unai magasin ese iseda mauri idia hanamoa. Lauma dalanai ita tubu karana be iseda tiokratik duahiduahi goadalaia karana ena namo hegeregerena. Magasin iboudiai idia duahia totona nega idia atoa taudia be lauma dalanai hahenamo bada do idia abia.