Kongregesen Idia Hakaua Taudia—Haroro Naria Tauna
1 Haroro naria tauna be kongregesen ena teritori lalonai haroro gaukara ibounai ena heau dalana ia laloa bada. Unai dainai ia ese dala badana ai ita ia durua sivarai namona ita harorolaia ena maduna ita huaia totona. Ia be haroro goadagoada tauna ta dainai, haroro ena gaukara ibounai ia hegaegaelaia bona ia gunalaia. Ia be hadibaia tauna namona dainai, ia ese pablisa ta ta ia durua edia haroro gaukara karaia dalana idia hanamoa totona.—Ef. 4:11, 12.
2 Inai elda ese buka, magasin, bona teritori idia naria hesiai taudia edia gaukara ia biagua. Ia be hua ta ta ibounai ia itaia bema buka, magasin, bona haroro gaukara ena fom idauidau edia momo be hegeregere ita gaukaralaia totona. Nega tamona lagani ta ta ai ia ese teritori ena faila ia sekea, idia ura lasi edia ruma dekenai ita lao taudia edia adres ia abia, bena idia manada tadikaka dekenai unai adres ia henia, unai ruma idia vadivadi henia totona.
3 Haroro naria tauna be haroro gaukara ena dala idauidau ia biagua, bisinesi gabudia ai, dala dekenai, bona telefon amo danu. Ia ese pura lalonai bona holide negadia danu haroro gaukara ena grup namodia ia hegaegaelaia. Baibel stadi gaukara ia laloa bada. Dala idauidau ia tahua hua ta ta sibona ai idia haroro eiava idia haroro lasi tadikaka be lauma dalana ai ia durudia totona. Ia ese painia taudia edia gaukara ia laloa bada danu, bona ia ese Painia Taudia ese Ma Haida Idia Durua gaukarana ia naria.
4 Haroro naria tauna be Kongregesen Hesiai Komiti ena elda ta, bona bema Kongregesen Buka Stadi idia haidaua be namo ia ese unai ia gwauraia. Ia be emu buka stadi ia vadivadi henia neganai, namona be oi noho bona ia ida haroro gaukara oi karaia.
5 Namona be kongregesen taudia iboudiai be mai edia ura ida haroro naria tauna ena hakaua dalana ida idia gaukara hebou. Unai ese ita ia durua hahediba taudia halaoa gaukarana dekenai anina ita havaraia bona iseda hesiai gaukara do ita moalelaia.