Kongregesen Ena Buka Stadi
Kahana 5: Haroro Naria Tauna Ena Vadivadi
1 Haroro naria tauna be sivarai namona harorolaia tauna bona hahediba karaia tauna be namo. Iena maduna badana ta be kongregesen taudia ia durudia edia teritori dekenai sivarai namona harorolaia bona hadibaia gaukarana idia hagugurua totona. (Mar. 13:10) Iena gaukara maduna ia laloa bada neganai bona pablisa taudia iboudiai be ia danu idia gaukara hebou neganai, edia diba sivarai namona harorolaia dalana dekenai do idia habadaia bona edia teritori dekenai do idia haroro namonamo diba.
2 Haroro naria tauna ese tadikaka bona taihu ia hagoadaia edia haroro gaukara do idia habadaia totona. Kongregesen Buka Stadi be gabu badana unai bamona ia karaia totona. Vaia, haroro naria tauna be buka stadi grup ta ia naria danu, to hua ta ta iboudiai nega tamona do ia lao ma buka stadi ta dekenai, unai neganai iena heduru tauna ta ese haroro naria tauna ena buka stadi do ia naria.
3 Hegaegae Ena Vadivadi Totona: Haroro naria tauna ese buka stadi grup ta dekenai ia do vadivadi henia lasi neganai, namona be unai buka stadi dekenai idia lao taudia edia Kongregesen ena Pablisa Rekod Kadi do ia sekea namonamo guna. Danu, namona be unai buka stadi ia naria tauna ida do ia hebou iena buka stadi dekenai idia lao taudia edia haroro gaukara idia kikilaia totona. Bema haroro gaukara dekenai hekwakwanai haida idia noho, to Rekod Kadi dekenai unai hekwakwanai idia hedinarai lasi, buka stadi naria tauna ese haroro naria tauna do ia hadibaia. Haroro naria tauna ese buka stadi naria tauna ia hadibaia ia vadivadi purana neganai stadi ena lata be miniti 45 sibona, badina murinai, haroro naria tauna ese miniti 15 lalonai hereva kwadogina ta do ia henia.
4 Unai hereva ese tadikaka bona taihu do ia durudia edia haroro gaukara idia laloa bada totona. Bema pablisa haida ese edia haroro gaukara ena kahana ta dekenai idia manoka, namona be haroro naria tauna ese idia badinaia diba heduru herevadia ia henidia. Namona be idia ia hagoadaia hereva namodia ia henidia, ia ura lasi ena hereva dainai idia hemarai eiava idia lalohisihisi. Unai neganai iena vadivadi be anina lasi. Namona be iena hereva ese tadikaka bona taihu iboudiai ia hagoadaia edia gaukara idia hanamoa totona.
5 Haroro naria tauna be ia goada karaia tadikaka bona taihu momo ia durudia totona. Ia ese nega ia atoa tadikaka bona taihu idauidau danu idia haroro hebou totona. Ruma ta ruma ta gaukara dekenai pablisa taudia ia bamodia neganai, reana ia ese heduru hereva namodia ia henia diba edia haroro dalana idia hanamoa totona. Namona be hekokoroku lasi dalanai idia ia hadibaia bona ia hahedinaraia ia ura dikadika ia durudia. Danu, reana ia ese pablisa taudia do ia bamodia edia lou-henia bona edia Bible stadi dekenai. Bema ia laloa unai grup taudia haida ese heduru ma haida do idia abia be namo, reana unai pura lalonai edia ruma dekenai do ia lao ma ia durudia totona. Murinai, ia ese stadi naria tauna do ia hadibaia dahaka heduru herevadia ia henidia. Guna, haida ese edia haroro gaukara dekenai idia manoka idia lao, to unai bamona heduru herevadia idia abia neganai haroro gaukara ma idia goadalaia lou.
6 Haroro Totona Idia Hebou: Unai pura lalonai, haroro totona idia hebou neganai, haroro naria tauna ese unai hebou do ia naria. Ena be reana haida idia do mai lasi, to namona be nega korikori dekenai hebou do idia kehoa. Unai hebou edia nega ena lata be miniti 10 eiava 15 sibona. Dina ena siri do idia karaia eiava do idia karaia lasi be idia sibodia edia ura. Hebou idia do koua lasi neganai, namona be iboudiai idia diba edeseniai do idia haroro bona idia diba daika do idia bamoa. (1 Kor. 14:33, 40) Haroro naria tauna ese iboudiai do ia hagoadaia idia lao haraga haroro gaukara do idia karaia totona.
7 Haroro naria tauna be buka stadi grup ia vadivadi henidia noho karana be hahenamo bada kongregesen dekenai. Ia vadivadi negana lalonai bema ia danu ita gaukara hebou, iseda haroro gaukara be heiriheiri lasi bona do ita karaia namonamo diba. Ma danu, ia ese ena gaukara do ia moalelaia diba. (Heb. 13:17) Mamoe bamona taudia do ita gogodia, bona ita moale badina ita diba idia ura kamonai taudia iboudiai dekenai iseda haroro gaukarana ita hagugurua.—Isa. 61:1, 2; Esek. 9:11; Ioane 17:26.
[Questions]
1. (a) Haroro naria tauna ena dagi gaukarana be dahaka? (b) Haroro naria tauna ese iena mai anina bada gaukarana ia naria namonamo totona, kongregesen pablisa ta ta iboudiai be edena bamona idia durua diba?
2. (a) Haroro naria tauna ena gaukara badana ta be dahaka? (b) Heduru tauna ese haroro naria tauna edena bamona ia durua diba?
3. Haroro naria tauna ena vadivadi totona, namona be ia bona buka stadi naria tauna ese dahaka do idia karaia idia hegaegae totona? Dahaka dainai unai buka stadi ena lata be miniti 45 sibona?
4. (a) Haroro naria tauna ia mai vadivadi ena badina be dahaka? (b) Ena vadivadi murinai namona be pablisa taudia edia mamina be edena bamona?
5. Haroro naria tauna be pablisa danu haroro gaukaradia idauidau idia karaia hebou neganai, iena ura be dahaka? Namona be iena kara be edena bamona?
6. Korinto Ginigunana 14:33, 40 duahia. Haroro naria tauna bona pablisa taudia ese unai sisiba edena bamona idia badinaia diba?