Hebou Dekenai Iseda Haere Karana amo Ta Ta Ita Hagoadaia Heheni
1 Heberu 10:24 ese ita ia hagoadaia ‘ta ta dekenai durua henia daladia do ita laloa noho. Unai bamona lalokau dekena amo kara namodia do ita karaia.’ Unai ena anina be kongregesen hebou dekenai haere namodia ita henia karana amo ita ta ta ita hagoadaia heheni. Dahaka dainai haere ita henia be namo? Edena dala ai unai ita karaia diba? Unai kara amo daidia ese namo do idia davaria diba?
2 Tadikaka haida ese idia auka lasi bona oi lalo-pararalaia diba haere idia henia bena emu diba idia habadaia bona lauma dalana ai oi idia hagoadaia negadia momo, mani oi laloa. Unai bamona oi karaia diba idia totona. Oi haere neganai, oi hahedinaraia oi ura ‘lauma ena goada oi henia,’ hebou dekenai idia lao taudia iboudiai dekenai.—Roma 1:11, 12.
3 Haere Namodia Henia Dalana: Haere latadia, paragraf ena hereva ibounai gwauraia haeredia, oi henia lasi. Nega momo haere latadia ese hereva badana idia hahedinaraia lasi bona reana idia dainai ma haida idia ura lasi haere idia henia. Namona be paragraf ena haere ginigunana be ia kwadogi, bona paragraf ena henanadai ia haerelaia sibona. Bena haere ma haida idia henia tadikaka be edena dala ai unai hereva ita badinaia diba eiava edena dala ai idia noho Baibel siridia be mai anina ita dekenai idia hahedinaraia diba. Haroro School Ena Buka, rau 20, 21 mani oi itaia.
4 Bema haere henia karana dainai oi gari, haere kwadogina ta oi hegaegaelaia, bona unai kahana ia naria tadikaka oi noia oi do ia boiria unai paragraf oi haerelaia totona. Hebou haida dekenai unai oi karaia murinai, do oi hekwarahi lasi haere oi henia totona. Oi laloatao, Mose bona Ieremia idia gwau idia hegeregere lasi taunimanima vairanai idia hereva totona. (Eso. 4:10; Ier. 1:6) To Iehova ese idia ia durua ia totona idia hereva, bona oi do ia durua danu.
5 Daidia ese Emu Haere amo Namo Do Idia Davaria? Oi sibona ese namo do oi davaria, badina emu haere ese emu lalona bona kudouna dekenai hereva momokani idia atoa, unai dainai, gabeai unai gaudia oi laloatao be auka lasi. Danu, taunimanima ma haida ese emu hagoadaia haeredia amo namo idia davaria. Bema tadikaka iboudiai, lo taudia, memero eiava kekeni, hemarai taudia, eiava matamata taudia idia hekwarahi kongregesen hebou dekenai edia abidadama idia hahedinaraia totona, ita idia hagoadaia.
6 ‘Nega korikori dekenai, hereva namona ta ita gwauraia be namo’ ia havaraia bema hebou dekenai ita gaukaralaia ta ta ita hagoadaia heheni totona!—Aon. 15:23.