Namona be Ita Vadivadi Loulou
1 Nega ginigunana ta ese oi dekenai sivarai namona ia herevalaia neganai, ena hereva oi kamonai bona oi abia dae, a? Bema lasi, reana oi moale Iehova ena Witness taudia be oi idia vadivadi henia loulou ela bona Baibel stadi oi abia. Oiemu teritori dekenai oi haroro loulou neganai, unai oi laloatao be namo.
2 Taunimanima edia mauri daladia idia idau noho. Hekwakwanai matamatadia bona gau idauidau idia davaria, edia hanua eiava tanobada ena sivarai dikadia idia kamonai, moni dalanai idia hekwarahi, idia gorere eiava edia ruma bese tauna ta ia mase. Reana unai lalohisihisi gaudia idia vara ena badina idia ura diba. Taunimanima edia lalo-hekwarahi gaudia ita lalo-pararalaia be namo, bena heduru herevana ta amo ita hagoadaia.
3 Inai be Hamauria Gaukarana: Dika badana ia vara gabuna dekenai hamauria gaukarana idia karaia taudia, mani oi laloa. Ena be kahana ta dekenai mauri taudia ta ta sibona idia davaria, to unai taudia be edia gaukara idia hadokoa lasi, kahana ma ta ai edia gaukara turadia ese mauri taudia momo idia davaria dainai. Iseda hamauria gaukarana ia do doko lasi. Lagani ta ta iboudiai, ‘hisihisi badana’ amo idia ura idia roho mauri taudia handred tausen momo ita davaria noho.—Apok. 7:9, 14.
4 “Dirava ena ladana idia noinoi henia taudia ibounai, be mauri do idia davaria.” (Roma 10:13-15) Namona be unai hereva ese ita ta ta ibounai ia hagoadaia ita haroro noho totona. Iseda teritori ita karaia matamaia negana amo, natudia idia bada idia lao bona hari idia ese sibona edia vaira negana bona mauri ena badina idia laloa diba. Ita diba lasi daidia do idia kamonai. (Had. 11:6) Guna idia dagedage taudia momo ese hari hereva momokani idia abia dae. Iseda gaukara be taunimanima hahemaoro henidia gaukarana lasi, to dala ita kehoa idia kamonai bona tanobada dikana amo do idia roho mauri totona. Iesu ena hahediba taudia ginigunadia idia karaia bamona, taunimanima dekenai ita “lao hanaihanai,” bona edia ura Basileia sivaraina dekenai ita habadaia toho.—Mat. 10:6, 7, NW.
5 Ita haroro diba dalana ia do kehoa noho ese Iehova ena hebogahisi ia hahedinaraia. (2 Pet. 3:9) Taunimanima ese sivarai namona idia kamonai loulou neganai, Dirava ena lalokau ita hahedinaraia badabada, bona unai dala amo ia ita hanamoa.