Ruma Bese Taudia Idia Gaukara Hebou Dalana—Baibel Idia Stadilaia Namonamo Totona
1 Hereva momokani ese ruma bese ena mauri dalana ia hanamoa bona anina ia havaraia, to Iehova badinaia namonamo karana be do ia vara kava lasi. Lauma dalana ai ruma bese goadana idia havaraia totona, nega idia atoa bona idia gaukara goada be namo. Unai idia karaia totona, gau badana be ruma bese taudia idia gaukara hebou. Inai hereva be kahana toi ena hereva ginigunana bona ruma bese taudia ese stadi karadia namodia idia karaia hebou dalana do ia hahedinaraia.
2 Dina Ta Ta Iboudiai Baibel Duahia Karana Amo: Aonega Herevadia 24:5 ia gwau “diba namona tauna ese, tauanina goada tauna ia hereaia noho.” Nega ibounai Dirava ena Hereva ita duahia karana amo ita abia dibana ese ita ia hagoadaia Satani ese iseda lauma dalana ia hadikaia toho neganai, ita gini goada totona. (Sal. 1:1, 2) Dina ta ta ibounai emui ruma bese taudia danu Baibel umui duahia hebou, a? Haroro Sikuli ena Sediual dekenai, pura ta ta ena “Baibel Duahiduahi Sediual Iharuana” ia noho. Ruma bese ese ia badinaia totona, dina ta ta iboudiai miniti 10 sibona idia atoa diba. Nega namona umui abia hidi, hegeregere daba ai umui aniani neganai, adorahi ai umui aniani murinai, eiava umui do mahuta lasi neganai, Baibel umui duahia bona Dina Ibounai Buka Helaga Tahua bukana amo dina siri umui herevalaia. Namona be dina ta ta iboudiai emui ruma bese lalonai unai bamona umui karaia hanaihanai.
3 Pura Ta Ta Iboudiai Umui Stadi Hebou Karana Amo: Namona be ruma bese ena Baibel stadi be pura ta ta idia karaia karana badana. Namona be ruma bese taudia ta ta be stadi dekenai mai edia ura bada ida idia hereva karana amo stadi idia durua. Namona be ruma bese kwarana ese do idia stadilaia gauna, dinana, negana, bona ena lata ia abia hidi neganai, ena ruma bese edia noho dalana ia laloa namonamo. Namona be emui sediual dekenai ruma bese stadi umui atoa guna. Namo lasi anina lasi gaudia ese emui stadi idia hadikaia.—Fil. 1:10, 11.
4 Tamana ta be taunimanima momo ese bisinesi totona ena ruma dekenai idia rini henia dainai, ruma bese stadi negana ai ena telefon ia kokia. Bema bisinesi taudia be ena ruma dekenai idia mai, idia ia boiria edia stadi lalonai idia helai eiava idia naria ela bona idia haorea. Unai tamana ese ena lalona ia hadaia gau ta ese ena ruma bese stadi do ia hadikaia lasi. Ena natudia ese ena kara idia laloa bada, bona ena bisinesi be ia heau namonamo.
5 Lauma dalana ai ruma bese taudia idia gaukara hebou neganai, moale bada ia havaraia! Mai abidadama ida ita hekwarahi eda ruma bese stadi ita karaia namonamo neganai, Iehova ese ita do ia hanamoa.—Sal. 1:3.