Tanobada Hegegemadai Keriso Ena Mase Ita Laloatao
1 Iehova be ita dekenai harihari gaudia momo herea ia henia. Iena kara namo bona hebogahisi kara iboudiai be inai bamona idia gwauraia: “Hariharibada ia bada herea dainai, . . . tau ta ia gwauraia namonamo diba lasi.” Oibe, “Dirava ena hariharibada” be hereadae momokani dainai ita gwauraia hedinarai namonamo diba lasi.—2 Kor. 9:14, 15.
2 Iena Harihari Gauna Badana: Iesu Keriso, Mauri Davana Karaia Tauna, be harihari gauna badana momokani. Iehova ese iena natuna lalokauna tamona ia henia, tanobada taudia dekenai iena lalokau bada ia hahedinaraia totona. (Ioa. 3:16) Dirava ese unai hariharibada karana ia karaia dainai, tanobada hegegemadai ita laloatao be namo. Edena negai bona edena dala amo? Thursday, April 1, 1999 ena adorahi ai, tanobada hegegemadai Keristani taudia ese Lohiabada ena Anibou hebouna do idia karaia, mai anina bada boubou gauna laloatao hebouna do idia karaia.—1 Kor. 11:20, 23-26.
3 “Ita be do kara dika noho taudia neganai,” Keriso be ita dainai ia mase, bona ita be iena mase laloatao hebouna dekenai ita lao, bona ma haida ita boiria unai mai anina bada hebouna dekenai idia mai neganai, ita hahedinaraia iena mase ita laloa bada.—Roma 5:8.
4 Mai Anina Bada Hebouna: Keriso ena mase ita laloatao karana ese ia hahedinaraia gauna badana be, Iesu be Dirava ena lohia siahuna ia abia isi momokani bona kara dika ta ia karaia lasi. Ita ia hadibaia danu Iesu ena boubou gauna ita abidadama henia neganai, Iehova vairanai ita goeva diba, unai amo hahemauri do ita abia. (Kara 4:12) Momokani, ia be mai anina bada hebouna inai lagani lalonai!
5 Lohiabada ena Anibou hebouna dekenai iseda dekena taudia ita boiridia mai ese ia hahedinaraia idia ita lalokau henia. Mauri davalaia boubouna ena namo bada idia dibaia taudia milioni momo be ia amo namo idia davaria diba. (Fil. 3:8) Keriso ena boubou gauna idia abidadama henia taudia ese mauri hanaihanai ena helaro idia abia diba.—Ioa. 17:3.
6 Memorial hebouna do ita karaia huana be nega namona do ita hahedinaraia Dirava ena hebogahisi ita laloa bada. Unai nega be nega namona Dirava ena Basileia ena sivarai namona ita harorolaia goadagoada totona. Iehova ena hariharibada, ita gwauraia namonamo diba lasi gauna, be mai guriguri danu idia laloa, bona dala idia karaia inai lagani ena Lohiabada ena Anibou hebouna dekenai do idia lao taudia be hahenamo bada do idia abia!