Oi be Ta Ena Toana Oi Laloa, A?
1 Haroro gaukara ita karaia neganai, taunimanima haida edia toana dainai reana idia dekenai sivarai namona do ita harorolaia lasi. Hegeregere, edena bamona do oi karaia bema tau ta be nega ibounai ena dekena tauna oi lou henia neganai oi ia raraia momo mai ena badu danu? Painia taihu ta dekenai unai bamona kara ia vara neganai, ia be maoromaoro ia lao unai tau dekenai bona ia hereva henia. Unai tau be mai ena hemataurai lasi ida taihu ia hanamoa. To, hoa gauna be inai, unai tau ese Baibel ena sivarai ia kamonai bona mai ena moale ida stadi ia abia dae. Unai taihu ese ta ena toana laloa bada lasi karana ia hahedinaraia dainai, dala ia kehoa inai tau bona ena adavana ese hereva momokani idia dibaia.
2 Taihu ma ta be matamanai ia gari badina tauhau ta ena toana be ia namo lasi bona ena huina ia lata dainai, to tauhau be taihu ia gaukara sitoa ia mai negadiai taihu ese ia haroro henia. Ena hekwarahi dainai huahua namona ia havaraia, bona hari unai tauhau be bapatiso Witness tauna ta. Dahaka ese ita ia durua diba bena maoromaoro do ita gwau lasi unai bamona taudia do idia kamonai lasi?
3 Iesu Ena Haheitalai Ita Tohotohoa: Iesu ia diba ena mauri be do ia henia taunimanima ibounai totona. Unai dainai, ia be ta ena toana ia laloa lasi. Ia diba herevana ta ena kara toana be ia namo momokani lasi, to reana mai ena ura ida do ia idau bema heduru namona ia abia bona ena lalona idia hagoadaia. (Mat. 9:9-13) Ia ese taga taudia bona ogogami taudia ia durudia hegeregere. (Mat. 11:5; Mar. 10:17-22) Unai dainai namona be haroro gaukara lalonai ita davara taudia ita hahemaoro henia lasi edia toana dainai, unai kara ese ita ia koua bena reana kudou namo tauna do ita durua lasi. (Mat. 7:1; Ioa. 7:24) Dahaka ese ita ia durua diba Iesu ena haheitalai hereadaena ita tohotohoa totona?
4 Baibel ita stadilaia karana amo, ita abia dae Dirava ena Hereva be mai ena siahu ta ena lalohadai, kara, bona mauri, do ia haidaua. (Ef. 4:22-24; Heb. 4:12) Unai dainai, namona be lalohadai maorona ita abia bona gau ibounai be Iehova, taunimanima edia kudouna ia diba Tauna, ena imana dekenai ita atoa.—1 Sam. 16:7; Kara 10:34, 35.
5 Herevana ta ena toana be edena bamona, to toana ita laloa bada lasi dainai taunimanima idauidau dekenai sivarai namona ita harorolaia karana amo inai nega dokonai gogoa gaukara badana ita durua.—1 Tim. 2:3, 4.