Iehova Ena Hahemaoro Goeva Karana Tohotohoa
1 “Lohiabada ese, kara maoromaoro ia ura henia noho.” (Sal. 37:28) Unai dainai, ena be ia gwau inai tanobada dikana ia hadikaia be namo, to dala ia karaia hadibaia herevana ia henia guna totona. (Mar. 13:10) Unai ese dala ia kehoa taunimanima idia helalo-kerehai bona mauri idia abia totona. (2 Pet. 3:9) Ita hekwarahi Iehova ena kara maoromaoro eiava hahemaoro goeva karana ita tohotohoa totona, a? Taunimanima idia hisihisi ese ita ia veria ma haida dekenai Basileia ena helaro ita harorolaia totona, a? (Aon. 3:27) Hahemaoro goeva karana ita ura henia ese ita do ia hagoadaia haroro gaukara ita goadalaia totona.
2 Ta Ena Toana Laloa Lasi Bona Haroro: Taunimanima edia toana ita laloa lasi to ibounai dekenai Dirava ena ura ita harorolaia neganai, ita be hahemaoro goeva eiava ‘kara maoromaoro ita karaia.’ (Mika 6:8) Ita be goevadae lasi taudia, to ma haida edia toana dainai ita hahemaoro henia karana ita dadaraia be namo. (Iam. 2:1-4, 9) Iehova “ia ura taunimanima ibounai ese mauri do idia davaria, bona hereva momokani do idia diba.” (1 Tim. 2:4) Dirava ena hereva momokani ese taunimanima edia mauri ia haidaua momokani diba. (Heb. 4:12) Unai ita lalo-pararalaia karana ese ita ia veria diba mai gari lasi ida taunimanima ta ta ita hereva henia totona, ena be guna idia kamonai lasi.
3 Taihu ta be ia gaukara sitoa dekenai hanaihanai ia mai kastoma ta ena toana dainai ia gari. To, dala ia kehoa neganai, taihu ese Dirava ia gwauhamatalaia Paradaisona be unai tauna dekenai ia harorolaia. Unai tau be maoromaoro ia gwau, ia be gori sivaraidia ia abia dae lasi bona ia be drag ia ania momo tauna. To taihu ia hesiku lasi. Dina ta ai, unai tau ese taihu ia nanadaia dahaka ia laloa ena huina dekenai, vadaeni aonega dalanai taihu ese Baibel ia gwauraia gauna ia herevalaia. (1 Kor. 11:14) Unai dina murinai, taihu ia hoa bada badina unai tau ese ena besoso ia seivia bona ena kwarana huina be kwadogi! Ia be Baibel stadi totona ia noinoi dainai, taihu ese dala ia karaia bena tadikaka ta ese mai moale ida ia stadi henia, bona unai tau ia goada ia lao ela bona ia gwauhamata bona ia bapatiso. Unai tau bamona, hari Iehova idia hesiai henia taudia momo be idia moale badina idia dekenai Basileia ena sivarai idia mailaia taudia be idia edia toana idia laloa lasi bona idia durua loulou.
4 Kahirakahira Iehova ese kara dika taudia ibounai be tanobada amo do ia kokia. (2 Pet. 3:10, 13) Inai nega kwadogina lalonai, ibounai ita durua Satani ena tanobada dikana hadikaia ore negana amo idia roho mauri totona, unai amo ita be Iehova ena hahemaoro goeva karana ita tohotohoa.—1 Ioa. 2:17.