Henanadai Mauana

◼ Kingdom Hall hagoevaia gaukarana be daika ena maduna?

Kingdom Hall ena goeva bona toana namona ese ita harorolaia sivaraina ia hahairaia. (1 Petero 2:​12 itaia.) Kingdom Hall ena toana ia namo bona goeva be gau badana, bona ibounai ese unai gaukara ita durua diba. Namona be ita laloa lasi ia be taunimanima haida sibona edia maduna. Nega momo, Kongregesen Buka Stadi grup iboudiai ese unai hagoevaia gaukarana idia karaia, bona stadi naria tauna eiava iena durua tauna ese idia gunalaia. Bema kongregesen momo be Kingdom Hall tamona dekenai idia hebou, elda taudia be unai gauna do idia herevalaia hebou bena kongregesen iboudiai ese unai gaukara do idia durua diba.

Edena bamona unai maduna do ita huaia namonamo diba? Namona be sediual hegeregerena Kingdom Hall do ita hagoevaia loulou. Hagoevaia totona muramura bona kohu idia noho be gau badana. Namona be do ita karaia gaudia edia lista idia torea hedinarai, gaukara taudia ese idia itaia totona. Reana lista rua idia torea, ta be hebou negadia ta ta murinai ita hagoevaia haraga diba gaudia totona bona ma ta be pura ta ta ai ita hagoevaia namonamo gaudia totona. Namona be buka stadi naria tauna ese sediual ta ia karaia, Kingdom Hall hagoevaia namonamo dina bona nega be hegeregere grup taudia totona. Danu, hanaihanai ava, palaoapalaoa, bona tubutubu gaudia ita naria namonamo. Namona be raka gabudia bona motuka atoa gabudia dekenai momoru ia noho lasi. Lagani ta ta lalodiai, namona be ita ibounai ese gabu ita hagoevaia namo herea, reana Memorial ia do ginidae lasi neganai. Reana unai neganai uindo bona haba ita huria, sea bona ketin ita hagoevadia bona reana foloa ita hagoevaia namonamo.

Momokani, ita ibounai ese maduna ita haharagaia totona, namona be Kingdom Hall ena lalonai eiava murimuri ai PK eiava momoru do ita negea kava lasi. Namona be ita itaia mei rumana ita gaukaralaia negadia ta ta murinai ia goeva noho, gabeai ia mai tauna ese ia gaukaralaia totona. Namona be oi naria namonamo oi gaukaralaia kohu eiava Kingdom Hall dekenai idia noho gaudia oi hadikaia lasi totona. Bema foloa ia paripari, sea, ranu paipa eiava toileti, lamepa, eiava ma gau haida idia dika, Kingdom Hall hanamoa gaukara ia naria tadikakana oi hadibaia haraga be namo.

Namona be ita ibounai be mai iseda ura ida iseda maduna ita huaia. Bena taunimanima ese tomadiho rumana do idia moalelaia bona do ita hahedinaraia ita be goeva taudia bona unai amo Iehova ita hanamoa noho.​—1 Pet. 1:​16.