Dina Iboudiai Iehova Ena Hereva Oi Tahua!
1 Dina ta ta lalonai, hahetoho matamatadia ese emu abidadama idia tohoa. Reana oi diba Witnes lasi tauna ta ese oi ia doria umui loaloa hebou totona. Emu tisa ia ura moni gaukara namona ta do oi goadalaia, eiava emu biaguna ia ura hora momo do oi gaukara. Tauanina dalanai reana oi gorere momo. Ena be ita diba lasi negadia ai unai bamona hahetoho oi davaria diba, to heduru oi abia diba. Iehova be ia noho hegaegae unai hahetoho lalonai do oi gini goada totona oi dekenai aonega do ia henia. Dina Iboudiai Buka Helaga Tahua buklet amo Baibel ena siri bona ena hereva haida oi duahia be dala ta, Iehova ena Hereva be hanaihanai oi dibaia totona. Unai dala namona oi gaukaralaia, a?
2 Heduru Ia Noho: Isaia 30:20 ese Iehova ia gwauraia “Hadibaia Tauna” bona Dirava ena taunimanima ese ia amo heduru idia tahua diba. Emu abidadama idia tohoa gaudia oi haheaukalaia diba hegeregerena heduru ia henia. Edena bamona? Siri 21 ia gwau: “Emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’ ” Hari inai negai, Iehova ese Baibel bona “hesiai tauna mai ena kamonai” oreana ia karaia buka bona magasin amo ena “hereva” ia halasia. (Mat. 24:45) Aonega bada be guna idia halasia Gima Kohorona magasin lalonai idia noho, Keristani mauri dalana ibounai idia herevalaia. Dina Iboudiai Buka Helaga Tahua buklet lalonai idia noho herevadia riviulaia karana ese oi do ia durua aonega bada oi abia, hahetoho idauidau oi haheaukalaia totona.—Isa. 48:17.
3 Nega Oi Atoa: Ena be daba ibounai be bisi bada negadia, to sinana ta ese nega ia atoa iena natuna mero be ia aniani lalonai ia ida dina ena siri bona ena hereva ia duahia bona ia herevalaia. Daba ta ta lalonai sikuli totona ia do lao lasi neganai unai hereva bona guriguri be ia kamonai hereva gabedia. Unai ese ia hagoadaia, sihari kava karadia ia dadaraia, bese abia isi karadia lalonai ia vareai lasi, bona mai ena gari lasi ida stiuden bona tisa taudia ia haroro henia. Ena be unai sikuli dekenai ia sibona be Witnes natuna, to ia mamia ia be sibona ia noho lasi.
4 Iehova ena hereva oi duahia, dala maorona dekenai oi raka bona ia ese oi ia hakaua totona. Bema unai bamona oi karaia, ia be momokani oi dekenai, oi tabekau henia turana ta bamona. Dina iboudiai iena heduru oi tahua! Tanobada hegegemadai taunimanima milioni ma haida bamona Dirava ena Hereva be dina ta ta oi tahua lalonai, namona be oi davaria ‘emu matadia dekenai, emu Hadibaia Tauna oi itaia.’