Sivarai Namona Oi Harorolaia mai Abidadama Goadana Ida

¹ Aposetolo taudia edia nega ena matamana kahana ai, Iesu Keriso ese ena murinai idia raka taudia ia hagania Basileia ena sivarai namona do idia harorolaia bona ‘bese ibounai be diba tahua taudia ai do idia halaoa.’ (Mat. 24:14; 28:​19, 20) Iehova ena Witnes taudia ese iena hahegani idia laloa bada, unai dainai lagani 2000 ia kahirakahira neganai, iseda Keristani oreana taudia edia namba ia bada daekau 5,900,000 mai kahana bona tano 234 lalonai idia gaukara. Unai be iseda guba Tamana hanamoa karana badana!

² Hari ita be lagani 2000 lalonai ita vareai. Iseda Inai Tauna be hehuni dalanai iseda gaukara badadia, Basileia harorolaia gaukarana bona hahediba taudia halaoa gaukarana, ia hadikaia toho. Ia ese inai tanobada ena hekwarahi gaudia ia gaukaralaia, anina lasi gaudia ese iseda lalona idia veria, bona iseda nega bona goada idia haorea totona. Inai tanobada ena lalohadai amo lasi, to Dirava ena Hereva amo ita sibona dekenai ita hamomokania dahaka be mai anina bada gauna​—Iehova ena ura ita karaia karana unai. (Roma 12:2) Unai ena anina be inai Baibel ena hereva ita badinaia ‘Sivarai Namona do ita harorolaia nega namodia bona nega dikadia lalonai bona Dirava ena hesiai tauna ena kara ibounai do ita karaia namonamo.’​—2 Tim. 4:​2, 5.

³ Abidadama Goadana Oi Abia: Namona be Keristani taudia idia ‘gini goada bona Dirava ena ura ibounai idia diba namonamo bona kamonai henia.’ (Kol. 4:12) Unai hereva “diba namonamo” ena anina be “diba momokani karana eiava abidadama; abia dae momokani karana.” Ita be Keristani taudia dainai, namona be ita abia dae momokani Dirava ena peroveta herevana be momokani bona ita be inai nega ena dokona momokani lalonai ita noho. Abidadama goadana, aposetolo Paulo ena bamona, ita abia be namo, ia gwau “Sivarai Namona be Dirava ena siahu, abidadama taudia ia hamauria.”​—Roma 1:16.

⁴ Diabolo ese kara dika taudia bona koikoi taudia, haida ese idia koia taudia, ia gaukaralaia ma haida idia veria bona koia totona. (2 Tim. 3:13) Unai be ita idia hadibaia guna dainai, ita ese kara haida ita karaia ita abia dae hereva momokani dekenai iseda abidadama ita hagoadaia totona. Mauri ena lalo-hekwarahi gaudia ese iseda lalo-goada karana idia hadikaia lasi, to Basileia gaudia ita atoa guna noho. (Mat. 6:​33, 34) Danu, ita ura lasi karaharaga lalohadaina ita haboioa, bena ita laloa inai nega dikana ena dokona be daudau. Ia be ia kahirakahira momokani. (1 Pet. 4:7) Ena be reana ita laloa haroro gaukara badana idia karaia vadaeni tanodia haida dekenai sivarai namona harorolaia gaukarana ese anina bada ia havaraia lasi, to hadibaia gaukarana ita karaia noho be gau badana.​—Esek. 33:​7-9.

⁵ Inai nega dokona lalonai henanadai badadia be inai: ‘Lau ese Iesu ena hahegani taunimanima be hahediba taudia halaoa gaukarana dekenai be lau laloa bada, a? Sivarai namona lau harorolaia neganai, mai goada ida lau hahedinaraia Basileia be gau korikorina, a? Lau hekwarahi inai taunimanima hamauria gaukarana lau karaia badabada diba totona, a?’ Inai dokona negana lalonai iseda noho negana ita lalo-pararalaia dainai, iseda kara bona iseda haroro bona hadibaia gaukarana ita naria namonamo. Bema unai ita karaia, ita ese mauri do ita davaria bona ita idia kamonai henia taudia danu. (1 Tim. 4:16) Edena dala ai ita haroro gaukara karaia taudia ibounai ese iseda abidadama ita hagoadaia diba?

⁶ Tesalonika Taudia Oi Tohotohoa: Aposetolo Paulo be Tesalonika tadikaka edia gaukara goada karana ia laloa lou neganai, idia dekenai ia gwau: “Ai ese Sivarai Namona ai mailaia umui dekenai, hereva sibona dekenai lasi, to Lauma Helaga ena siahu dekenai danu. Oibe, ai diba momokani inai Sivarai Namona be hereva momokani dainai, ai gwauraia mai siahu danu. Unai dainai abidadama korikori umui davaria. Umui diba danu edena bamona ai noho umui emui huana dekenai, ai ese umui ai durua sibona. Umui ese aiemai mauri dalana umui itaia, vadaeni aiemai mauri dala bamona umui noho, Lohiabada danu bamona umui noho. Umui ese Dirava ena hereva umui abia dae, vadaeni unai murinai taunimanima ese nega momo umui idia hisihisi henia. To Lauma Helaga ese iena moale ia henia umui dekenai.” (1 Tes. 1:​5, 6) Oibe, Paulo ese Tesalonika kongregesen taudia ia hanamoa badina ena be hisihisi idia ania, to idia be mai lalo-goada bona abidadama goadana ida idia haroro. Dahaka ese idia ia durua unai bamona idia karaia totona? Aposetolo Paulo bona ia ida idia gaukara taudia edia lalo-goada bona abidadama karana ese idia ia durua bada. Edena dala ai?

⁷ Paulo bona ia danu idia loaloa taudia edia mauri dalana ese ia hamomokania Dirava ena lauma helaga idia abia bona idia harorolaia gauna be mai edia kudouna ibounai ida idia abia dae. Tesalonika dekenai idia do lao lasi neganai, Paulo bona Sila be Filipi dekenai idia kara auka henidia. Idia kota henidia lasi, to idia dadabaia, dibura dekenai idia atoa, bona edia aena be au metaudia rua huanai idia kwatua auka. To, unai hahetoho ese edia lalo-goada sivarai namona dekenai ia hadikaia lasi. Dirava ena heduru dainai dibura idia rakatania diba, dibura naria tauna bona ena ruma bese be abidadama taudia ai idia lao, bona dala ia kehoa unai tadikaka ese edia hesiai gaukara idia karaia noho totona.​—Kara 16:​19-34.

⁸ Dirava ena lauma ena heduru dainai Paulo be Tesalonika dekenai ia lao. Unuseniai ia hekwarahi tauanina durua gaudia ia abia totona bona nega bada ia atoa hereva momokani be Tesalonika taudia dekenai ia hadibaia totona. Dala ia kehoa negadia ibounai ia ese sivarai namona ia harorolaia. (1 Tes. 2:9) Paulo ese ia haroro henia taudia dekenai iena haroro gaukara mai abidadama goadana be mai ena siahu dainai, idia haida be edia kaivakuku tomadiho henia karana idia rakatania bona Dirava momokani, Iehova, ena hesiai taudia ai idia lao.​—1 Tes. 1:​8-10.

⁹ Dagedage karana ese unai abidadama matamata taudia ia koua lasi to sivarai namona idia harorolaia noho. Tesalonika taudia edia abidadama matamatana ese idia ia hagoadaia dainai bona idia diba momokani noho hanaihanai hahenamodia do idia abia dainai, mai moale ida idia abia dae hereva momokanina idia harorolaia. Unai kongregesen ia gaukara goadagoada dainai edia abidadama bona lalo-goada karana ena sivarai be Makedonia bona Akaia dekenai danu idia kamonai. Unai dainai, Paulo ese ena revareva ginigunana be Tesalonika taudia dekenai ia siaia neganai, taunimanima ese edia kara namodia idia diba vadaeni. (1 Tes. 1:7) Unai be haheitalai namo hereana!

¹⁰ Dirava Bona Taunimanima Lalokau Henia Karana ese Ia Hagoadadia: Edena dala ai, hari inai negai sivarai namona ita harorolaia neganai, ita ta ta be Tesalonika taudia bamona abidadama goadana do ita abia diba? Paulo ese idia ia herevalaia, ia gwau: “Ai be Tamana Dirava ena vairanai, emui abidadama bona emui kara namodia ai herevalaia. Iesu Keriso umui lalokau henia bada dainai, umui gaukara noho mai goada danu.” (1 Tes. 1:3) Ia hedinarai goevagoeva idia ese mai edia kudouna ibounai ida Iehova Dirava bona idia haroro henia taudia idia lalokau henia. Unai lalokau tamona ese Paulo bona ena turadia ia hagoadaia Tesalonika taudia dekenai ‘sivarai namona sibona lasi, to edia mauri danu idia henia.’​—1 Tes. 2:8.

¹¹ Unai hegeregerena, iseda lalokau Iehova bona taunimanima dekenai ese ita ia hagoadaia bena ita ura Dirava ese ita ia henia haroro gaukarana ita karaia namonamo. Unai bamona lalokau dainai, ita lalo-parara sivarai namona ita harorolaia be ita ta ta dekenai Dirava ese ia henia maduna. Bema “mauri korikori” dekenai ita ia hakaua lao totona Iehova ese ia karaia gaudia iboudiai ita laloa namonamo bona laloa bada, ita ia hagoadaia mai kudouna ibounai ida ita abia dae hereva momokani hereadaedia be ma haida dekenai ita gwauraia.​—1 Tim. 6:​19, NW.

¹² Haroro gaukara ita karaia goadagoada noho lalonai, iseda lalokau Iehova bona taunimanima dekenai ia bada ia lao noho be namo. Bema unai bamona ia vara, unai ese ita do ia ha-uraia iseda ruma-ta-ruma-ta haroro gaukarana bona idia kehoa haroro daladia ma haida do ita goadalaia. Ita ese nega bona gabu idauidau ai dala ia kehoa negadiai iseda varavara, dekena taudia, bona turadia do ita haroro henia. Ena be taunimanima momo ese ita harorolaia sivarai namona idia ura henia lasi bona haida do idia hekwarahi Basileia harorolaia gaukarana idia hadikaia totona, to moale mamina ita abia. Dahaka dainai? Badina ita diba ita ese iseda goada hegeregerena Basileia ita harorolaia bona taunimanima ita durudia hahemauri idia abia totona. Bona kudou-maoro taudia ita davaria totona ita hekwarahi neganai, Iehova ese iseda gaukara do ia hanamoa. Ena be mauri ena hekwarahi gaudia be momo bona Satani ia ura iseda moale ia haorea, to ita hegeregere ma haida haroro henidia gaukarana lalonai iseda abidadama bona lalo-goada do ita hahedinaraia noho. Bema ita ibounai ese iseda kahana ita karaia, unai amo Tesalonika dekenai ia noho kongregesen bamona kongregesen goadadia do idia vara.

¹³ Hahetoho Lalodiai Oi Hesiku Lasi: Hahetoho idauidau ita davaria neganai danu abidadama be gau badana. (1 Pet. 1:​6, 7) Iesu be ena hahediba taudia dekenai ia hahedinaraia goevagoeva bema ia murinai idia raka, idia be “bese ibounai ese . . . do idia badu henia.” (Mat. 24:9) Filipi dekenai Paulo bona Sila ese unai idia davaria. Kara karoa 16 lalonai ia noho sivaraina ese ia hahedinaraia Paulo bona Sila be dibura rumana ena lalona daiutuna dekenai idia atoa bona edia aena be au metaudia huanai idia kwatua. Nega momo, dibura ruma ena kahana badana be daiutu ese idia hagegea ariara eiava ruma badana ta bamona, bona unai daiutu edia namo be diari bona hodahoda idia abia. To, dibura rumana ena lalona kahanai, diari be lasi bona hodahoda be bada lasi. Paulo bona Sila be unai dibura rumana ena dibura, siahu, bona bonana dikana idia haheaukalaia. Hora momo lalodiai au rua huanai edia aena idia kwatua bona idia kwadia dainai edia doruna idia toto bona rara ia diho, unai dainai idia abia hisihisi oi laloa diba, a?

¹⁴ Ena be unai hahetoho idia davaria, to Paulo bona Sila edia abidadama ia goada. Mai edia kudouna ibounai ida abidadama karana idia hahedinaraia, bona unai ese idia ia hagoadaia hahetoho lalonai danu Iehova idia hesiai henia noho. Edia abidadama be karoa 16 siri 25 ese ia hahedinaraia, ia gwau Paulo bona Sila be “idia guriguri noho bona ane dekenai Dirava idia hanamoa.” Momokani, ena be dibura ena lalona daiutuna dekenai idia noho, to idia diba momokani Dirava ena lalo-namo idia abia dainai ane idia abia badabada bena ma dibura taudia haida idia kamonai diba! Hari inai negai iseda abidadama idia tohoa gaudia ita davaria neganai iseda abidadama be unai bamona ia goada noho be namo.

¹⁵ Diabolo ese ita dekenai hahetoho momo herea ia henia. Reana haida be edia varavara ese idia dagedage henidia. Iseda tadikaka momo be gavamani dainai idia hekwarahi. Reana hereva momokani idia negea taudia amo dagedage idia davaria. Moni bona edena bamona mauri ena durua gaudia do idia abia ena metau idia davaria. Matamata taudia be sikuli dekenai bamodia edia lalo-ani karana idia davaria. Edena bamona ita ese mai kwalimu ida unai hahetoho ita haheaukalaidia diba? Dahaka be gau badana abidadama ita hahedinaraia totona?

¹⁶ Gau ginigunana bona badana be, Iehova ida hetura karana namona ita abia. Paulo bona Sila be dibura ena lalona daiutuna ai idia noho neganai, unai nega idia gaukaralaia lasi edia mauri idia maumauraia o sibona dekenai idia hebogahisi totona. Karaharaga Dirava idia guriguri henia bona ane amo ia idia hanamoa. Dahaka dainai? Badina edia guba Tamana ida hetura karana namona idia abia. Idia lalo-parara idia be kara maoromaoro dainai hisihisi idia davaria bona edia hahemauri be Iehova ena imana dekenai ia noho.​—Sal. 3:8.

¹⁷ Hari inai negai hahetoho idauidau ita davaria neganai, namona be ita danu ese Iehova ena heduru ita tahua. Paulo ese ita Keristani taudia ia hagoadaia ‘Dirava do ita noia, bona Dirava ena maino, taunimanima edia diba ia hanaia momokani mainona, ese iseda laloa gaudia bona kudouna idia mamia gaudia ibounai do ia gimaia namonamo.’ (Fil. 4:​6, 7) Hahetoho lalodiai Iehova ese ita do ia rakatania lasi ita diba be hagoadaia gauna momokani! (Isa. 41:10) Ia be nega ibounai ita danu do ia noho bema ita be mai abidadama momokani ida iena hesiai gaukara ita karaia.​—Sal. 46:7.

¹⁸ Ma heduru gauna badana ta abidadama hahedinaraia totona be Iehova ena hesiai gaukara lalonai ita gaukara goadagoada noho. (1 Kor. 15:58) Paulo bona Sila be dibura ai idia atoa badina sivarai namona idia harorolaia goadagoada. Hahetoho dainai haroro gaukara idia hadokoa, a? Lasi, idia haroro noho ena be dibura ai idia noho, bona dibura idia rakatania murinai, Tesalonika bona Iuda taudia edia dubu dekenai idia lao ‘Buka Helaga be idia danu idia herevalaia.’ (Kara 17:​1-3) Bema Iehova ita diba momokani eiava ia ita abidadama henia bona ita abia dae momokani hereva momokani ita abia, gau ta lasi “ese Dirava ena lalokau, Keriso Iesu iseda Lohiabada ese ia hedinaraia vadaeni gauna, dekena amo ita do ia kokia diba.”​—Roma 8:​35-39.

¹⁹ Hari Inai Negai Abidadama Goadana Idia Hahedinaraia Taudia: Hari iseda negai Paulo bona Sila bamona abidadama goadana idia hahedinaraia taudia be momo. Auschwitz dibura kamepa amo ia roho mauri taihu ta ese unuseniai tadikaka bona taihu idia hahedinaraia abidadama bona lalohadai goadana ia herevalaia. Ia gwau: “Nega ta ai idia nanadaia lalonai, ofesa ta be lau dekenai ia mai, ena imana ia ha-aukaia. Ia boiboi, ‘Umui dekenai dahaka do ai karaia?’ ‘Bema umui ai dogoatao, umui laloa lasi. Bema dibura dekenai umui ai siaia lao, umui laloa lasi. Bema dibura kamepa dekenai umui ai siaia lao, unai dainai umui laloa momo lasi. Emui mase herevana ai gwauraia neganai, umui gini sibona bona umui laloa momo lasi. Umui dekenai dahaka do ai karaia?’ ” Unai bamona mauri aukana lalonai tadikaka bona taihu edia abidadama ita itaia be abidadama hagoadaia gauna momokani! Hanaihanai Iehova dekenai heduru idia tahua, idia haheauka totona.

²⁰ Vanegai lagani lalodiai bese idauna taudia inai henia karadia lalonai iseda tadikaka bona taihu ese idia hahedinaraia abidadama ita laloa. Herevana dika idia davaria diba, to maduna idia abia tadikaka idia hegaegae edia tadikaka bona taihu be lauma dalanai idia ubua totona. Ibounai idia abidadama noho bona idia diba momokani ‘tuari gauna ta ese idia do ia hadikaia diba lasi.’​​—Isa. 54:17.

²¹ Iseda tadikaka bona taihu momo danu, edia adavana be abidadama lasi taudia, ese abidadama goadana bona haheauka idia hahedinaraia noho. Guadeloupe dekenai tadikaka ta be ena abidadama lasi adavana amo dagedage bada ia davaria. Ia ura ena adavana ia hamanokaia bona ia koua Keristani heboudia dekenai ia lao lasi totona, bona unai dainai ia ese ena aniani ia nadua lasi bona ena dabua ia huria bona ia hanamoa lasi. Nega daudau lalonai, ia ese ia hereva henia lasi. To mai ena kudouna ibounai ida Iehova ia hesiai henia lalonai abidadama goadana ia hahedinaraia bona guriguri amo Iehova ena heduru ia tahua dainai, unai tadikaka ia hegeregere unai ibounai do ia haheaukalaia. Lagani hida? Lagani 20 bamona​—unai murinai ena hahine be metairametaira ena lalona ia haidaua. Dokonai, unai tadikaka ia moale bada badina ena hahine ese Dirava ena Basileia ena helaro ia abia dae.

²² Gau ginigabena be, iseda tadikaka bona taihu matamata, dina ta ta ibounai sikuli dekenai idia lao bona bamodia edia lalo-ani karadia bona ma hekwakwanai haida idia davaria taudia, edia abidadama goadana ita laloaboio lasi be namo. Sikuli dekenai ma haida ida do idia hegeregere totona idia doria ena hekwakwanai ia herevalaia neganai, matamata Witnes kekeni ta ia gwau: “Sikuli gabunai oi noho neganai, ibounai ese oi do idia hagoadaia oi gwau-edeede sisina totona. Sikuli taudia ese oi do idia matauraia bema oi ese gwau-edeede karana ta oi karaia.” Iseda matamata taudia be hekwakwanai badadia idia davaria! Namona be edia lalona bona kudouna idia goada hahetoho idia dadaraia totona.

²³ Iseda matamata taudia momo be hahetoho lalodiai edia kamonai karana idia dogoatao noho. Haheitalai ta be France dekenai ia noho matamata taihu ta. Dina ta, dina tubua ena aniani negana murinai, memero haida ese idia doria idia do ia kisi henia totona, to ia guriguri bona mai goada ida idia ia dadaraia, unai dainai ia idia rakatania. Gabeai, idia ta ia giroa bona taihu ia hamaoroa ia be iena gari lasi karana ia laloa bada. Taihu ese ia dekenai Basileia ia herevalaia namonamo, bona ia hamaoroa Iehova be kara maoromaoro taravatudia ia atoa unai Basileia ena hahenamo idia ura abia taudia totona. Unai sikuli lagani lalonai, ena klas taudia ibounai vairanai ia abia dae gaudia ia herevalaia danu.

²⁴ Iehova ese mai moale ida ia gaukaralaia taudia, mai abidadama goada ida iena ura idia herevalaia taudia, huanai ita noho be davana bada hahenamona ta. (Kol. 4:12) Danu, laiona bamona Inai Tauna, Satani Diabolo, ese ita ia tuari henia lalonai iseda kamonai karana ita hamomokania be hahenamo namo hereana. (1 Pet. 5:​8, 9) Oi laloaboio lasi, Iehova ese Basileia sivaraina ia gaukaralaia noho idia harorolaia taudia bona idia kamonai taudia ia hamauria totona. Namona be ita abia hidi gaudia bona dina ta ta ibounai lalonai iseda mauri dalana ese idia hamomokania ita be Basileia ita atoa guna. Namona be sivarai namona ita harorolaia noho mai abidadama goadana ida!