Gini Goada Bona Dirava Ena Ura Ibounai Diba Namonamo
‘Nega ibounai umui totona ia guriguri goada, do umui gini goada bona Dirava ena ura ibounai be do umui diba namonamo.’—KOLOSE 4:12.
1, 2. (a) Murimuri taudia ese Keristani taudia ginigunadia edia kara be edena bamona idia gwauraia? (b) Edena dala ai Kolose bukana ese mai lalokau ida haida laloa bada karana ia hahedinaraia?
IESU murinai idia raka taudia ese abidadama tamona taudia idia laloa bada. Idia ese tama sina lasi natudia, ogogami taudia, bona buruka taudia dekenai idia hahedinaraia kara namo be Tertullian (lagani 155 C.E. ia lao 220 C.E. bamona lalonai ia mauri noho toretore tauna) ese ia herevalaia. Unai lalokau idia hahedinaraia karadia ese abidadama lasi taudia haida edia lalona idia veria dainai, Keristani taudia idia herevalaia neganai idia gwau, ‘Itaia, idia be ta ta idia lalokau henia bada.’
2 Kolose bukana ese ia hahedinaraia aposetolo Paulo bona ia bamoa tauna Epafra be unai bamona, mai lalokau ida Kolose tadikaka bona taihu idia laloa bada. Paulo be idia ia tore henia: Epafra be ‘nega ibounai umui totona ia guriguri goada do umui gini goada bona Dirava ena ura ibounai be do umui diba namonamo.’ Lagani 2001 lalonai, Iehova ena Witnes taudia edia lagani ena siri badana be Kolose 4:12 ena hereva, ia gwau: ‘Do umui gini goada bona Dirava ena ura ibounai be do umui diba namonamo.’
3. Epafra ese ia gurigurilaia gaudia rua be dahaka?
3 Oi itaia diba Epafra ena guriguri ena lalokau taudia totona be mai ena kahana rua: ia ura (1) ‘do idia gini goada’ bona (2) ‘Dirava ena ura ibounai do idia diba namonamo.’ Unai hereva be Buka Helaga lalonai idia torea iseda namo totona. Unai dainai oi sibona oi nanadaia, ‘Dahaka lau karaia be namo, do lau gini goada bona Dirava ena ura ibounai do lau diba namonamo totona? Bona unai lau karaia neganai, dahaka do ia vara?’ Mani ita itaia.
Oi “Gini Goada” Totona Oi Hekwarahi be Namo
4. Edena dala ai Kolose taudia idia “goada” be namo?
4 Epafra ia ura bada iena lauma tadikaka bona taihu Kolose dekenai ‘be do idia gini goada.’ Paulo ese ia gaukaralaia hereva be idia hahanaia “goada,” ena anina haida be namo herea, tau badana vadaeni, eiava ia lo tauna. (Mataio 19:21; Heberu 5:14; Iamesi 1:4, 25) Reana oi diba, ta ia bapatiso bona Iehova ena Witnes tauna ai ia lao neganai, maoromaoro lo Keristani tauna ai ia lao lasi. Paulo ese Efeso taudia, Kolose amo west kahanai idia noho taudia, ia tore henia, ia gwau haroro taudia bona hadibaia taudia be ibounai durua totona idia hekwarahi, unai amo “ita ibounai iseda abidadama do ia tamona, bona iseda diba Dirava ena Natuna dekenai danu be tamona. Bona ita be tau badadia do ita halaoa, oibe, Keriso ena bada hegeregerena danu do ita abia gwauraia.” Siri ma ta ai Paulo ese Keristani taudia ia hagoadaia ‘laloa dobu gaudia be tau badadia bamona do idia laloa.’—Efeso 4:8-13; 1 Korinto 14:20.
5. Edena dala ai ita goada totona ita hekwarahi be namo?
5 Bema Kolose taudia haida be lauma dalanai idia do tau badadia, eiava lo taudia, lasi, unai totona idia hekwarahi be namo. Hari inai negai unai be momokani danu, ani? Herevana ita be lagani momo gunanai eiava vanegai sibona ita bapatiso, iseda laloa dalana bona lalohadai ita hanamoa vadaeni, a? Gau ta do ita abia hidi neganai, Baibel ena hakaua herevadia ita laloa, a? Dirava bona kongregesen dekenai mai anina bada gaudia be ita laloa bada gaudia, eiava nega haida sibona unai gaudia ita laloa? Ita goada ita lao idia hahedinaraia daladia ibounai be iniseniai ita gwauraia diba lasi, to inai haheitalai rua mani oi laloa.
6. Dahaka kara be ta ese ia habadaia diba Iehova bamona do ia goeva totona?
6 Haheitalai ginigunana be inai: Reana bese, tano, eiava gabu idauna taudia idia badu henia taudia huanai ita tubu. Hari ita diba Dirava ese taunimanima edia toana ia laloa lasi, bona ita ese danu ita laloa lasi be namo. (Kara 10:14, 15, 34, 35) Iseda kongregesen eiava sekit lalonai, haida be unai gabu idauna taudia bona ita be idia bogaraginai ita noho. To unai mauri dalana taudia be sibona eda lalona dekenai ita do lalo-dika henia, a? Idia ta be dala maragina ai ita dekenai kara kerere ta ia karaia neganai, karaharaga ita badu, a? Mani oi sibona oi nanadaia, ‘Dirava ena kara, toana laloa lasi karana, do lau habadaia noho be namo, a?’
7. Ta be Keristani tauna goadana ai ia lao totona edena dala ai ma haida ia laloa be namo?
7 Haheitalai iharuana be inai: Filipi 2:3 ia gwau: “Umui sibona emui ladana do umui habadaia gwauraia lasi, bona do umui hekokoroku lasi. To umui ibounai ta ta dekenai do umui manau. Umui ta ta nega ibounai inai bamona do umui laloa, ‘Haida be idia namo herea, to lau be namo lasi.’ ” Unai kara ita habadaia vadaeni, a? Taunimanima ta ta be mai ena goada gaudia bona mai ena manoka gaudia. Bema guna ma haida edia manoka gaudia ita itaia haraga, iseda kara ita hanamoa vadaeni, bona hari ita laloa lasi idia ‘goeva momokani’ be namo, a? (Iamesi 3:2) Guna bamona lasi, hari ita itaia diba—reana ita tahua—edena dala ai ma haida ese ita idia hereaia, a? ‘Lau gwau diba unai taihu ena haheauka karana ese lauegu ia hereaia.’ ‘Unai tadikaka ena abidadama be goada, lauegu be unai bamona lasi.’ ‘Iena hadibaia dalana be namo herea, lauegu ia hereaia.’ ‘Badu koua karana dekenai ia ese lau ia hereaia.’ Reana Kolose taudia haida be unai kara idia habadaia be namo. Ita danu, a?
8, 9. (a) Epafra ia guriguri Kolose taudia be do idia “gini goada,” unai ena anina be dahaka? (b) ‘Idia gini goada’ neganai vaira negana be edena bamona idia laloa be namo?
8 Epafra ia guriguri Kolose taudia be do idia “gini goada.” Ia hedinarai goevagoeva, Epafra ia guriguri Kolose taudia be edia kara do idia hanamoa, bena goada, lo, bona Keristani tau badadia ai idia lao, bona unai bamona do idia “gini,” eiava do idia noho.
9 Ita laloa diba lasi Keristani taudia ai idia lao taudia ibounai be unai bamona do idia noho, herevana idia be lo Keristani taudia vadaeni. Iesu ia gwau Dirava ena natuna ta, aneru ta, be ‘hereva momokani ia badinaia lasi.’ (Ioane 8:44) Bona Paulo ese Korinto taudia ia tore henia neganai, guna nega sisina lalonai Iehova idia hesiai henia to gabeai idia moru taudia haida ia gwauraia. Dirava ese lauma amo ia horoa tadikaka ia sisiba henidia, ia gwau: “Tau ta bema ia laloa ia gini goada, namona be ia naria namonamo, do ia moru garina.” (1 Korinto 10:12) Unai ese Kolose taudia ‘be do idia gini goada’ gurigurina ena anina ia habadaia. Idia be goada, tau badadia, ai idia lao neganai, namona be idia gaukara goada, Dirava ena dala idia rakatania lasi, idia hesiku lasi, eiava idia boio lasi totona. (Heberu 2:1; 3:12; 6:6; 10:39; 12:25) Unai dala ai, kota bona gwaumaoro idia abia dinana dekenai do idia “goada.”—2 Korinto 5:10; 1 Petero 2:12.
10, 11. (a) Epafra ena guriguri ese dahaka haheitalai ia hahedinaraia ita dekenai? (b) Epafra ena kara oi tohotohoa lalonai, oi ura dahaka totona oiemu lalona oi hadaia?
10 Iseda guriguri lalonai ma haida edia ladana ita gwauraia, bona Iehova ese idia ia durua, hagoadaia, hanamoa, bona lauma helaga ia henidia totona ita noinoi be gau badana ita herevalaia vadaeni. Epafra ena guriguri Kolose taudia totona be unai bamona. Bona unai hereva lalonai be sibona totona ita guriguri lalonai do ita gwauraia gaudia ita itaia diba—oibe, do ita davaria. Momokani, gau badana be Iehova ena heduru ita noia, ita be do ita “gini goada” ela bona dokona totona. Oi ese oi noia, a?
11 Oiemu noho dalana be guriguri lalonai oi herevalaia be namo, ani? Oi “goada,” tau badana, eiava lo tauna ai oi lao dalana be Dirava dekenai oi gwauraia be namo. Lauma dalanai do oi hanamoa be namo karadia oi itaia totona iena heduru oi noia. (Salamo 17:3; 139:23, 24) Momokani, unai bamona karadia haida oi dekenai idia noho. To namo lasi unai dainai oi lalo-manoka, to namona be Dirava oi noia goevagoeva, unai kara hanamodia totona oi do ia durua. Nega tamona sibona unai oi gurigurilaia lasi. Oibe, namona be oiemu lalona oi hadaia vaira pura lalonai nega sisina bada oi atoa, ‘do oi gini goada’ oi gurigurilaia totona. Bona palani oi karaia, lagani ena siri badana oi laloa neganai unai do oi karaia loulou. Oi guriguri lalonai, Dirava ena hesiai gaukara bona ena taunimanima oi rakatania, oi hesiku, eiava oi boio totona oi idia veria toho gaudia bona edena bamona unai oi koua diba oi gwauraia be namo.—Efeso 6:11, 13, 14, 18.
Diba Namonamo Totona Oi Guriguri
12. Dahaka dainai “diba namonamo” karana be mai anina bada Kolose taudia dekenai?
12 Kolose taudia do idia gini goada bona Dirava ese idia ia abia dae totona Epafra ese mai anina bada gauna ma ta ia gurigurilaia danu. Ita dekenai danu unai be mai anina bada. Unai gauna be dahaka? Ia guriguri, idia be do idia gini goada ‘bona Dirava ena ura ibounai do idia diba namonamo.’ Idia kahirakahira idia noho taudia ese hahediba hereva idaudia bona dika idia havaraia aonega herevadia idia halasia, unai hereva haida edia toana be hereva momokani bamona. Hegeregere, idia doridia dina badadia be aniani lasi eiava aniani momo karadia amo idia hahelagaia, guna Iuda tomadiho lalonai idia karaia bamona. Hadibaia koikoi taudia ese aneru, Dirava ese Mose ena Taravatu henia totona ia gaukaralaia lauma taudia goadadia, idia abia isi. Mani oi laloa, unai bamona gaudia badinaia totona idia doria! Unai lalohadai idauidau momo ese daradara idia havaraia.—Galatia 3:19; Kolose 2:8, 16-18.
13. Kolose taudia ese heduru abia totona dahaka idia abia dae be namo, bona unai ese ita edena bamona ia durua diba?
13 Paulo ese ena haere lalonai Iesu Keriso ena gaukara ena anina ia hahedinaraia. “Keriso Iesu umui abia dae emui Lohiabada dainai, umui be ia lalonai umui noho vadaeni. Umui gini goada noho, Keriso dainai, au ese ia gini goada iena ramuna dainai bamona. Bona Keriso ena latanai emui mauri do umui haginia, ruma idia haginia nadi goadana ena latanai bamona. Ai ese umui ai hadibaia Sivarai Namona do umui abidadama henia goada.” Oibe, namona be Kolose taudia bona ita ese Keriso ena gaukara ena anina Dirava ena palani bona iseda mauri lalonai ita abia dae momokani. Paulo ia gwau: “Dirava ena mauri bona kara ibounai be Keriso ena tauanina lalonai idia noho. Keriso lalonai umui noho dainai, mauri momokani umui abia vadaeni. Keriso be gunalaia laumadia ibounai bona siahu taudia ibounai edia biaguna.”—Kolose 2:6-10.
14. Dahaka dainai Kolose taudia edia helaro be helaro korikorina?
14 Kolose Keristani taudia be Dirava ese lauma amo ia horoa taudia. Edia helaro be guba maurina bona badina momo idia noho unai helaro ia goada totona. (Kolose 1:5) “Dirava ena ura” be do idia diba namonamo edia helaro be helaro korikorina. Idia ta ese unai helaro ia daradaralaia be mai badina, a? Lasi momokani! Hari inai negai, tanobada paradaisona lalonai mauri do idia abia ena helaro be Dirava amo idia abia taudia be idau, a? Lasi! Ia hedinarai goevagoeva edia helaro namona be “Dirava ena ura” ena kahana ta. Mani inai henanadai oi laloa: Bema oi hekwarahi noho “hisihisi badana” amo do idia roho mauri “hutuma bada herea” taudia ta ai oi lao totona, oiemu helaro ia goada momokani, a? (Apokalupo 7:9, 14) Unai be ‘Dirava ena ura ibounai lalonai oi diba namonamo’ gaudia ta, a?
15. Paulo ese edena hereva lalonai helaro ia gwauraia?
15 Ita be unai hereva “helaro” amo ura gauna eiava nihi bamona gauna ta sibona ita gwauraia lasi. Paulo ese guna Roma taudia dekenai ia gwauraia herevana amo unai ita diba. Unai hereva lalonai, ia gwauraia guna gauna be mai anina ia murinai ia gwauraia gauna dekenai. Iena hereva lalonai Paulo ese “helaro” ia atoa gabuna mani oi laloa, ia gwau: “Namona be hisihisi lalodiai ita moale, badina be ita diba hisihisi ese haheauka ia havaraia; bena haheauka amo, lalo-namo abia mamina; bena lalo-namo abia mamina amo, helaro, bona unai helaro be lalohisihisi ia havaraia lasi; badina be Dirava ena lalokau be lauma helaga . . . dekena amo iseda kudouna lalonai ia bubua vareai.”—Roma 5:3-5, NW.
16. Baibel ena hereva momokani oi dibaia neganai, dahaka helaro oi abia?
16 Iehova ena Witnes taudia ese nega ginigunana oi dekenai Baibel ena sivarai namona idia hahedinaraia neganai, reana hereva momokani ta ese oiemu lalona ia veria, hegeregere mase taudia edia noho eiava toreisi lou herevana. Momo dekenai, Baibel ese ia hahedinaraia helaro, tanobada paradaisona lalonai mauri do ita abia helarona, be idia laloa bada lalohadai matamatana. Unai hadibaia hereva be nega ginigunana oi kamonai negana mani oi laloa. Unai be helaro namo herea—gorere bona buruka negana idia ore, oiemu gaukara goada ena anina do oi moalelaia diba, bona animal ida maino ai do oi noho! (Hadibaia Tauna 9:5, 10; Isaia 65:17-25; Ioane 5:28, 29; Apokalupo 21:3, 4) Oi ese helaro namo herea oi abia unai!
17, 18. (a) Paulo ese Roma taudia dekenai ia torea herevana lalonai, dahaka ia gwauraia guna bena helaro ia gwauraia? (b) Roma 5:4, 5 ese ia gwauraia helaro be edena bamona, bona oi be unai bamona helaro oi abia, a?
17 Gabeai, reana haida ese oi idia dadaraia eiava idia dagedage henia. (Mataio 10:34-39; 24:9) Vanegai danu, tano idauidau dekenai Witnes taudia edia ruma amo edia kohu idia henaoa eiava idia doria edia gabu amo idia heau totona. Haida idia dadabaia, edia Baibel bukadia idia abia, eiava niusi dekenai koikoi herevadia amo idia herevalaia. Herevana edena bamona dagedage karadia oi davaria, to Roma 5:3 ia gwau bamona, hisihisi lalonai oi moale noho diba, bona unai ese namo ia havaraia. Paulo ia torea bamona, hisihisi ese haheauka ia havaraia. Bena haheauka dainai lalo-namo oi abia mamina ia noho. Oi diba oi ese kara maoro oi karaia, badina Dirava ena ura oi karaia, bona unai dainai oi daradara lasi iena lalo-namo oi abia. Paulo ena hereva hegeregerena, “lalo-namo abia mamina” oi abia. Paulo ia gwau, “bena lalo-namo abia mamina amo, helaro [ia vara].” Reana oi daradara sisina. Dahaka dainai Paulo ese ena hereva ena dokona kahanai “helaro” ia gwauraia? Oi ese nega daudau, nega ginigunana sivarai namona oi kamonai neganai, helaro oi abia vadaeni, ani?
18 Ia hedinarai goevagoeva, Paulo ese inai siri ai guna ita abia mauri goevadaena ena helaro ia herevalaia lasi. Ia herevalaia gauna ese unai ia hereaia; ia be dobu gauna, ita ia doria gauna ta. Mai kamonai ida ita haheauka bona unai amo mamina ita abia Dirava ese ita ia lalo-namo henia neganai, unai ese iseda helaro ginigunana ia habadaia bona hagoadaia. Unai guna ita abia helaro be hari ia momokani, goada, bona ita mamia momokani gauna ai ia lao. Unai helaro goadana be ia hedinarai goevagoeva. Ia be iseda mauri ibounai lalonai ia hedinarai. “Bona unai helaro be lalohisihisi ia havaraia lasi; badina be Dirava ena lalokau be lauma helaga, ita ia henia gauna, dekena amo iseda kudouna lalonai ia bubua vareai.”
19. Edena dala ai emu helaro be oiemu guriguri lalodiai oi gwauraia loulou diba?
19 Epafra be mai momokani ida ia guriguri, iena Kolose tadikaka bona taihu edia vairanai idia noho gaudia ese edia kudouna idia hamarerea noho bona idia ese unai gaudia idia daradaralaia lasi, badina ‘Dirava ena ura ibounai idia diba namonamo.’ Namona be ita ta ta be unai dala ai iseda helaro totona Dirava ita guriguri henia. Sibona emu guriguri lalodiai, oiemu tanobada matamata helarona oi gwauraia. Iehova oi hamaoroa unai tanobada matamatana oi ura henia bada, bona oi abia dae momokani unai do ia vara. Ia oi noia oiemu abidadama ia hagoadaia bona habadaia totona. Epafra ia guriguri Kolose taudia be ‘Dirava ena ura idia diba namonamo’ hegeregerena, namona be unai bamona oi guriguri danu. Namona be nega momo oi gurigurilaia.
20. Bema haida ese Keristani dala idia rakatania, dahaka dainai ita lalo-manoka lasi be namo?
20 Namo lasi haida idia gini goada lasi bona idia abidadama lasi dainai, do oi raka siri bona oi lalo-manoka. Reana haida do idia moru, idia raka siri, eiava idia manoka sibona. Unai kara be Iesu kahirakahira idia noho taudia, iena aposetolo taudia, huanai ia vara. To Iuda be Iesu ena mase dalana karaia tauna ai ia lao neganai, aposetolo taudia ma haida idia manoka eiava gaukara idia hadokoa, a? Lasi momokani! Petero ese Salamo 109:8 ena hereva ia gwauraia amo ia hahedinaraia ma ta be Iuda ena gabu do ia abia. Iena gabu abia tauna idia abia hidi, bona unai Dirava idia badinaia taudia ese edia haroro gaukara idia karaia noho. (Kara 1:15-26) Edia lalona idia hadaia do idia gini goada bona Dirava ena ura idia diba namonamo.
21, 22. Oi gini goada bona Dirava ena ura oi diba namonamo karana be edena dala ai ma haida ese do idia itaia?
21 Oi abia dae momokani diba, oi gini goada bona Dirava ena ura ibounai oi diba namonamo karana be ma haida ese do idia reaia lasi. Do idia itaia bona idia laloa bada. Daidia ese?
22 Oiemu tadikaka bona taihu, oi idia diba bona idia lalokau henia taudia, ese do idia itaia. Ena be idia momo ese edia hereva amo unai idia hahedinaraia lasi, to oiemu kara dainai 1 Tesalonika 1:2-6 ena hereva bamona idia laloa, ia gwau: “Ai be nega ibounai Dirava ai tanikiu henia umui dainai. Bona aiemai guriguri lalonai umui emui ladana ai gwauraia hanaihanai. Ai be Tamana Dirava ena vairanai, emui abidadama bona emui kara namodia ai herevalaia. Iesu Keriso umui lalokau henia bada dainai, umui gaukara noho mai goada danu. Mai laloa goada danu, iseda Lohiabada Iesu Keriso umui naria noho danu. . . . Badina be ai ese Sivarai Namona ai mailaia umui dekenai, hereva sibona dekenai lasi, to Lauma Helaga ena siahu dekenai danu. Oibe, ai diba momokani inai Sivarai Namona be hereva momokani dainai, ai gwauraia mai siahu danu. . . . Umui ese aiemai mauri dalana umui itaia, vadaeni aiemai mauri dala bamona umui noho, Lohiabada danu bamona umui noho.” Oi kahirakahira idia noho Keristani taudia be unai bamona idia laloa danu bema idia itaia ‘oi gini goada bona Dirava ena ura oi diba namonamo.’—Kolose 1:23.
23. Vaira lagani lalonai dahaka oi karaia totona oiemu lalona oi hadaia be namo?
23 Unai hegeregerena, oiemu guba Tamana danu be emu kara do ia itaia bona do ia laloa bada. Unai oi daradaralaia lasi. Dahaka dainai? Badina oi gini goada bona “Dirava ena ura ibounai” oi diba namonamo. Paulo ese Kolose taudia ia hagoadaia totona ia gwau: “Lohiabada ena ura hegeregerena do umui noho, bona nega ibounai umui ese ia do umui hamoalea.” (Kolose 1:10) Oibe, goevadae lasi taudia danu ese ia idia hamoalea diba. Oiemu Kolose tadikaka bona taihu be unai idia karaia. Oi kahirakahira idia noho Keristani taudia be hari unai idia karaia. Oi karaia diba danu! Unai dainai, namona be vaira lagani lalonai, dina ta ta ai oiemu guriguri bona oiemu kara ese do idia hahedinaraia, oiemu lalona oi hadaia dainai ‘do oi gini goada bona Dirava ena ura ibounai be do oi diba namonamo.’
Oi Laloatao Diba, A?
• Oi “gini goada” ena anina be dahaka?
• Oi guriguri neganai sibona emu noho dalana be edena bamona oi gwauraia be namo?
• Roma 5:4, 5 ena hereva hegeregerena, edena bamona helaro oi ura abia?
• Iseda stadi ese oi ia hagoadaia dainai, inai lagani lalonai dahaka oi ura karaia?
[Picture on page 20]
Epafra ia guriguri ena tadikaka be do idia gini goada, bona Keriso bona edia helaro do idia diba namonamo
[Pictures on page 23]
Oiemu helaro korikorina bona Dirava ena ura oi diba namonamo karana be taunimanima ma milioni momo ese idia hahedinaraia danu