“Gabu ma ta Dekenai Do Lau Lao be Namo, A?”
1 Iesu ena hahegani “do umui lao, bese ibounai be diba tahua taudia do umui halaoa” dainai, Iehova ena gwauhamata hesiai taudia momo be gaukara bada ia do noho gabudia dekenai idia lao. (Mat. 28:19) Paulo ena kara idia tohotohoa, ia ese inai boiboi herevana ia kamonai henia: “Makedonia kahana dekenai oi mai, oi durua ai.” (Kara 16:9) Edena dala namona ai unai oi karaia diba?
2 Oi Hegaegae Namonamo: Oiemu kongregesen ena teritori lalonai idia haroro momo lasi kahana ta ia noho, a? Bema ia noho, reana unai gabu dekenai oi gaukara goadagoada diba. Gabu ma ta dekenai lao totona emu lalona oi do hadaia lasi neganai, namona be emu kongregesen ena elda taudia ida oi herevahereva bena oi diba bema idia laloa oi hegeregere oi lao totona. Emui sekit naria tauna danu oi nanadaia diba, bema kahirakahira dekenai ia noho kongregesen ta ia diba, unuseniai oiemu hesiai gaukara oi habadaia totona. To, reana oi laloa namonamo murinai, oi davaria Papua New Guinea ena kahana ma ta dekenai heduru oi henia diba. Bema unai oi ura karaia, oi ura gaukara gabuna be oi bona emu kongregesen ena elda taudia ese brens opesi dekenai revareva do umui siaia bona ia lalonai tiokratik dalanai oi karaia gaudia umui hahedinaraia. Reana ia namo unai gabu oi vadivadi henia guna, bena gabeai oiemu lalona oi hadaia do oi lao momokani eiava lasi.
3 Dabu Gaudia Laloa: April lalonai heduru painia taudia edia namba matamata 404 ita davaria ese ita ia hagoadaia. Idia haida be regula painia taudia ai idia “lao” diba, a? Ai ese tadikaka ai hagoadaia bada, idia momo ese unai ful-taim gaukara karaia totona idia laloa namonamo totona. Papua New Guinea ena kongregesen idauidau dekenai, haroro gaukara idia hakaua bona idia habadaia diba, lauma dalanai idia goada tadikaka idia noho be mai anina bada. Gabeai, unai tadikaka namodia haida be, reana nega kwadogina lalonai, daudau gabudia, pablisa bona kamonai taudia ese lauma dalanai idia goada idia lao totona heduru bada idia abia be namo gabudia dekenai do idia lao diba. Hari ita itaia vadaeni, regula painia tadikaka haida be daudau idia noho grup durua totona idia lao dainai, anina namona idia havaraia. Momokani, unai oi karaia diba eiava lasi oi laloa neganai, namona be oi hamomokania sibona emu mauri durua gaudia oi abia diba. Oi do lao lasi neganai, noho gabuna oi laloa bona tahua be gau badana. Ita ura lasi ita laloa namonamo lasi bona ita karaharaga dainai ma Keristani ruma bese haida ita hametaua, idia be sibona edia gaudia dainai idia hekwarahi vadaeni.—1 Tes. 4:11, 12; 1 Tim. 6:8-11.
4 Namona be oi laloatao, herevana edeseniai oi noho to hekwakwanai haida do oi davaria. Oiemu noho dalana oi manadalaia gabuna dekenai hekwakwanai hanaia be haraga, to gabu idauna ta dekenai noho dalana hamatamaia lou be mai ena hekwarahi.