‘Makedonia Dekenai Oi Lao’ Diba, A?
1. Dahaka dainai Paulo bona ena turadia be Makedonia idia lao?
1 Lagani 49 C.E. bamona ai, Aposetolo Paulo be Suria Antioka ia rakatania ena misinari loaloa iharuana karaia totona. Ia ura Efeso bona Asia Minor ena taoni ma haida ia vadivadi henia. To, matahanai ta lalonai Dirava ese ena lauma helaga amo Paulo ia boiria ‘Makedonia dekenai ia lao’ totona. Ia bona ena turadia be mai moale ida unai boiboi idia abia dae, bona unuseniai kongrigeisen ginigunana idia haginia. (Kara 16:9, 10; 17:1, 2, 4) Hari inai negai, tano haida ai gogoa gaukarana be bada dainai, gaukara taudia momo idia noho be namo. (Mat. 9:37, 38) Unai gaukara oi durua diba, a?
2. Dahaka dainai haida be tano ma ta dekenai lao lalohadaina idia abia lasi?
2 Reana Paulo bamona misinari gaukara oi ura karaia, to tano ma ta dekenai lao lalohadaina oi abia lasi. Reana Gilead sikuli oi lao diba lasi badina emu mauri lagani ia bada, o oi be headava lasi taihu, o mai emu natudia maragidia. Reana tano ma ta dekenai oi lao lalohadaina oi abia lasi badina oi laloa oi hegeregere lasi gado ma ta oi dibaia totona. O reana moni ena hekwakwanai dainai emu tano oi rakatania bona tano ma ta ai hari oi noho, bona oi ura lasi rakatania. To mai guriguri ida unai gaudia oi lalohadailaia murinai, reana do oi davaria unai bamona noho dalana ese oi idia koua lasi, haroro taudia be momo lasi tanona ta dekenai oi lao totona.
3. Dahaka dainai tano ma ta ai haroro gaukara karaia totona misinari sikuli oi abia be gau badana lasi?
3 Misinari Sikuli Oi Abia be Namo, A? Dahaka ese Paulo bona ena turadia ia durua dainai anina namona ia vara? Idia be Iehova bona ena lauma helaga dekenai idia tabekau. (2 Kor. 3:1-5) Ena be emu noho dalana dainai misinari sikuli oi abia lasi, to tano ma ta ai haroro gaukara oi karaia diba. Danu laloatao, oi be Tiokratik Haroro Sikuli bona Hesiai Hebou amo diba oi abia noho. Bema emu tahua gauna be Gilead sikuli o unai bamona sikuli ta oi lao, vadaeni tano ma ta dekenai oi lao misinari gaukara oi mamia toho totona, unai ese gabeai oi do ia durua bema sikuli ma haida abia totona oi idia boiria.
4. Dahaka dainai mauri lagani bada taudia be tano ma ta ai idia haroro diba?
4 Mauri Lagani Bada Taudia: Edia mauri lagani ia bada bona edia helt ia namo lo Keristani taudia ese haroro taudia be momo lasi tanodia dekenai heduru namona idia henia diba. Oi be emu moni gaukara amo oi ritaea, a? Haida be gavamani amo heduru moni sisina idia abia, bona ogogami tanona ta dekenai idia lao neganai, unai moni idia gaukaralaia namonamo edia mauri durua gaudia idia hoia bona medikol heduru idia abia totona, bona unai gaudia edia davana be bada lasi.
5. Tano ma ta dekenai ia lao tadikaka ena ekspiriens oi gwauraia.
5 Elda bona painia gaukara ia karaia tadikaka ta be English gado idia herevalaia tanona ta amo ia mai. Ia be moni gaukara amo ia ritaea neganai, Sautist Asia dekenai ia lao bona turist idia loaloa momo gabuna ta ai ia noho, English gado grup maragina mai ena pablisa 9 ia durua totona. Unai grup ese unuseniai idia noho tano idauidau taudia 30,000 idia haroro henia. Lagani rua lalonai taunimanima 50 be hebou idia lao. Tadikaka ia gwau: “Iniseniai lau mai neganai, hahenamo momo lau abia bona lau moale!”
6. Haroro taudia be momo lasi tanona dekenai ia lao taihu ena ekspiriens oi gwauraia.
6 Headava Lasi Taihu: Iehova ese dala badana ai taihu ia gaukaralaidia, haroro taudia be momo lasi tanodia ai sivarai namona idia harorolaia totona. (Sal. 68:11) Headava lasi taihu matamata ta ena tahua gauna be tano ma ta ai ena haroro gaukara do ia habadaia, to ena tama sina be idia laloa momo dika ia davaria garina. Unai dainai ia ese politikol bona moni ena hekwakwanai idia vara momo lasi tanona ta ia abia hidi, brens opesi ia torea henia, bona unai tano ena sivarai ma haida ia dibaia. Lagani 6 lalonai ia be unai tano ai ia noho, bona hahenamo momo ia moalelaia. Ia gwau: “Egu tano dekenai Baibel stadi momo lau karaia lasi. To haroro taudia be momo lasi tanona ai stadi momo lau karaia, bona egu hadibaia dalana lau hanamoa.”
7. Tano ma ta dekenai idia lao famili ta ena ekspiriens oi gwauraia.
7 Famili: Bema mai emu natudia, unai ese oi ia koua tano ma ta dekenai sivarai namona harorolaia gaukarana oi durua totona, a? Headava tau bona hahine mai edia natudia rua—mauri lagani 8 bona 10—be unai idia karaia toho. Sinana ia gwau: “Ai moale emai natudia be iniseniai ai naria, badina spesel painia bona misinari taudia idia bamoa. Haroro taudia be momo lasi tanona ai hesiai gaukara ai karaia dainai hahenamo momo ai davaria.”
8. Oi hegeregere tano ma ta dekenai oi lao, ena be gado oi diba lasi, a? Mani oi gwauraia.
8 Gado: Gado ta dibaia karana oi laloa dainai, unai ese oi ia koua tano ma ta dekenai oi lao totona, a? Reana haroro taudia be momo lasi tanodia haida dekenai, taunimanima be oi diba gadona idia herevalaia. English gado idia herevalaia headava tau bona hahine be Spanish gado idia herevalaia tanona ta dekenai idia lao, unuseniai tano idauidau amo idia mai taudia idia noho bona idia be English gado idia herevalaia. Brens opesi ese idia hadibaia English kongrigeisen haida be heduru idia ura, bona unai kongrigeisen ta idia abia hidi bona nega rua idia vadivadi henia. Edia tano dekenai idia giroa lou bona hua ta ta ai edia moni idia gaukaralaia namonamo, unai amo lagani ta lalonai moni idia haboua. Guna idia lao tanona dekenai idia giroa lou gwauraia neganai, unuseniai idia noho tadikaka ese idia durua davana bada lasi rumana ta idia davaria totona.
9, 10. Edia tano idia rakatania bona tano ma ta ai idia noho taudia be dahaka lalohadai idia abia, bona dahaka dainai?
9 Edia Tano Idia Rakatania Bona Tano Ma ta ai Idia Noho Taudia: Reana hereva momokani oi do diba lasi neganai, emu tano oi rakatania bona tano ma ta ai oi noho, a? Reana emu tano korikori ai haroro taudia be momo lasi. Oi laloa heduru henia totona oi giroa lou diba, a? Reana moni gaukara bona noho gabuna oi davaria be auka lasi bona gado oi diba vadaeni, to tano ma ta amo ia mai tauna dekenai be do ia auka. Danu, reana taunimanima be do idia ura oi amo Basileia sivaraina idia kamonai, to tano ma ta amo ia mai tauna dekenai idia kamonai be ia auka sisina.
10 Tau ta be ena tano Albania ia heautania bona Italy dekenai ia lao, unuseniai moni gaukara ia davaria bona moni ia siaia Albania dekenai ena ruma bese totona. Hereva momokani lalonai ia vareai murinai, haroro taudia be momo lasi tanona dekenai idia ura lao Italy spesel painia taudia haida dekenai Albania gado ia hadibaia matamaia. Unai tadikaka ia gwau: “Idia be lau rakatania tanona dekenai do idia lao, bona gado idia diba lasi, to idia moale idia lao totona. Egu gado bona kastom be Albania. Lau giroa lou be namo.” Tadikaka be ena lalona ia hadaia Albania dekenai ia giroa lou, sivarai namona harorolaia gaukarana ia durua totona. Ia gwau: “Italy ai moni gaukara lau rakatania dainai, lau lalohisihisi lasi. Lau be Albania dekenai gaukara namona lau davaria. Lau laloa gauna be, mai kudouna ibounai ida Iehova hesiai henia gaukarana be mai anina bada bona moale korikori ia havaraia.”
11, 12. Tano ma ta idia ura lao taudia ese dahaka idia karaia be namo?
11 Karaia Dalana: Makedonia dekenai idia do lao lasi neganai, Paulo bona ena turadia be idia ura west kahana dekenai idia lao, to “lauma helaga ese idia ia koua” dainai not kahana dekenai idia lao. (Kara 16:6) Bitunia dekenai idia lao kahirakahira neganai, Iesu ese ia koudia. (Kara 16:7) Iehova ese Iesu amo haroro gaukara ia gunalaia noho. (Mat. 28:20) Unai dainai, bema oi ura tano ma ta dekenai oi lao, namona be guriguri amo Iehova ena heduru oi tahua.—Luka 14:28-30; Iam. 1:5; Maua ladana “Edena Bamona Do Oi Diba Oi Ura Lao Tanona Dekenai Haroro Taudia be Momo Lasi?” itaia.
12 Elda o lo Keristani taudia oi noia mai momokani ida edia lalohadai idia gwauraia totona. (Aon. 11:14; 15:22) Ai halasia buka o magasin ai, tano ma ta ai haroro gaukara idia karaia sivaraidia oi duahia bona tahua karana oi karaia, oi ura lao tanona dibaia totona. Oi ura lao tanona oi vadivadi henia bona reana dina haida oi noho diba, a? Bema oi laloa tano ma ta dekenai do oi lao, inai lagani ena yearbook ai ia noho adres oi gaukaralaia, unai tano ena brens opesi oi tore henia, hereva ma haida oi diba totona. To, emu revareva be maoromaoro brens opesi dekenai oi siaia lasi, emu elda taudia oi henia, bona idia ese hereva haida do idia torea bena siaia.—Iehova Ena Ura Ia Karaia Orea bukana ena rau 111-112 itaia.
13. Edena dala ai brens opesi ese oi do ia durua, to emu maduna be dahaka?
13 Brens opesi ese revareva amo unai tano ena sivarai haida do ia siaia, oi ia durua abia hidi oi karaia totona. To oi totona inai gaudia do idia karaia lasi: Moni dalanai oi idia durua totona revareva amo embasi do idia hadibaia, o dala do idia karaia unai tano ai oi noho, o visa bona gavamani ena pepa ma haida do idia hegaegaelaia, o emu noho rumana do idia tahua. Lasi, unai be oiemu maduna, oi do lao lasi neganai, unai gaudia oi tahua bona hegaegaelaia namonamo guna. Danu, emu maduna be unai tano ena embasi do oi itaia, visa bona moni gaukara ena gwaumaoro pepadia abia totona. Namona be tano ma ta dekenai idia ura lao taudia idia hegeregere sibona edia mauri durua gaudia idia abia totona bona gavamani ena taravatu idia badinaia.—Gal. 6:5.
14. Bema haroro gaukara idia taravatua tanodia dekenai oi lao, dahaka dainai oi naria namonamo?
14 Haroro Gaukara Idia Taravatua Tanodia: Tano haida ai tadikaka taihu be edia tomadiho karana idia karaia idia aonega be namo. (Mat. 10:16) Unai tanodia dekenai idia vadivadi o noho pablisa idia naria namonamo lasi neganai, taunimanima ese iseda gaukara do idia itaia bona unai gabu ai idia noho tadikaka taihu dekenai hekwakwanai idia havaraia diba. Bema oi ura unai bamona tanona ta dekenai oi lao, mani emu kara emu elda oreana amo brens opesi oi tore henia guna.
15. Tano ma ta idia lao diba lasi taudia be edena dala ai haroro gaukara idia habadaia diba?
15 Bema Oi Lao Diba Lasi: Bema tano ma ta oi lao diba lasi, oi lalomanoka lasi. Reana oi totona “gaukara ena iduara badana” ta ia kehoa. (1 Kor. 16:8, 9) Reana emu sekit naria tauna be haroro taudia be momo lasi gabudia haida ia diba, bona emu noho gabuna amo idia daudau lasi. O reana kahirakahira ia noho idau gado kongrigeisen o grup ta oi durua diba. O reana emu kongrigeisen ai haroro gaukara oi habadaia diba. Herevana emu noho dalana be edena bamona, to mai kudouna ibounai ida Iehova oi tomadiho henia be gau badana.—Kol. 3:23.
16. Haroro totona tano ma ta dekenai idia ura lao taudia be edena bamona ita kara henia?
16 Haroro totona tano ma ta dekenai ia ura lao lo Keristani tauna ta oi diba, a? Vadaeni ia oi durua bona hagoadaia be namo! Paulo be Suria Antioka ia rakatania neganai, Suria Antioka be Roma basileia ena siti badana ihatoina (Roma be ginigunana bona Alesandria be iharuana). Unai be teritori badana bona toana be Antioka kongrigeisen idia ura Paulo ese idia do ia durua, unai dainai bema ia rakatanidia do idia reaia bada. To, Baibel ia hahedinaraia lasi tadikaka be Paulo idia hamaoroa ia noho totona. Idia be sibona edia hanua idia laloa lasi, to idia laloatao “witi umana be tanobada.”—Mat. 13:38.
17. Dahaka dainai oi ura Makedonia—haroro taudia be momo lasi gabudia—dekenai oi lao?
17 Paulo bona ena turadia be Makedonia idia lao ena boiboi idia abia dae dainai hahenamo momo idia abia. Makedonia ena siti Filipi ai idia noho neganai, Lidia idia davaria, bona “Iehova ese ena lalona ia kehoa bona Paulo ia gwauraia herevadia ia abia dae.” (Kara 16:14) Lidia bona ena ruma bese ibounai idia bapatiso neganai, Paulo bona ena misinari turadia edia moale mani oi laloa! Tano momo ai, Lidia bamona kudou-maoro taudia idia noho, bona idia be Basileia sivaraina idia do kamonai lasi. Bema Makedonia—haroro taudia be momo lasi gabudia—dekenai oi lao, kudou-maoro taudia do oi davaria bona durua dainai do oi moale.
[Box on page 5]
Edena Bamona Do Oi Diba Oi Ura Lao Tanona Dekenai Haroro Taudia be Momo Lasi?
• Inai lagani ena Yearbook oi itaia. Bona oi itaia unai tano taudia huanai pablisa hida idia noho.
• Indeks dekenai unai tano ia herevalaia atikol bona ekspiriens oi duahia.
• Tano ma ta dekenai idia vadivadi o noho pablisa haida oi hereva henia.
• Bema oi ura lao tanona dekenai oi diba gadona ta ai oi haroro diba, namona be Intanet ai oi tahua unai tano ai taunimanima hida be unai gado idia herevalaia.