Dirava Ena Kara Badadia Oi Laloa
1 Dina namodia toi lalonai, “Dirava Ena Hereva Badinaia Taudia” Distrik Hebouhebouna dekenai ita lao. Iseda lalona be dina ibounai maurina ena hekwarahi gaudia amo ita kokia bona Iehova ena hoa karadia ita laloa. Unai program idia hegaegaelaia, iseda abidadama Dirava bona iena Hereva dekenai ita habadaia totona, iseda hetura karana ia ida ita hagoadaia totona, bona hesiai gaukara dekenai iseda ura ita habadaia totona. Edena dala ai ita idia hadibaia gaudia amo namo ita abia?—Ioa. 13:17.
2 Ruma Bese Taudia ese Dirava Ena Hereva Idia Badinaia: Hereva ta mai ena kahana toi ena sinado “Dirava Ena Hereva Oi Kamonai” ese ita ia durua lauma dalanai iseda ruma bese ena goada ita itaia namonamo totona. Natudia be idia ura gau idauidau idia dibaia. Unai dainai, Dirava idia badinaia tama sina idia hagoadaia edia ruma bese be lauma dalanai idia goada totona ruma bese ena Baibel stadi do idia karaia. Ruma bese ena kwarana momo be inai buklet matamatana Dirava Ena Turana ai Oi Lao Diba! be edia natudia ida idia herevalaia. Unai ese idia do ia durua hetura karana namona Iehova ida do idia moalelaia. Tama sina e, emu natudia dekenai Dirava ena hemami laloa bada karana do umui hadibaia. Oiemu lalokau ia bona ia karaia gaudia dekenai oi hahedinaraia. (Sal. 103:2) Lauma gaudia umui tahua bona davaria totona bona mai goada ida Iehova umui hesiai henia totona do umui gaukara hebou.
3 Dirava Ena Hereva ese Iseda Raka Dalana Ia Hadiaria: Ita moale bada inai buka matamatana Isaiah’s Prophecy—Light for All Mankind 1 ita abia neganai. Bema English gado oi duahia diba, unai volium ginigunana oi duahia sisina vadaeni, a? Isaia bukana ese Dirava idia badinaia lasi besedia edia hahemaoro aukadia bona Basileia ena hahenamo badadia Dirava ena taunimanima totona be ia perovetalaia. (Isa. 34:2; 35:10) Unai ese Iehova bona ia gaukara dalana abidadama henia karana ia hagoadaia.—Isa. 12:2-5.
4 Isaia be kara dikadia idia vara lalonai danu, Iehova ia badinaia noho. Dirava ese ia boiria iena gwaukau tauna ai do ia lao totona, Isaia ia haere: “Lau be inai, do lau lao! Lau do oi siaia.” (Isa. 6:8) Iena kara ita lalohadailaia karana ese ita do ia hagoadaia sivarai namona do ita harorolaia noho, bona ‘tanobada ibounai haroro’ gaukarana do ita goadalaia.—Mat. 24:14.
5 Iehova ena gaukara ita laloa bada karana ese iena goada do ia abia isi. Vadaeni, Dirava ena hereva badinaia tauna ena hahenamo oi laloa bada!