“Nega Korikori ai Idia Gwauraia Herevana”
1 Mauri sivaraina be ma haida danu oi herevalaia be hekwakwanai ta oi dekenai, a? Oi laloa aonega herevana ta do oi gwauraia, emu kamonai taudia edia lalona oi veria totona, a? Iesu ese ena hahediba taudia ia siaia neganai, ia gwau: “Umui raka noho neganai do umui haroro, umui gwau, ‘Guba Basileia be kahirakahira ia mai vadaeni.’ ” (Mat. 10:7) Unai hereva be auka lasi bona mai hekwarahi lasi ida idia gwauraia diba. Hari inai negai, ia idau lasi.
2 Nega momo hereva momo oi gwauraia lasi, herevahereva oi hamatamaia totona. Filipo ese Etiopia eunuko tauna ia hedavari henia neganai, ia nanadaia: “Oi diba dahaka oi duahia, a?” (Kara 8:30) ‘Nega korikorina ai ia gwauraia herevana’ dainai, edia herevahereva ese anina namona ia havaraia!—Aon. 25:11, NW.
3 Emu haroro gaukara dekenai unai bamona hereva oi gaukaralaia diba. Edena dala ai? Gau idauidau oi itaia namonamo, bona noho daladia idauidau hegeregerena emu hereva oi gwauraia. Henanadai ta oi henia bona ena haere oi kamonaia.
4 Henanadai Badadia Haida: Herevahereva oi hamatamaia totona, reana inai henanadai ta oi gaukaralaia diba:
◼ “Emu tomadiho karana lalonai Lohiabada Ena Guriguri (eiava, Aiemai Tamana) oi gaukaralaia, a?” (Mat. 6:9, 10) Ena kahana ta oi gwauraia, bena oi gwau: “Taunimanima haida idia henanadai, ‘Dirava ena ladana be daika, Iesu ia gwau do ita hahelagaia?’ Ma haida idia henanadai, ‘Iesu ia gwau do ita gurigurilaia be namo Basileiana be dahaka? Inai henanadai dekenai haere namodia oi davaria vadaeni, a?”
◼ “Inai bamona oi laloa vadaeni: ‘Mauri ena anina be dahaka?’ ” Oi hahedinaraia unai be Dirava dibaia karana ida ia hakapua.—Had. 12:13; Ioa. 17:3.
◼ “Oi laloa mase do ia ore, a?” Isaia 25:8 bona Apokalupo 21:4 oi gaukaralaia haere maorona oi henia totona.
◼ “Auka lasi dalana ta ia noho tanobada ena heiriheiri hamaoromaoroa totona, a?” Oi hahedinaraia Dirava ese ita ia hadibaia ‘oiemu badibadinai tauna oi lalokau henia.’—Mat. 22:39.
◼ “Nega ta guba padana amo ia mai hadikaia gauna badana ta ese tanobada do ia hadikaia ore, a?” Baibel ena gwauhamata tanobada be do ia noho ela bona hanaihanai be idia ida oi herevalaia.—Sal. 104:5.
5 Sivarai namona be auka lasi dalanai oi herevalaia maoromaoro mai manau ida. Iehova ese emu hekwarahi hereva momokani ena “hereva” be ma haida dekenai oi hadibaia totona, be do ia hanamoa.