Diba Maorona Oi Abia Vaira Negana Totona

Nega haida vaira negana ai do idia vara gaudia oi laloa, a? Baibel ese ia hahedinaraia kahirakahira mai anina bada gaudia do idia vara bona unai ese taunimanima ibounai edia mauri do ia haidaua.

Iesu ese “Dirava ena Basileia be ia kahirakahira” dalana be ita dekenai ia hadibaia. (Luka 21:31) Ia peroveta, gau haida amo, tuari, tano mareremarere badadia, hitolo bona daihanai gorere do idia vara—unai gaudia be hari ita itaia noho.—Luka 21:10-17.

Baibel ese ita ia hadibaia taunimanima edia lohia negana ena “dina gabediai” do ia vara gauna ta be taunimanima be edia kara dika do idia habadaia. Inai sivarai oi duahia diba 2 Timoteo 3:1-5 ai. Unai lalohadai bona kara idauidau oi itaia neganai, do oi daradara lasi, Baibel ena peroveta herevana be hari ia vara noho.

Anina be dahaka? Nega ia kahirakahira Dirava ena Basileia ese senisi badana do ia karaia, unai ese tanobada dekenai mauri do ia haidaua momokani. (Luka 21:36) Baibel lalonai, Dirava ese tanobada bona tanobada do idia noholaia taudia totona gau namodia ia gwauhamatalaia. Haheitalaia haida be inai.

LOHIA TAUNA NAMONA

“Dagi bada be unai Tau [Iesu] dekenai ia henia, bese ibounai bona iduhu ibounai bona gado ibounai taudia ese iena hesiai gaukara do idia karaia. Iena siahu be do ia noho hanaihanai, bona iena basileia be do ia doko diba lasi.”—DANIELA 7:14.

Anina be dahaka? Dirava bona ena Natuna ese gavamani ta do idia haginia, ia be unai gavamani ena King ai do ia lao bona ia henunai mauri namona oi moalelaia diba.

GORERE BE LASI

Kekeni matamata ta be ena wilsea amo ia toreisi bona ia raka

“Ta ese do ia gwau lasi, ‘Lau be gorere.’”—ISAIA 33:24.

Anina be dahaka? Do oi gorere lasi eiava diseibol be lasi; do oi mase lasi.

MAINO KORIKORI

“Tuari be Dirava ese ia hadokoa noho, tanobada kahana ibounai dekenai.”—SALAMO 46:9.

Anina be dahaka? Tuari be do ia ore bona ia havaraia hisihisi ibounai do idia ore.

TANOBADA BE TAUNIMANIMA NAMODIA AMO DO IA HONU

“Kara dika taudia do idia ore . . . Manau taudia ese noho gabuna tano do idia abia.”—SALAMO 37:10, 11.

Anina be dahaka? Kara dika taudia be do idia noho lasi, to Dirava idia hesiai henia taudia sibona do idia noho.

TANOBADA BE PARADAISO AI DO IA LAO

“Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi.”—ISAIA 65:21, 22.

Anina be dahaka? Tanobada be do ia namo herea. Dirava ese iseda guriguri do ia hagugurua totona, iena ura gauna be “tanobada dekenai do ia vara.”—Mataio 6:10.

Taunimanima be Paradaiso ai mauri namona idia moalelaia