Haida Edia Lalona Veria Dalana
1 Ita diba aposetolo Paulo ese ena hesiai gaukara lalonai ma haida edia lalona ia veria. (Kara 19:26) King Agripa danu ese ia hamaoroa, ia gwau: “Nega kwadogi lalonai lauegu lalona do oi veria bona Keristani tauna ta ai lau oi halaoa.” (Kara 26:28, NW ) Edena dala amo Paulo ena hesiai gaukara ese ma haida edia lalona ia veria? Paulo be ena haroro herevadia ia haidaua kamonai taudia edia lalohadai hegeregerena, bona Baibel amo ena hereva ia hamomokania.—Kara 28:23.
2 Paulo ita tohotohoa totona, iseda hesiai gaukara lalonai taunimanima edia lalona ita veria be namo. Edena dala amo? Haida ita hereva henidia bona ita kamonai henidia neganai lalo-parara ita gaukaralaia be namo. (Aon. 16:23) Dala badadia toi ese ita do idia durua unai do ita karaia totona.
3 Kamonai Namonamo: Ta ia hereva neganai, umui lalo-tamona gauna oi herevalaia diba totona do oi kamonai namonamo. Bema ura lasi herevana ta ia gwauraia, namona be ia herevalaia gauna ena anina oi tahua. Oi do ia durua bema ia abia dae gaudia, dahaka dainai ia abia dae, bona dahaka dainai unai gauna ese ena lalona ia veria do oi diba. (Aon. 18:13) Mai aonega ida dala oi kehoa iena lalohadai ia gwauraia totona.
4 Henanadai Henia: Bema ta ese Toi Tamona herevana ia abia dae, reana do oi henanadai: “Oi maragi negana amo Toi Tamona herevana oi abidadama henia, a?” Bena oi henanadai: “Baibel ena lalohadai unai hereva dekenai oi tahua namonamo vadaeni, a?” Reana inai bamona do oi henanadai danu: “Bema Dirava be Toi Tamona ena kahana ta, ita laloa diba Baibel ese do ia hahedinaraia goevagoeva, ani?” Do oi abia haerena ese oi do ia durua bona Baibel ia gwauraia dalana be unai tauna dekenai do oi herevalaia diba.
5 Lalohadai Maorodia Gaukaralaia: Hahine ta ia abia dae Iesu be Dirava bona Witnes ta ese ia nanadaia: ‘Bema oi ura oi hahedinaraia taunimanima rua be idia hegeregere, edena ruma bese taudia amo unai do oi haheitalaia?’ Ia haere: “Reana tadikaka rua amo.” Witnes tauna ia gwau: “Reana idia hegeregere momokani hekapa taudia amo. To Iesu ese ita ia hadibaia Dirava ita laloa Tamana bamona bona ia ita laloa Natuna bamona neganai, edena lalohadai ia hahedinaraia ita dekenai?” Unai hahine ia lalo-parara ta be ia bada bona iena siahu ese ma ta ena siahu ia hanaia. (Mat. 20:23; Ioa. 14:28; 20:17) Lalona veria herevadia ese ena lalona bona kudouna idia hamarerea.
6 Momokani, ena be lalohadai maorodia ita gaukaralaia bona iseda hereva dalana be namo herea, to momo ese hereva momokani do idia abia dae lasi. To Paulo bamona, namona be ita hekwarahi iseda teritori dekenai kudou maoro taudia ita tahua, edia lalona ita veria Basileia sivaraina do idia abia dae totona.—Kara 19:8.