Lalokau ese Ita Ia Hasiahua Dainai Ita Haroro
1 Taunimanima idia diba ita Iehova ena Witnes taudia be Basileia ena sivarai harorolaia taudia. (Mat. 24:14) Tanobada ibounai lalonai haroro taudia be milioni 6 idia hanaia; ma haida ese haroro gaukara idia hamatamaia neganai unai namba ia bada ia lao. Haroro gaukara idia karaia taudia be unai namba lalonai idia duahia.
2 Dahaka ese ita ia hasiahua dainai unai gaukara mai ena hekwarahi ita karaia? Ita idia doria lasi, moni amo ita idia veria lasi, bona ladana bada idia gwauhamatalaia lasi. Matamanai, ita momo ita gari badina ita mamia ita be hegeregere lasi, bona nega momo taunimanima ese iseda hereva idia dadaraia. (Mat. 24:9) Iseda gaukara idia itaia taudia momo idia lalo-parara lasi dahaka ese ita ia hasiahua dainai ita haroro. Ita haheauka totona badina badana ia noho.
3 Lalokau Ena Siahu: Iesu ese hahegani hereadaena ia hahedinaraia, ia gwau namona be ‘mai emai kudouna, lauma, lalona, bona goada ibounai ida Iehova ita lalokau henia.’ (Mar. 12:30) Iseda lalokau Iehova dekenai be ia bona iena kara ita laloa bada karana amo ia vara—ia be Siahu Ibounai Lohiana, gau ibounai Havaraia Tauna, bona ia ‘hegeregere momokani taunimanima ibounai ese hairai bona mataurai ia dekenai do idia henia.’ (Apok. 4:11) Iena kara idia hereadae.—Eso. 34:6, 7.
4 Iehova ita diba bona ita lalokau henia karana ese ita ia hasiahua dainai taunimanima edia vairanai iseda diari ita hahedinaraia. (Mat. 5:16) Taunimanima edia vairanai ia ita hanamoa, ia karaia kara namodia ita herevalaia, bona iena Basileia ena sivarai ita harorolaia neganai, iseda diari ia hedinarai. Guba ena ataiai ia roho aneru ia karaia hegeregerena, ita ese ‘noho hanaihanai Sivarai Namona ita gwauraia hedinarai bese ibounai, iduhu ibounai, gado ibounai bona kopina idauidau ibounai taudia dekenai.’ (Apok. 14:6) Iseda lalokau ese ita ia hasiahua dainai tanobada ibounai haroro gaukarana ia vara.
5 Tanobada taudia idia laloa iseda haroro gaukara idia dadaraia be namo badina ia be “kavakava” karana ta. (1 Kor. 1:18) Idia hekwarahi bada iseda gaukara idia koua totona. To iseda lalokau ese ita ia hagoadaia dainai aposetolo taudia bamona mai gari lasi ida ita gwau, ‘ita itaia bona ita kamonai gaudia ita hunia diba lasi, emai uduna ai koua diba lasi. Dirava ita kamonai henia be namo, taunimanima ita kamonai henia be dika.’ (Kara 4:20; 5:29) Herevana haroro gaukara idia koua toho, to tanobada ibounai lalonai ia bada ia lao noho.
6 Iseda lalokau Iehova dekenai be lahi bamona bona ita ia hasiahua iena hoa kara badadia ita gwauraia hedinarai totona. (Ier. 20:9; 1 Pet. 2:9) Ita ese “bese idauidau taudia dekenai, Lohiabada ena kara namodia do [ita] hadibaia . . . badina be ia ese, kara badadia ia karaia vadaeni”!—Isa. 12:4, 5.