‘Oi Haroro Goada Noho’

¹ Aposetolo Paulo be Korinto dekenai ia noho neganai palai rumadia turia gaukarana ia karaia ita duahia neganai, reana do ita laloa diba unai gaukara ese ena haroro gaukara ia hamaragia. To, Kara 18:5 ia gwau: “Paulo ese iena nega ibounai ia haroro goada noho. Iuda taudia dekenai ia hadibaia goada Iesu be Keriso.” Dahaka dainai Paulo ia haroro goada? Ena be Korinto dekenai momo be abidadama taudia ai idia lao vadaeni, to Lohiabada ese ia hamomokania unai hanua dekenai taunimanima momo be hahediba taudia ai do idia halaoa diba. (Kara 18:​8-11) Ita danu be unai badina tamona dainai hesiai gaukara ita goadalaia noho be namo, a? Oibe. Taunimanima momo do ita davaria bona idia dekenai hereva momokani do ita hadibaia diba.

² April Lalonai Emu Haroro Negana Oi Habadaia: Reana hua ibounai lalonai emu tahua gauna be sivarai namona harorolaia gaukara dekenai oi bisi. To hua haida ese dala momo idia kehoa ‘oi haroro goada’ totona. April huana, Memorial ita karaia negana, be unai bamona danu. Emu noho dalana be ia hegeregere dainai vanegai hua lalodiai heduru painia gaukara oi karaia eiava emu hesiai gaukara oi habadaia vadaeni, a? Unai idia karaia pablisa taudia momo be hahenamo bada idia abia. (2 Kor. 9:6) Bema oi karaia diba gaudia ibounai oi karaia, namona be oi laloatao Iehova ese mai emu kudouna ibounai ida oi karaia gaukarana ia moalelaia. (Luka 21:​2-4) Herevana emu noho dalana be edena bamona, to namona be April lalonai emu tahua gauna be ‘oi haroro goada.’ Bona oi laloaboio lasi hua dokonai emu haroro gaukara ena ripoti oi henia, unai amo emu hekwarahi horadia be Iehova ena taunimanima oredia edia ida do idia haboua.

³ Memorial Dekenai Idia Mai Kamonai Matamata Taudia Oi Vadivadi Henidia: Lagani gunanai Papua New Guinea dekenai, Memorial dekenai idia mai taudia be 16,347. Inai lagani ai idia mai taudia edia namba ita do diba lasi. To, ripoti ese idia hahedinaraia haroro gaukara amo “anina” badana do ita gogoa diba. (Mat. 9:​37, 38) Unai dainai, karaharaga dala oi karaia Memorial dekenai idia mai kamonai taudia oi vadivadi henidia bona lauma dalanai oi durudia. Karaharaga oi vadivadi lasi neganai dala oi kehoa ‘Satani ese edia lalona dekenai ia noho basileia ena hereva do ia kokia.’ (Mat. 13:19) Vadivadi haraga karana ese do ia hahedinaraia oi be ‘oi haroro goada noho.’

⁴ Haroro Gaukara Idia Rakatania Taudia Oi Durua Noho: February lalonai haroro gaukara idia rakatania taudia durua gaukara badana ita hamatamaia. Bema elda taudia ese unai taudia haida idia do vadivadi henia lasi, April ena dokona ia do ginidae lasi neganai, dala idia hegaegae idia vadivadi henidia totona be namo. Elda taudia ese unai taudia ta ta edia hekwakwanai ena badina do idia tahua bona Iehova do idia hesiai henia goada lou totona heduru dalana namona do idia laloa. Unai heduru namona ese ia hahedinaraia elda taudia be “Dirava ese ia henia mamoe orea” naria maduna idia laloa bada. (1 Pet. 5:2; Kara 20:28) Gima Kohorona, September 15, 1993, rau 22-3 ai, heduru herevadia namodia ia henia bona elda taudia ese haroro gaukara idia rakatania ena badina badadia ima amo ta idia herevalaia neganai. Reana, haida be April lalonai haroro gaukara do idia matamaia lou diba.

⁵ Momo Oi Durua Bapatiso Lasi Pablisa ai Idia Lao: Emu natudia be idia hegeregere sivarai namona ena pablisa matamatadia ai do idia lao totona, a? Idia ida Baibel oi stadilaia taudia ma haida be edena bamona? Bema elda taudia ese idia dekenai gwaumaoro idia henia, April be nega namona haroro gaukara do idia matamaia totona, ani? Bema ta be lauma dalanai ia goada ia lao noho bona Dahaka Ita Karaia? buklet bona Diba bukana ia stadilaia vadaeni, reana Baibel stadi be buka iharuana amo umui karaia diba​​—reana Dirava Ena Hereva bukana, Maino bukana, eiava Tomadiho bukana amo. Oiemu tahua gauna be stiuden tauna oi durua hereva momokani dekenai lalo-parara do ia abia, bapatiso lasi pablisa ai do ia lao, bona ia gwauhamata bona bapatiso Iehova ena Witnes ta ai do ia lao.​—Ef. 3:​17-19; 1 Tim. 1:12; 1 Pet. 3:21.

⁶ Stadi oi karaia hanaihanai karana bona oiemu Baibel stiuden taudia oi laloa bada karana ese do ia durudia, hereva momokani idia abia dae momokani totona. Witnes tauna ta ese headava tau burukana bona ena adavana ia davaria bona mai edia moale ida Baibel stadi idia abia dae. To idia ruaosi dainai pura toi lalonai stadi idia karaia diba lasi. Gabeai stadi idia hamatamaia diba. Bena, idia ruaosi ese kahirakahira pura iharuana ta ta idia stadi lasi. To dokonai, hahine be lauma dalanai ia goada ia lao bona bapatiso ia abia. Unai tadikaka ia gwau: “Bapatiso ia abia murinai, hahine buruka be mai moale danu ia tai, bona unai ese lau bona egu adavana dekenai moale ena taitai ia havaraia.” Oibe, “haroro goada noho” karana ese moale bada ia havaraia!

⁷ Baibel ena peroveta herevadia bona tanobada dekenai idia vara gaudia ese ia hahedinaraia ita be dokona negana ai ita noho. Hari be nega namona Dirava ena taunimanima ese ma haida dekenai sivarai namona idia ‘harorolaia goada noho.’ Aposetolo Paulo ia gwau, Lohiabada ena gaukara lalonai, iseda “hekwarahi be hekwarahi kava lasi momokani.”​—1 Kor. 15:58.