“Taunimanima Ibounai Dekenai Kara Namodia Do Ita Karaia”
1 ‘Dirava Ena Hereva Ibounai Harorolaia Haorea’ bona ‘Kara Namodia Do Ita Karaia’ Noho be February bona March 2002 edia Iseda Basileia Gaukara lalonai idia udaia pepadia edia sinado. (Kol. 1:25; 1 Tim. 6:18) Unai udaia pepadia lalonai ita idia hagoadaia do ita hekwarahi, kamonai taudia ita durua Memorial dekenai idia mai totona, idia haroro lasi pablisa taudia ita durua kongregesen idia bamoa lou totona, bona iseda natudia bona idia hegeregere Baibel stiuden taudia ita durua, sivarai namona harorolaia gaukarana idia hamatamaia totona. Reana iseda hekwarahi amo ia vara anina ita moalelaia vadaeni. Hari, “dala ita davaria neganai, taunimanima ibounai dekenai kara namodia do ita karaia” noho.—Gal. 6:10.
2 Idia Oi Boiria Do Idia Mai Lou: Papua New Guinea ai, idia hanaia laganidia toi lalonai, sivarai namona idia harorolaia lasi taudia 12,000 ia hanaia be Memorial dekenai idia mai. Unai kara amo ita diba idia be kamonai taudia dainai, dahaka ita karaia be namo “mauri hanaihanai idia ura kudou-maoro taudia ibounai be abidadama taudia ai idia lao” totona? (Kara 13:48, NW ) Idia oi hagoadaia, karaharaga kongregesen heboudia dekenai do idia mai lou.
3 Reana kamonai tauna be Kongregesen Buka Stadi dekenai Daniela ena peroveta herevana ena stadi ia moalelaia totona oi boiria be namo, ani? Bema oi be kamonai tauna ta ena varavara eiava turana ta bona Tiokratik Haroro Sikuli lalonai hereva do oi henia, reana oi ura ia oi boiria emu hereva ia kamonai totona. Vaira pura lalodiai do idia henia pablik tok edia hereva kwaradia be ia dekenai oi hadibaia. (Sediual matamata be notisbod dekenai ia noho be namo.) Dala iboudiai, ta dekenai Iehova tomadiho henia urana oi habadaia toho. Bona momokani, bema kongregesen pablisa ta ida Baibel ia do stadilaia lasi, ia dekenai stadi oi herevalaia diba.
4 Idia Haroro Lasi Pablisa Taudia Oi Hagoadaia: Memorial dekenai idia mai taudia momo ese Iehova dekenai gwauhamata idia karaia vadaeni. To nega ta, sivarai namona harorolaia gaukarana idia hadokoa. Paulo ese ita ia hagoadaia “kara namodia do ita karaia. To Keriso ena abidadama henia taudia do ita durua bada herea be namo.” (Gal. 6:10) Unai dainai, idia haroro lasi pablisa taudia ita durua be namo.
5 Reana haida be elda taudia bona ma haida edia hagoadaia herevadia dainai, haroro gaukara idia hamatamaia lou vadaeni. Bema elda taudia ese oi idia abia hidi haroro gaukara ia matamaia lou pablisa ida oi gaukara totona, namona be oi diba emu lalokau Iehova dekenai bona emu ura bada haroro gaukara dekenai ese ena lalo-goada do ia habadaia. Haroro daladia idauidau be ia dekenai oi hahedinaraia, bena ia ese do ia moalelaidia, haroro gaukara do ia karaia noho, bona Iehova ena hahenamo do ia abia.
6 Pablisa Matamata Oi Durua: Kamonai matamata hahine ta ese ia itaia Dirava ena orea momokanina ia davaria neganai, ia ura maoromaoro haroro gaukara ia hamatamaia. Unai totona dahaka ia karaia guna be namo ia dibaia neganai, ia gwau: “Vadaeni, lau ura karaia.” Bema ta dekenai Baibel stadi oi karaia bona hari idia abia dae haroro gaukara ia hamatamaia totona, namona be ia oi durua bena ia danu do ia “ura karaia.” Ia oi durua hanaihanai pura ta ta ai haroro gaukara totona ia hegaegae bona ia karaia.
7 Bema emu natuna be bapatiso lasi pablisa ai ia lao, ia ida oi gaukara, iena mauri lagani bona diba hegeregerena ena kara ia hanamoa totona. Bema ia oi durua sisina, reana do oi hoa badina tau ta ida ia herevahereva, Baibel ia duahia, bona buka haida ia hahedinaraia diba. Bema haroro gaukara lalonai kamonai tauna ia davaria, ia oi hadibaia, lou henia ia karaia bona unai tauna ia durua totona.
8 Oi Sibona Emu Haroro Gaukara Oi Habadaia: Emu noho dalana ia hegeregere dainai Memorial negana murinai danu emu haroro gaukara oi habadaia diba, a? Pura ta ta ai, hora tamona eiava rua amo emu haroro negana oi halataia diba, a? Kalenda amo oi itaia edena negai heduru painia gaukara do oi karaia diba, a? Eiava emu noho dalana oi haidaua diba bena ful-taim hesiai gaukara oi hamatamaia diba, a? Haroro gaukara totona ita karaia gaudia ibounai ese ta idia durua diba, hereva momokani ia abia dae totona! (Kara 8:26-39) Vaira negana ita laloa lalonai, namona be ‘nega ibounai ita ta ta dekenai bona taunimanima ibounai dekenai kara namo do ita karaia.’—1 Tes. 5:15.
[Box on page 3]
Oi Durua Noho Taudia:
□✔ Memorial dekenai idia mai taudia
□✔ Haroro gaukara idia hamatamaia lou taudia
□✔ Bapatiso lasi pablisa matamatadia