Haroro Gaukara ai Emu Moale Habadaia
1 Sivarai namona harorolaia amo ia mai moalena—emu haroro gaukara lalonai oi mamia noho, a? Bema ita naria namonamo lasi, inai tanobada dikana dainai haroro gaukara karaia totona do ita hemarai, bena iseda moale do ita haboioa. Kamonai taudia idia noho lasi teritori ita karaia ese iseda lalona ia hamanokaia danu. Dahaka dala namodia ita badinaia diba haroro gaukara lalonai iseda moale ita habadaia totona?
2 Lalohadai Namona Dogoatao: Lalohadai namona dogoatao karana be ita do ia durua bada. Unai ita karaia dalana ta be, ‘Dirava ena gaukara ita karaia hebou’ ena hahenamo badana ita laloa dobu. (1 Kor. 3:9) Unai gaukara ita hagugurua noho lalonai, Iesu be ita danu ia noho. (Mat. 28:20) Bona iena aneru oreana amo ita ia durua. (Mat. 13:41, 49) Ita moale diba badina iseda gaukara be Dirava ese ia hakaua. (Apok. 14:6, 7) Unai dainai, herevana taunimanima ese iseda gaukara be edena bamona idia laloa, to unai gaukara dainai guba dekenai moale bada ia vara!
3 Hegaegae Namonamo: Hegaegae namonamo karana ese iseda moale ia habadaia danu. Haroro gaukara totona ita hegaegae be gaukara bada lasi. Miniti haida sibona ita atoa magasin matamatadia eiava hua ena henia gaudia amo hereva namona ta ita abia. Iseda Basileia Gaukara pepana amo, “Magasin Do Ita Herevalaidia Dalana” ena kahana ai, kiki herevana ta ita abia hidi. January 2002 ena udaia pepana, “Haroro Gaukara Totona Idia Gwauraia Kiki Herevadia,” oi itaia, eiava hamatamaia hereva namodia totona, Herevalaia bukana oi itaia. Bema ruma taudia edia koua herevadia ta ese oi ia koua toho, namona be edia koua hereva hanaia dalana ta oi hegaegaelaia bona edia lalona veria herevana ta oi gwauraia. Unai ita karaia totona, Herevalaia bukana be heduru bada gauna. Unai heduru gaudia ita gaukaralaia ese ita dekenai lalo-goada do ia henia mai moale ida ita haroro totona.
4 Mai Momokani ida Guriguri: Ia noho daudau moalena ita abia totona, guriguri be mai anina bada. Iehova ena ura ita karaia dainai, iena lauma helaga totona ita noinoi be namo, iena huahua ta be moale. (Gal. 5:22) Iehova ese ita dekenai goada do ia henia haroro gaukara ita karaia noho totona. (Fili. 4:13) Ita dekenai gau dikana ia vara neganai, iseda haroro gaukara totona ita guriguri ese ita do ia durua lalohadai maorona ita dogoatao totona. (Kara 13:52; 1 Pet. 4:13, 14) Bema ita gari, guriguri ese ita do ia durua diba mai gari lasi ida unai gaukara ita karaia noho mai moale ida.—Kara 4:31.
5 Dala Karaia: Momokani, taunimanima ita davaria bona haroro henidia neganai iseda haroro gaukara ita moalelaia bada. Bema emu sediual oi haidaua bona ruma-ta-ruma-ta gaukara be hora idauna ai oi karaia, reana adorahi ai, unai ese anina ia havaraia diba. Nega momo, dala dekenai oi raka, maketi eiava sitoa dekenai oi lao, PMV oi guia, eiava loaloa uma gabuna dekenai oi lao neganai, taunimanima oi davaria. Namona be hamatamaia herevana kwadogina oi hegaegaelaia bona dala oi karaia, toana be idia ura oi idia tura henia taudia oi hereva henia, ani? Eiava moni gaukara oi karaia o sikuli dekenai oi lao, unuseniai, dina ta ta ai ma haida oi hereva henia. Reana haida oi haroro henia diba bema edia lalona ia veria Baibel ena hereva ta oi gwauraia. Heduru hereva namodia be January 2002 Iseda Basileia Gaukara ena udaia pepana ena rau ginigunana ai ia noho. Unai bamona dala ese ta ena moale haroro gaukara dekenai do ia habadaia.
6 Moale ese ita ia durua ita haheauka dainai, ita hahedinaraia noho be gau badana! Unai bamona ita karaia neganai, inai gaukara, gabeai do idia karaia diba lasi gaukarana, ia doko neganai davana namona do ita abia. Unai lalohadai ese iseda moale haroro gaukara dekenai ia habadaia diba.—Mat. 25:21.