‘Iehova Do Umui Hesiai Henia, mai Emui Moale Danu’
1 Aposetolo Paulo ia gwau: “Nega ibounai do umui moale, Lohiabada lalonai umui noho dainai. Ma lau gwau lou: Do umui moale.” (Fili. 4:4) Sivarai namona harorolaia bona mamoe bamona taudia ita durua Iehova idia tomadiho henia ena hahenamo be moale bada gauna. (Luka 10:17; Kara 15:3; 1 Tes. 2:19) To, bema ita davaria iseda hesiai gaukara lalonai nega haida ita moale lasi, dahaka ita karaia diba?
2 Dirava ese Ia Henia Gaukarana: Laloaboio lasi iseda haroro gaukara ena hahegani be Iehova amo ia mai. Oibe, Basileia ena sivarai namona ita harorolaia bona ma haida be hahediba taudia ai ita halaoa neganai, ita be ‘Dirava ena gaukara hebou’ taudia ena hahenamo ita abia! (1 Kor. 3:9) Iesu Keriso be gabeai do ita karaia diba lasi gaukarana lalonai ita ida ia noho. (Mat. 28:18-20) Danu aneru idia gaukara goadagoada noho bona lauma dalanai ia vara noho haboua gaukara badana lalonai ita ida idia gaukara. (Kara 8:26; Apok. 14:6) Baibel, bona Dirava ena taunimanima edia ekspiriens idauidau ese idia hahedinaraia namonamo inai gaukara be Iehova ese ia hakaua. Unai dainai, ita haroro neganai, ita be ‘Keriso ena hesiai taudia, Dirava ena vairana dekenai ita hereva noho, mai laloa maoromaoro danu.’ (2 Kor. 2:17) Unai be moale ena badina badana ta!
3 Dirava ena hesiai gaukara lalonai ita moale noho totona ita guriguri be mai anina bada. (Gal. 5:22) Dirava ena gaukara be iena goada sibona amo do ita karaia diba dainai, iena lauma totona ita noinoi be namo, idia noia taudia dekenai mai hebogahisi ida ia henia. (Luka 11:13; 2 Kor. 4:1, 7; Efe. 6:18-20) Iseda haroro gaukara gurigurilaia karana ese ita do ia durua taunimanima idia kamonai lasi neganai, lalohadai namona ita abia totona. Unai ese ita do ia durua mai gari lasi bona moale ida ita haroro noho totona.—Kara 4:29-31; 5:40-42; 13:50-52.
4 Hegaegae Namonamo: Haroro gaukara ita karaia neganai, iseda moale habadaia totona dala namona ta be ita hegaegae namonamo. (1 Pet. 3:15) Unai bamona hegaegae karana be nega bada ia abia lasi be namo. Miniti haida sibona lalonai magasin matamatadia hariharilaia daladia eiava oi ura hariharilaia gauna ena hereva dalana namona ta oi riviulaia diba. Hamatamaia hereva namodia totona, Herevalaia bukana eiava Iseda Basileia Gaukara gunadia oi itaia diba. Basileia pablisa taudia haida be hamatamaia herevana kwadogina idia torea pepa ta dekenai bona unai ese idia ia durua bada. Nega ta ta ai, pepa idia itaia idia laloa lou totona. Unai ese idia ia durua gari mamina idia hanaia bona mai goada ida idia haroro totona.
5 Moale ese namo momo ia mailaia. Moale toana ese iseda sivarai ena namo ia habadaia. Moale ese ita ia hagoadaia ita haheauka totona. (Neh. 8:10; Heb. 12:2) Mai anina bada gauna be, iseda hesiai gaukara moalelaia karana ese Iehova ia hanamoa. Unai dainai, namona be ‘Iehova do ita hesiai henia, mai iseda moale danu.’—Sal. 100:2.
[Study Questions]
1. Iehova ena hesiai taudia idia moale bada ena badina be dahaka?
2. Edena dala ai iseda hahegani ia henia tauna ita laloa noho karana ese iseda moale ia habadaia?
3. Dirava ena hesiai gaukara lalonai ita moale noho totona, dahaka dainai guriguri be mai anina bada?
4. Haroro gaukara lalonai, hegaegae namonamo karana ese edena dala ai iseda moale ia habadaia, bona edena dala namodia haida ita hegaegaelaia diba?
5. Moale ese edena dala ai ita bona ma haida dekenai namo ia mailaia?