Idia Ura Henia Bada!
1 Gabu iboudiai Keristani ruma bese ese idia hahedinaraia Young People Ask—How Can I Make Real Friends? vidio idia ura henia bada. United States ai tamana ta ia gwau, ena natuna memerodia ese unai vidio idia itaia murinai hereva ta idia gwauraia lasi—ia hahedinaraia gaudia ibounai idia lalo-pararalaia diba! Malawi amo ia mai sivaraina ia gwau, unuseniai matamata tadikaka bona taihu ese unai vidio idia lalo-pararalaia diba danu, badina sikuli dekenai unai lalo-ani karadia idia davaria. Germany ai tamana ta ese unai vidio ia herevalaia, ia gwau: “Lau laloa unai ese egu guriguri ia haerelaia.” Matamata kekeni ta ia gwau: “Tanikiu bada, badina lau umui hadibaia lou Iehova ese lau ia laloa.” New Zealand dekenai elda ta ia gwau: “Ia ese emai matamata kekeni ta ia durua dainai, mauri dalana dekenai ia giroa.” Ia headava hahine ta ese vidio ia itaia bona ia gwau: “Lau ura bada hereva momokani lalonai idia noho matamata taudia ibounai ese inai vidio idia itaia bona hereva momokani idia abia dae vaitani!” Ruma bese taudia e, unai vidio umui itaia lou be namo, ani? Murinai, henunai idia noho henanadai umui herevalaia hebou.
2 Hamatamaia Herevana: Turana korikorina be edena bamona?—Aon. 18:24.
3 Hetura Karana Idia Koua Gaudia: Edena dala ai, oi idia ura henia lasi hemami oi hanaia diba? (Fili. 2:4) Dahaka dainai emu kara oi hanamoa be namo, bona daika ese unai dekenai oi ia durua diba? Dahaka ese dala do ia kehoa turana momo oi davaria totona, bona edeseniai idia oi davaria diba?—2 Kor. 6:13.
4 Hetura Karana Dirava Ida: Hetura karana Dirava ida be edena bamona oi haginia, bona dahaka dainai unai totona oi hekwarahi be namo? (Sal. 34:8) Daika ese emu hetura karana Dirava ida ia hagoadaia namonamo diba?
5 Turana Dikadia: Turana dikadia be edena bamona? (1 Kor. 15:33) Edena dala ai turana dikadia ese ta idia hakaua bena lauma dalanai dika ia davaria diba? Baibel lalonai Daina ena sivarai ese oi dekenai dahaka ia hadibaia?—Gen. 34:1, 2, 7, 19.
6 Hari Inai Negai Ena Drama: Sibona ia noho hemamina dainai Tara be dahaka ia karaia? Edena dala ai ia hahedinaraia toho tanobada ena matamata taudia ia bamoa be maoro? Idia dainai dahaka dika ia davaria gwauraia? Dahaka dainai ena tama sina ese unai idia itaia lasi, to lauma dalanai ia namo lou totona ia idia durua neganai edia kara be edena bamona? Edena dala ai painia taihuna ta ese ia hamomokania ia be Tara ena turana namona? Dahaka dainai Keristani taudia ese Aonega Herevadia 13:20 bona Ieremia 17:9 idia badinaia be gau badana? Tara ese dahaka mai anina bada gauna ia dibaia?
7 Hereva Dokona: Unai vidio amo dahaka oi dibaia? Edena dala ai oi gaukaralaia diba, ma haida oi durua totona?—Sal. 71:17.