‘Dirava Ena Hereva Ibounai Harorolaia’
1 Bema gau namona ta oi abia, emu laloa dalana bona emu kara amo mai momokani ida oi hahedinaraia unai gauna oi laloa bada, ani? Oibe, unai bamona oi karaia! Iehova ese ena taunimanima dekenai ia karaia kara namodia bona hebogahisi mai lalokauna dainai, aposetolo Paulo ena hereva mani oi laloa. Ia gwau: “Namona be Dirava ita hanamoa bada, iena hariharibada namo herea momokani dainai.” Unai “hariharibada namo herea” be dahaka? Unai be “Dirava ena hariharibada” karadia ibounai, bona ia hahedinaraia gauna badana be iena Natuna ia siaia iseda dika davana ia karaia totona.—2 Kor. 9:14, 15; Ioa. 3:16.
2 Paulo ena tanikiu herevana be hereva kava sibona, a? Lasi vaitani! Dala momo ai, ia ese ena laloa bada karana ia hahedinaraia. Iena Keristani tadikaka edia namo lauma dalanai ia laloa bada bona ia ura ia karaia diba gaudia ia karaia, idia ia durua Dirava ena hebogahisi mai lalokauna amo namo bada idia abia totona. Paulo be unai bamona taudia ia herevalaia neganai, ia gwau: “Umui ai lalokau henia bada dainai, ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada noho.” (1 Tes. 2:8) Paulo ese kongregesen taudia ai idia lao vadaeni taudia ia durua edia hahemauri idia gimaia totona, bona mai ena hesiku lasi ida sivarai namona ia harorolaia, tano bona davara ai kilomita tausen momo ia loaloa, “mauri hanaihanai idia ura kudou-maoro taudia ibounai” ia davaria totona. (Kara 13:48, NW ) Iehova ese Paulo totona ia karaia gaudia ibounai ese ia doria ‘Dirava ena hereva ibounai ia harorolaia haorea’ totona.—Kol. 1:25.
3 Iehova ese ita totona ia karaia gaudia ibounai ese eda lalona ia veria, kongregesen lalonai lauma dalanai heduru idia abia be namo taudia ita durudia totona, a? (Gal. 6:10) Bona unai ese ita ia veria iseda teritori dekenai Basileia ena sivarai namona ita harorolaia badabada be namo, ani?—Mat. 24:14.
4 Laloa Bada Karana Oi Hahedinaraia Dalana Ta: Lagani ta ta ai Keriso ena mase laloatao hebouna, Memorial, ese dala ia kehoa Iehova bona Iesu dekenai iseda laloa bada karana do ita hahedinaraia, ita totona idia karaia gaudia ibounai dainai. Unai be hebou ma ta eiava ia vara gauna ta laloatao negana ta sibona lasi. Iesu ia gwau: “Inai bamona do umui karaia, lau dekenai do umui laloa totona.” (Luka 22:19) Keriso ena mase laloatao hebouna, Memorial, be nega namona Iesu ita laloa totona. Do ita laloatao hari ia mauri bona ia gaukara noho, bona hairai bona king dagina ia abia badina ena mauri lalonai Dirava ia badinaia bona boubou gauna ia henia. Unai ese dala ia kehoa danu, ita hahedinaraia Keriso ese Keristani kongregesen ena gaukara idauidau ia hakaua lalonai ena kwara dagina henunai ita noho. (Kol. 1:17-20) Dirava ena taunimanima ibounai be Keriso ena mase laloatao hebouna, Memorial, dekenai idia noho be namo. Inai lagani ai, Memorial be Thursday, March 28, 2002 ai do ita karaia.
5 Lagani gunana ai, Memorial ita do abia lasi neganai ita gaukara goada dainai, Papua New Guinea ena Memorial hebouna dekenai idia mai taudia ibounai edia namba be 16,645. Inai lagani ai hida do idia mai? Taunimanima hida do idia mai be iseda “hekwarahi” bona gaukara goada ena bada hegeregerena.—1 Tim. 4:10.
6 Lohiabada Ena Anibou sibona dekenai ita lao lasi, to iseda haroro gaukara ita habadaia be namo. Ita diba momokani, tadikaka bona taihu momo be hua tamona eiava ma haida lalonai heduru painia gaukara do idia karaia. Idia lao vadaeni laganidia ima lalodiai, March ia lao May lalonai heduru painia taudia edia averes be 648. Emu sediual oi haidaua diba, inai lagani ai heduru painia gaukara oi moalelaia totona, a? Dirava be mai ena lalokau ida Keriso ena boubou gauna ia henia dainai, unai be dala namona emu laloa bada karana oi hahedinaraia totona. Namona be oi diba Iehova ena hahenamo do oi abia, henunai idia noho ekspiriens ese idia hahedinaraia hegeregerena.
7 Tano ma ta ai ful-taim moni gaukarana ia karaia taihu ta ese lagani gunanai, March hua ai, ia karaia painia gaukarana ia gwauraia, ia gwau: “February 2001 Iseda Basileia Gaukara pepana ese edia noho dalana ia hegeregere taudia ibounai ia hagoadaia, March bona April lalonai heduru painia idia karaia. March lalonai Saturday ibounai be 5 dainai, egu sediual dekenai ia hegeregere. Unai dainai egu aplikeisen lau henia.” Unai hua ia matamaia lalonai, tahua gauna ia atoa Baibel stadi ia karaia totona. Ia kwalimu, a? Oibe, unai hua lalonai iena haroro hora namba 52 ai stadi ia karaia! Dahaka ia gwau? “Hahenamo namodia do ita abia bema ita gaukara goada.”
8 Idia painia hebou ruma besena ese dahaka namo idia abia diba? Tano ta ai, April lalonai painia gaukara idia karaia hebou ruma bese taudia hani be unai hua do idia laloaboio lasi. Sinana ia gwau: “Dina ta ta lalonai ai moale badina haroro gaukara dekenai ai lalo-tamona! Adorahi ena aniani negana ai moalelaia bada badina unai dina lalonai haroro gaukara dekenai ai davaria gaudia ai kikilaia hebou.” Natuna mero ia gwau: “Tamagu be unai wiki lalonai moni gaukara ia karaia lasi neganai, ia ida haroro gaukara lau moalelaia.” Tamana ma ia gwau: “Lau be ruma bese ena kwarana dainai, lau moale badina iseda nega lalonai mai anina bada gaukarana ai karaia hebou.” Emu ruma bese ese painia gaukara idia karaia hebou diba, a? Umui herevahereva hebou bona umui itaia bema ia hegeregere emui ruma bese taudia ibounai be March bona reana ia murina huadia lalonai heduru painia gaukara idia karaia hebou diba?
9 March be Hua Namo Hereana ai Ita Halaoa Diba, A? Lagani 2000 ia matamaia lalonai, Iseda Basileia Gaukara pepana ese inai henanadai ia gwauraia: “April 2000 be Hua Namo Hereana ai Ita Halaoa Diba, A?” Unai dainai dahaka ia vara? Hua tamona lalonai heduru painia taudia 404 ita abia. Ma danu, ita hariharilaidia magasin edia namba ia daekau. Unai hua lalonai lauma dalanai umui karaia gaukarana dainai, emu kongregesen taudia ese idia hahedinaraia ura bada karana oi laloa diba, a? Lagani gunana ai ita hagugurua gaudia edia namba ita abia eiava ita hanaia diba, a? Ita ibounai ita gaukara hebou neganai, March 2002 be iseda “Hua Namo Hereana ai Ita Halaoa Diba.” Dahaka dainai March?
10 Badina rua dainai March be gaukara ena hua namona. Gau ginigunana be, Memorial be March ena dokonai do ita karaia, unai dainai nega bada ia noho taunimanima momo ita boiridia diba unai hebou dekenai idia mai totona. Gau iharuana be, March ena Saturday bona Sunday be ima, unai dainai ia auka lasi gaukara eiava sikuli idia karaia taudia ese heduru painia gaukara idia karaia totona. Inai udaia pepana lalonai ia noho kalenda amo, oi badinaia diba sediual namona oi palanilaia be namo, ani? Reana do oi itaia heduru painia be ia auka lasi. Hegeregere, bema unai pura dokodia ta ta lalonai haroro gaukara horadia 8 oi karaia diba, oi be unai hua lalonai hora ma 10 sibona oi karaia diba hora 50 oi abia totona.
11 Elda taudia ese dahaka idia karaia kongregesen taudia ibounai ese ‘Dirava ena hereva ibounai idia harorolaia haorea’ totona? Hebou ena kahana idauidau bona emui kiki amo edia ura umui habadaia. Kongregesen ena Buka Stadi naria taudia bona edia heduru taudia ese dala idia karaia diba, edia grup ai idia noho taudia ta ta ida idia hereva bona heduru idia henia. Hagoadaia hereva namodia eiava heduru hereva namodia haida ese idia ia durua diba. (Aon. 25:11) Momo ese edia sediual idia haidaua sisina neganai, heduru painia ena hahenamo idia moalelaia diba. Elda bona hesiai taudia momo bona edia adavadia be March lalonai heduru painia gaukara idia karaia hebou neganai, edia haheitalai namona ese pablisa taudia momo do ia hagoadaia, idia danu idia painia totona. Gorere bona buruka eiava edia noho dalana dainai, pablisa haida idia hegeregere lasi idia painia totona, to haida ese idia hagoadaia diba edia laloa bada karana idia hahedinaraia totona, edia goada hegeregerena kongregesen taudia ida haroro gaukara idia karaia diba.
12 Elda taudia ese palani idia karaia namonamo neganai, anina namona do idia havaraia. Wiki lalonai, haroro heboudia be nega namodia ai idia palanilaia be namo. Bema ia hegeregere, haroro naria tauna ese idia manada tadikaka do ia abia hidi guna, haroro heboudia ibounai idia karaia totona. Hegaegae namonamo karana be mai anina bada, unai amo unai haroro heboudia be miniti 10 ia lao 15 ia hanaia lasi, unai nega ai grup idia haria, teritori idia abia hidi, bona idia guriguri. (October 2001 ena Iseda Basileia Gaukarana lalonai ia noho Henanadai Mauana itaia.) Unai hua totona umui palanilaia gaukarana ena sediual be kongregesen taudia dekenai umui gwauraia hedinarai namonamo bona notisbod dekenai umui atoa.
13 Namona be teritori ena bada be ia hegeregere. Haroro naria tauna ese teritori ia naria tadikakana ida idia hebou, idia haroro momo lasi teritori karaia totona palani idia karaia be namo. Guna ita davaria lasi taudia edia ruma, dala, sitoa ta sitoa ta dekenai, bona adorahi ai haroro gaukara idia laloa danu be namo.
14 Durudia Idia Haroro Lou Totona: Emu kongregesen lalonai idia noho taudia haida be sivarai namona harorolaia gaukarana dekenai idia manoka, a? Unai taudia be do kongregesen ena kahana bona heduru idia abia be namo. (Sal. 119:176) Inai tanobada gunana ena dokona be ia kahirakahira momokani bona tanobada matamatana be iseda vairanai ia noho dainai, badina namona dainai ita hekwarahi bada be namo idia haroro lasi taudia ita durua totona. (Roma 13:11, 12) Dahaka ita karaia diba unai taudia ita durua, guna idia haroro matamaia neganai idia abia lalokauna bona lalo-goada ita habadaia lou totona?—Heb. 3:12-14.
15 Idia hanaia lagani haida lalonai idia haroro lasi taudia durua totona, elda orea ese edena bamona unai taudia idia durua diba dalana idia herevalaia be namo. (Mat. 18:12-14) Namona be seketere ese Congregation’s Publisher Record kadi ia sekea bona idia haroro lasi taudia ibounai ia makaia. Namona be idia gaukara goada mamoe vadivadi henia dalana amo heduru idia henia totona. Elda ta ese reana pablisa ta do ia vadivadi henia badina be guna ia bamoa eiava tura henia, eiava pablisa ma haida ia noia diba do idia durua totona. Eiava hari ia haroro lasi tauna ida ia stadi pablisa ese ia karaia diba bona reana do ia laloa unai be heduru ia henia diba negana dainai do ia abia dae. Iseda ura gauna be, idia haroro lasi taudia momo ese Dirava ena hereva idia harorolaia matamaia lou be namo. Bema haroro totona idia hegeregere, March be nega namona unai idia hamatamaia lou totona!—Hereva ma haida totona, November 2000 Iseda Basileia Gaukara pepana lalonai ia noho Henanadai Mauana itaia.
16 Ma Haida Idia Hegeregere Haroro Totona, A? Iehova ese ena taunimanima ia do hanamoa noho bona “bese ibounai edia kohu namodia” ia mailaidia noho. (Hag. 2:7) Lagani ta ta ai, tausen momo be bapatiso lasi pablisa ai idia lao. Idia be daidia? Iehova ena Witnes taudia edia natudia bona idia goada idia lao Baibel stadi taudia. Edena bamona ita diba bema idia hegeregere sivarai namona harorolaia pablisa ai idia lao totona?
17 Iehova Ena Witnes Taudia Edia Natudia: Natudia momo be lagani momo lalonai edia tama sina idia bamoa ruma-ta-ruma-ta gaukarana ai, to idia be bapatiso pablisa ai idia do lao lasi. March be nega namona unai idia hamatamaia totona. Edena bamona oi diba bema emu natuna ia hegeregere? Hesiai Gaukara Karaia Totona Ita Hegaegae bukana ena rau 100 ai ia gwau, “bema mero eiava kekeni ta ena kara be ia namo, bona ia ese ma taunimanima haida dekenai ena abidadama ena badina ia gwauraia hedinarai diba sivarai namona ia harorolaia henidia neganai, bona ena kudou dekenai unai gaukara ia ura henia vadaeni.” Bema oi laloa emu natuna ia hegeregere, Kongregesen Hesiai Komiti ena elda ta oi hereva henia.
18 Idia Hegeregere Baibel Stadi Taudia: Baibel stiuden ta ese diba ia abia bona nega sisina daudau lalonai hebou ia lao henia murinai, reana ia ura Basileia pablisa ta ai ia lao. Bema unai bamona stiuden ta ida stadi oi karaia noho, inai henanadai oi lalodia: Iena mauri lagani bona ena diba hegeregerena, ia goada ia lao noho, a? Nega bona gabu idaudia ai ena abidadama be ma haida dekenai ia gwauraia matamaia vadaeni, a? Ia ese “mauri matamata” ia atoa, a? (Kol. 3:10) Ia ese Hesiai Gaukara bukana ena rau 97-9 dekenai, bapatiso lasi pablisa totona idia gwauraia gaudia ia karaia noho, a? Bema oibe, namona be Kongregesen Hesiai Komiti oi hadibaia, unai amo dala idia karaia diba elda rua ese oi bona emu stadi tauna idia hedavari henia. Bema ia hegeregere, elda rua ese ia do idia hadibaia, haroro gaukara ia karaia matamaia diba.
19 April Bona May be Edena Bamona? Unai hua rua lalonai danu emui haroro gaukara umui habadaia. March lalonai heduru painia gaukara idia karaia taudia be April bona May eiava unai hua ta lalonai heduru painia gaukara idia karaia lou diba. Unai hua rua ai, haroro gaukara dekenai Gima Kohorona bona Awake! magasin hariharilaia gaukarana do ita atoa guna. Unai magasin be idia duahia taudia edia mauri ia durua bada! Idia dainai, tanobada hegegemadai dekenai iseda namba ia bada ia lao. April bona May lalonai do ita hekwarahi taunimanima momo dekenai magasin momo ita hariharilaia totona. Unai gaukara karaia totona, namona be hari palani oi karaia.
20 Haroro gaukara do ita habadaia dainai, emu kongregesen amo oi abia magasin edia namba oi habadaia be namo, a? Hesiai laganina lalonai, Saturday ta ta ai Gima Kohorona bona Awake! magasin ita hariharilaia, unai be iseda Magasin Dina. To momo ese heduru painia gaukara do idia karaia dainai bona ita ibounai ese hua rua lalonai magasin do ita hariharilaia dainai, reana emu kongregesen dekenai emu magasin oda oi habadaia. Bema unai bamona do oi karaia, mani emu kara emui kongregesen lalonai magasin ia naria tauna oi hadibaia haraga. Unai nega tamona ai, buka naria tauna ia diba be namo inai pepapepa, Oi Ura Baibel Do Oi Dibaia Namonamo, A? momo idia noho be namo, ibounai ese idia gaukaralaia totona.
21 Momo ese Iseda Basileia Gaukara pepana dekenai ia noho herevana, “Magasin Do Ita Herevalaidia Dalana” idia moalelaia. Unai dala oi gaukaralaia namonamo magasin herevalaia dalana oi dibaia totona, a? Wiki ta ta ai, emui ruma bese ena Baibel stadi ena nega sisina oi gaukaralaia unai magasin hariharilaia daladia umui herevalaia be namo, ani?
22 Idia Mai Noho Huadia Gaukaralaia Namonamo: Aposetolo Paulo hegeregerena, namona be ita hahedinaraia ita ese Iehova ena “hariharibada namo herea” ita laloa bada, bona idia mai noho huadia totona idia palania gaukara idauidau ita karaia badabada amo unai ita hahedinaraia. Unai gaudia haida be (1) Thursday, March 28, 2002 ai, inai lagani ena mai anina bada hebouna, Lohiabada Ena Anibou, ita lao henia; (2) idia haroro lasi taudia durua, guna idia abia lalokauna idia hahedinaraia lou totona (Apok. 2:4; Roma 12:11); (3) Bapatiso lasi pablisa ai idia lao totona idia hegeregere Baibel stiuden taudia, bona iseda natudia ita durua; bona (4) evanelia gaukara ita karaia badabada, March sibona lasi to hua ma haida ai heduru painia ita karaia danu.—2 Tim. 4:5.
23 Ai guriguri ita ibounai ese idia mai noho huadia lalonai Basileia sivarai namona do ita harorolaia badabada, unai amo Iehova ese ita totona ia karaia gaudia ibounai dainai iseda tanikiu karana ita hahedinaraia.
[Box on page 6]
Sibona Emu Haroro Sediual March 2002 Totona
Sunday Monday Tuesday Wednesday Thursday Friday Saturday
1 2
Magasin Dina
3 4 5 6 7 8 9
Magasin Dina
10 11 12 13 14 15 16
Magasin Dina
17 18 19 20 21 22 23
Magasin Dina
24 25 26 27 28 29 30
MEMORIAL Magasin Dina
DINA IA DIHO
31 MURINAI
Palani oi karaia diba March lalonai hora 50 heduru painia gaukara oi karaia totona, a?