Mai Lalo-Tamona ida Ita Noho Hebou
1 Dirava ese mai aonega ida ia karaia tauanina namo hereana be nega momo oi hoalaia, a? (Sal. 139:14) Tauanina ena kahana ta ta be ma haida ida idia gaukara hebou. Dirava ena Hereva ese Keristani kongregesen be idia gaukara hebou tauanina ta ida ia hahegeregerea. Keriso ena Kwara dagi henunai, kongregesen taudia ibounai be “idia noho hebou bona idia gaukara hebou, bona kara ibounai be laloa tamona dekena amo idia karaia.” (Efe. 4:16a) Unai dainai, Iehova ese ena lalo-tamona taudia ia gaukaralaidia gau namodia momo idia karaia totona.
2 Keristani taudia ginigunadia be “mai laloa tamona danu” lauma dalanai bona tauanina dalanai ta ta idia durua. (Kara 2:44-47) Iehova ena heduru amo, idia ese mai lalo-tamona ida dagedage bada herea idia davaria bona idia hanaia. (Kara 4:24-31) Idia lao gabudia ibounai, unai nega ai idia diba tanodia dekenai, Basileia ena sivarai namona idia harorolaia. (Kol. 1:23) Hari inai negai danu, Keristani kongregesen be mai lalo-tamona ida dala badana ai unai gaukara idia karaia. Dahaka gaudia ese unai lalo-tamona karana ia havaraia?
3 Dirava Ena Hadibaia Herevadia ese Ia Hatamonadia: Tanobada hegegemadai, iseda tomadiho karana ese ita ia hatamonaia. Edena dala ai unai ia vara diba? Ita diba Iehova ese ena tanobada oreana amo nega korikori ai lauma ‘aniani ia henia.’ (Mat. 24:45) Danu, ia ese “harihari gaudia,” kongregesen lalonai hadibaia gaukara idia karaia totona ia henia tatau, ita lalodia bada. Iehova ese lauma dalanai ita ia ubua totona ia henia gaudia be mai eda manau ida ita abia dae neganai, iseda lalo-parara Dirava ena Hereva dekenai do ita habadaia bona iseda lalona ia hamarerea Iesu ena hahediba taudia bamona ena kara ita tohotohoa. Namona be Dirava ena Hereva ita stadilaia noho, mai momokani ida ita hekwarahi noho “iseda abidadama do ia tamona.” (Efe. 4:8, 11-13) Lauma dalanai iseda lalo-tamona oi habadaia totona, oi ese dina ibounai Baibel oi duahia, a?
4 Keristani Hebamo Karana ese Ia Hatamonadia: Lalokau ese ita ia veria mai Keristani heboudia dekenai ita hebamo totona. Unai hebou dekenai ta ta ‘durua henia daladia ita laloa.’ (Heb. 10:24, 25) Unai ena anina be iseda tadikaka edia toana ita laloa lasi to idia ita dibaia namonamo, Iehova ese ia itaia dava bada herea gaudia bamona ita itadia. (Hag. 2:7) Edia haere amo edia abidadama herevadia ita kamonai neganai, iseda lalokau idia dekenai ia bada bona iseda lalo-tamona ia hagoadaia. Ma haida idia itaia oi be hanaihanai kongregesen hebou dekenai oi lao, a?
5 Haroro Gaukara Lalonai Gaukara Hebou Taudia: Abidadama tamona taudia ida sivarai namona ita harorolaia karana ese ita ia hatamonaia Dirava ena ura ita karaia totona. Aposetolo Paulo be “Dirava ena Basileia totona” ia ida idia gaukara hebou taudia ia lalodia bada. (Kol. 4:11) Haroro gaukara lalonai ekspiriens ita gwauraia bona ita heduru heheni neganai, unai ese ita ia durua iseda Keristani gaukarana ita hagugurua bona iseda lalo-tamona ia hagoadaia.—Kol. 3:14.
6 Lauma Helaga Ena Siahu ese Ia Hatamonadia: Mai goada ida Iehova ena ura ita karaia neganai, ena lauma helaga ia henia. Unai ese ita ia durua lalohadai idauidau ita hamaoromaoroa bona mai eda lalo-tamona ida do ita noho hebou. (Sal. 133:1) Ita ia hagoadaia dainai ita itaia, ‘inai maino be varo bamona ita ia guia hebou, orea tamona. Vadaeni do ita naria namonamo, inai maino do ita dogoatao noho.’ (Efe. 4:3) Ita ta ta ese Dirava ena taunimanima huanai ia noho lalo-tamona karana ita habadaia diba, bema ita ese ta ta ita kara henia lalonai lauma helaga ena huahua ita hahedinaraia.—Gal. 5:22, 23.
7 Keriso ena kwara dagina henunai mai lalo-tamona ida ita gaukara hebou dainai, “tauanina be lalokau dekena amo ia tubu daekau noho.” (Efe. 4:16b) Danu, Iehova, “iseda maino ia havaraia Diravana,” ia hanamoa.—Roma 16:20.