Keristani Lalo-Tamona Korikorina—Edena Dala Amo?
1 Dahaka ese taunimanima milioni siks mai kahana tano 234 amo bona gado idauidau taudia 380 bamona ia hatamonaia diba? Iehova Dirava tomadiho henia karana sibona. (Mika 2:12; 4:1-3) Iehova ena Witnes taudia be idia vara gaudia amo idia diba hari inai negai Keristani lalo-tamona korikorina be ia noho. Ita be ‘orea tamona’ taudia bona ‘naria tauna tamona’ henunai ita noho dainai, iseda lalona ita hadaia lalo-tamona ia tahua lasi tanobadana ita dadaraia totona.—Ioa. 10:16; Efe. 2:2.
2 Dirava ena ura, do ia guguru momokani gauna, be taunimanima bona aneru be mai lalo-tamona ida tomadiho momokani lalonai idia noho. (Apok. 5:13) Iesu ia diba unai be gau badana dainai, ia guriguri ena murinai idia raka taudia idia lalo-tamona totona. (Ioa. 17:20, 21) Edena dala ai ita ta ta ese Keristani kongregesen lalonai lalo-tamona karana ita habadaia diba?
3 Lalo-Tamona Abia Dalana: Bema Dirava ena Hereva bona lauma helaga be lasi, Keristani lalo-tamona do ia noho lasi. Baibel ai ita duahia gaudia ita badinaia neganai, iseda mauri ai Dirava ena lauma helaga do ia gaukara. Unai ese ita ia durua dainai ita itaia ‘maino be varo bamona ita ia guia hebou, orea tamona’ bamona. (Efe. 4:3) Unai ese ita ia hagoadaia mai haheauka ida ita gwauatao heheni totona. (Kol. 3:13, 14; 1 Pet. 4:8) Dina ta ta ai Dirava ena Hereva oi laloa dobu amo lalo-tamona karana oi habadaia, a?
4 Iseda haroro bona hahediba taudia halaoa gaukarana ese lalo-tamona ia havaraia danu. Keristani haroro gaukara ai ma haida ida ‘Sivarai Namona abidadama henia totona do ita tuari hebou noho’ neganai, ita be “hereva momokani durua totona do ita gaukara hebou” taudia ai ita lao. (Fili. 1:27; 3 Ioa. 8) Unai bamona ita karaia neganai, kongregesen ai lalo-tamona bona lalokau heheni karana do ita hagoadaia. Haroro gaukara ai oi ia do bamoa lasi tadikaka eiava taihu oi noia inai wiki ai umui gaukara hebou totona, ani?
5 Hari inai negai, tanobada ibounai tadikaka oreana momokanina bona tamona lalonai ita noho be hahenamo badana! (1 Pet. 5:9) Inai lagani lalonai, taunimanima tausen momo ese “Dirava Ita Hanamoa” Intenesenel Hebouheboudia ai tanobada ibounai taudia huanai ia noho lalo-tamona karana idia itaia. Namona be dina ta ta ai Dirava ena Hereva ita duahia karana, lalokau dalanai dika ita gwauatao heheni karana, bona ‘mai iseda laloa tamona ida’ sivarai namona ita harorolaia karana amo ita ta ta ese unai lalo-tamona karana hereadaena ita habadaia.—Roma 15:6.