Varavara ta Idia Atoa Siri Neganai Keristani Badinaia Karana Hahedinaraia
1 Nega momo ruma bese taudia edia hetura karana ia goada. Unai dainai, Keristani tauna ena adavana, natuna, tama eiava sina, eiava varavara korikorina ma ta, hegeregere taihuna, kakana, eiava tubuna, be kongregesen amo idia atoa siri eiava ia gini siri neganai, hahetoho ia havaraia. (Mat. 10:37) Dirava idia badinaia Keristani taudia ese edena dala ai unai bamona varavara idia kara henia be namo? Bema unai tauna be ruma bese ida ia noho, ia idia kara henia dalana be idau, a? Namona be Baibel ena hereva unai gauna dekenai ita itaia guna, ena hakaua herevadia be idia atoa siri taudia bona idia gini siri taudia ita kara henia neganai idia hegeregere.
2 Idia Atoa Siri Taudia Kara Henia Dalana: Dirava ena Hereva ese Keristani taudia ia hagania kongregesen amo idia atoa siri tauna do idia bamoa eiava tura henia lasi, ia gwau: “Iseda Keristani varavara tauna ta [herevana daika], bema ia be heudahanai tauna, o mataganigani tauna, o kaivakuku tomadiho henia tauna, o hereva dika tauna, o kekero tauna, o henaoa tauna, umui be ia danu do umui turana karaia lasi. Bona ia danu do umui aniani hebou lasi. . . . Unai kara dika tauna be emui orea dekena amo umui atoa siri.” (1 Kor. 5:11, 13) Iesu ena hereva Mataio 18:17 dekenai be mai anina danu, ia gwau: “[Idia atoa siri tauna be] idau bese tauna o takisi gogoa tauna hegeregerena do oi halaoa.” Iesu ena hereva idia kamonai taudia idia diba unai negai Iuda taudia ese Idau Bese taudia idia bamoa lasi bona takisi gogoa taudia idia dadaraia. Unai hereva amo Iesu ese ia murinai idia raka taudia ia hadibaia, idia atoa siri taudia ida do idia noho hebou lasi.—The Watchtower, September 15, 1981, rau 18-20 itaia.
3 Unai ena anina be Dirava idia badinaia Keristani taudia be kongregesen amo idia atoa siri taudia ida lauma dalanai idia hebamo heheni lasi. To unai sibona lasi. Dirava ena Hereva ia gwau unai bamona tauna ida “do umui aniani hebou lasi.” (1 Kor. 5:11) Unai dainai, dala ma haida dekenai danu, idia atoa siri tauna ita bamoa lasi. Hegeregere, ia ida piknik eiava pati ita karaia lasi, spot gabuna eiava sitoa dekenai ita lao lasi, vidio ita itaia lasi, bona ruma ai, aniani rumana ta ai, eiava gabu ma ta dekenai ia ida ita aniani hebou lasi.
4 To idia atoa siri tauna ida oi herevahereva be edena bamona? Ena be Baibel ese idia vara diba gaudia ibounai ia gwauraia lasi, to 2 Ioane 10 amo Iehova ena lalohadai unai gauna dekenai ita diba, ia gwau: “Bema tau ta umui dekenai ia mai, bona inai Keriso ena hadibaia hereva ia gwauraia lasi neganai, emui ruma dekenai do umui abia dae lasi. Bona hanamoa hereva do umui henia lasi.” The Watchtower, September 15, 1981, ese rau 25 dekenai unai ia herevalaia, ia gwau: “Ita diba inai hanamoa hereva tamona ‘Namo’ amo dala ita kehoa diba, ta ida ita herevahereva bona ia ita tura henia totona. Ita ura idia atoa siri tauna ta dekenai unai dala ita kehoa, a?”
5 Momokani, unai Watchtower ena rau 31 ai ia noho herevana ia gwau: “Keristani tauna ta ese kara dika ia badinaia bona ia idia atoa siri neganai, gau namodia momo ia haboioa: Dirava ese ia lalo-namo henia lasi; . . . tadikaka danu hebamo namona ia abia diba lasi, bona ena varavara Keristani taudia danu ia hetura heheni diba lasi.”
6 Ruma Bese Tamona Taudia: Unai ena anina be idia atoa siri ruma bese tauna ida ruma bese tamona lalonai idia noho Keristani taudia ese dina ta ta gaudia idia karaia lalonai ia ida idia hereva lasi, idia aniani lasi, bona idia noho hebou lasi, a? The Watchtower, April 15, 1991 ena rau 22 dekenai ia noho futnout ia gwau: “Bema Keristani tauna ta ena ruma bese lalonai be idia atoa siri varavara [ruma bese tauna] ta ia noho, ruma bese ena dina ta ta gaukara lalonai ia vareai diba.” Unai dainai, ruma bese taudia be do idia laloa idia atoa siri ruma bese tauna be edena dala ai idia ida do ia aniani bona ruma gaukaradia ia karaia. To, idia ura lasi idia bamoa tadikakadia do idia laloa gau iboudiai be guna unai tauna idia do atoa siri lasi negana hegeregerena.
7 To, The Watchtower, September 15, 1981 ese rau 28 dekenai idia atoa siri eiava ia gini siri tauna ia herevalaia neganai, ia gwau: “Guna lauma dalanai ia abia hebamo karadia idia doko vaitani. Iena hebamo karana ena varavara bona ena ruma bese taudia ida danu be idia doko. . . . Anina be ruma bese lalonai guna lauma dalanai idia abia hebamo karadia idia ore. Hegeregere, bema tau idia atoa siri, ena adavana bona natudia do idia moale lasi bema ruma bese ena Baibel stadi ia hakaua eiava Baibel duahiduahi bona guriguri ia gunalaia. Bema ia ura guriguri ia gwauraia, hegeregere aniani neganai, iena ruma dekenai unai ia karaia diba. To idia ese edia kudouna dekenai sibona edia guriguri be Dirava dekenai idia gwauraia diba. (Aon. 28:9; Sal. 119:145, 146) To bema idia atoa siri tauna [ruma bese tauna] ta be ia ura ruma bese be Baibel idia duahia hebou o Baibel stadi idia karaia neganai, idia ida ia helai hebou, be edena bamona? Reana idia gwau ia helai bona kamonai diba bema ia ese idia ia hadibaia toho lasi bona ena tomadiho lalohadai ia gwauraia toho lasi.”
8 Bema ruma dekenai ia noho mero o kekeni be idia atoa siri, Keristani tama sina dekenai maduna ia do noho ia idia hadibaia totona. The Watchtower, November 15, 1988 be rau 20 dekenai ia gwau: “Ena aniani, dabua, bona noho gabuna idia henia noho hegeregerena, Dirava ena Hereva amo ia idia hadibaia bona idia matahakani henia be namo. (Aon. 6:20-22; 29:17) Unai dainai, ena be natuna idia atoa siri, to lalokau tama sina ese ia ida Baibel stadi idia karaia diba. Reana ena kerere hamaoromaoroa totona heduru namona ia abia diba bema ia sibona ia noho neganai idia stadi henia. Eiava reana idia laloa ruma bese ena stadi lalonai ia vareai be namo.”—Gima Kohorona, October 1, 2001, rau 16-17 itaia danu.
9 Ruma Bese ida Idia Noho Lasi Varavara: The Watchtower, April 15, 1988 be rau 28 dekenai ia gwau: “Bema idia atoa siri tauna o ia gini siri tauna be varavara ta, to ruma bese tauna lasi bona ruma bese ida ia noho lasi, idia kara henia dalana be ia idau. Reana dala ia noho unai varavara do idia hereva henia lasi. To bema edia bese lalonai ia vara gauna be kerere tauna ida idia herevalaia hebou be gau badana, namona be unai hereva sibona idia herevalaia,” badina unai be Dirava ena oda hegeregerena, ia gwau ia helalo-kerehai lasi “Keristani varavara tauna ta [herevana daika] . . . do umui turana karaia lasi.” (1 Kor. 5:11) Dirava idia badinaia Keristani taudia idia ura naria namonamo unai bamona varavara tauna idia bamoa lasi totona. Bisinesi karadia lalonai danu idia hekwarahi, do idia bamoa lasi totona.—The Watchtower, September 15, 1981, rau 29-30 itaia danu.
10 The Watchtower ese ia vara diba gauna ma ta ia herevalaia, ia gwau: “Bema varavara korikorina ta, hegeregere ruma bese ida ia noho lasi natuna o tamana o sinana idia atoa siri bona murinai ia ura ia giroa lou be edena bamona? Ruma bese taudia be edia lalona idia hadaia diba dahaka do idia karaia be namo. Hegeregere, reana idia atoa siri tamana o sinana be ia gorere eiava moni eiava tauanina dalanai ia sibona ia naria diba lasi. Baibel ena taravatu be ena natudia, Keristani taudia, ese idia durua bona unai bamona idia karaia be maoro. (1 Tim. 5:8) . . . Durua dalana idia lalohadailaia neganai namona be idia laloa tamana eiava sinana ena dabu gaudia momokanidia bona ena lalohadai be dahaka, bona ruma bese taudia be lauma dalanai namo idia davaria totona ruma bese kwarana ena maduna.”—The Watchtower, September 15, 1981, rau 28-9.
11 Unai hereva tamona ese natuna ia herevalaia, ia gwau: “Nega haida Keristani tama sina ese idia atoa siri natuna ta be edia ruma lalonai idia abia dae lou, badina ena tauanina o ena lalona ia gorere. Tama sina be gau idauidau idia laloa be namo. Idia atoa siri merona be guna ia sibona ia noho to hari unai bamona ia noho diba lasi, a? Eiava ia ura idia dekenai ia giroa lou, sibona ena hekwarahi hamaragia totona, a? Iena kara bona lalohadai be edena bamona? ‘Hatubua muramurana’ be edia ruma lalonai do ia abia vareai, a?—Gal. 5:9.”
12 Iehova Badinaia Karana Ena Namo: Baibel ese ia hahedinaraia dalana atoa siri karana bona idia helalo-kerehai lasi taudia dadaraia karana dekenai ita badinaia be mai ena namo. Kongregesen do ia goeva noho bona unai kara amo ita hahedinaraia ita ese Baibel ena kara maoromaoro taravatu namodia ita abia isi. (1 Pet. 1:14-16) Dika idia havaraia gaudia amo ita ia gimaia. (Gal. 5:7-9) Danu, kara dika tauna dekenai dala ia kehoa ia abia matahakani amo namo do ia davaria, bona unai ese ia durua ‘kara maoromaoro ena davana namona, mai maino danu do ia davaria.’—Heb. 12:11.
13 Tadikaka ta bona ena taihuna ese sekit hebouhebou dekenai hereva ta idia kamonai murinai idia lalo-parara edia sinana, gabu ma ta dekenai ia noho bona lagani siks gunanai idia atoa siri hahinena, idia kara henia dalana idia haidaua be namo. Maoromaoro hebouhebou murinai, unai tau ese ena sinana ia ringi henia, ia hamaoroa ia idia lalokau henia, bona unai murinai ia hadibaia mai anina bada ruma bese gaudia idia herevalaia be gau badana sibona neganai, ia ida do idia hereva. Daudau lasi murinai, ena sinana be hebou ia lao henia matamaia bona gabeai kongregesen dekenai idia abia vareai lou. Danu, ena abidadama lasi adavana be ia stadi matamaia bona gabeai bapatiso ia abia.
14 Baibel ia hahedinaraia dalana atoa siri karana dekenai ita badinaia namonamo neganai, ita hahedinaraia Iehova ita lalokau henia bona ia gwauraia kerere tauna dekenai haere ia henia diba. (Aon. 27:11) Bena ita diba momokani Iehova ena hahenamo do ita abia. King Davida ese Iehova ia herevalaia, ia gwau: “Bona iena oda lau utua lasi. Lohiabada e, oi dekenai idia abidadama henia taudia, be oi ese unai taudia oi durua noho.”—2 Sam. 22:23, 26.
[Study Questions]
1. Dahaka ese Keristani kamonai karana ia tohoa diba?
2. Baibel ena hereva hegeregerena, Keristani taudia ese kongregesen amo idia atoa siri taudia be edena bamona do idia kara henia?
3, 4. Idia atoa siri bona idia gini siri taudia be edena daladia ai ita tura henia be taravatu?
5. Ta be idia atoa siri neganai, edena gaudia ia haboioa?
6. Idia atoa siri varavara [ruma bese tauna] ida ruma bese tamona lalonai ia noho Keristani tauna ese unai tauna ida gau ta ia karaia diba lasi, a? Gwauraia hedinarai.
7. Ruma bese tauna ta idia atoa siri neganai, lauma dalanai edia hebamo karana be edena bamona ia idau?
8. Ruma dekenai ia noho mero o kekeni idia atoa siri neganai, Keristani tama sina dekenai dahaka maduna ia do noho?
9. Bema idia atoa siri varavara be Keristani tauna ena ruma dekenai ia noho lasi, edena dala ai do ia kara henia?
10, 11. Keristani tauna ese idia atoa siri varavara be ruma dekenai ia do abia dae lasi neganai, dahaka ia laloa guna?
12. Atoa siri karana ena namo haida be dahaka?
13. Ruma bese ta be edena dala ai edia kara idia haidaua, bona dahaka ia vara?
14. Dahaka dainai atoa siri karana ita badinaia namonamo be namo?
This article is repeated again in km 11/09.