Idia Atoa Siri Tauna Kara Henia Dalana

Iseda varavara eiava turana namona ta be ena kara dika amo ia helalo-kerehai lasi dainai kongrigeisen amo idia atoa siri neganai, ita lalohisihisi bada. Baibel ena hakaua herevana unai kara dekenai ita badinaia neganai, ita hahedinaraia ita be Dirava ita lalokau henia bona iena hakaua dalana ita matauraia.a Mani inai henanadai haida ita laloa.

Kongrigeisen amo idia atoa siri tauna be edena bamona ita kara henia be namo? Baibel ia gwau: “Iseda Keristani varavara tauna ta, bema ia be heudahanai tauna, o mataganigani tauna, o kaivakuku tomadiho henia tauna, o hereva dika tauna, o kekero tauna, o henaoa tauna, umui be ia danu do umui turana karaia lasi. Bona ia danu do umui aniani hebou lasi.” (1 Korinto 5:11) Tau ta be “Keriso ena hadibaia hereva ia badinaia lasi” neganai, Baibel ia gwau: “Emui ruma dekenai do umui abia dae lasi. Bona hanamoa hereva do umui henia lasi. Badina be unai tau do ia hanamoa tauna ese unai tau ena kara dika do ia durua.” (2 Ioane 9-11) Ita be kongrigeisen amo idia atoa siri taudia ida Dirava ena hereva do ita kikilaia hebou lasi bona gau ma haida do ita karaia hebou diba lasi. Gima Kohorona, February 1, 1982, rau 17, ia gwau: “Ita be hereva tamona hegeregerena ‘Namo’ amo taunimanima ta ita hanamoa, reana unai hereva tamona amo dala ita kehoa ita be ia danu ita herevahereva bona turana karaia totona. Ita ura dala be murimuri ai idia atoa tauna ta dekenai unai bamona ita kehoa, a?”

Idia ita dadaraia momokani be maoro, a? Oibe, badina haida dainai unai ita karaia. Badina ginigunana be, ita ese Dirava bona ena Hereva ita badinaia. Nega namodia sibona ai Iehova ita badinaia lasi, to ia hereva hegeregerena ita kara be auka negana ai danu ia ita badinaia. Dirava ita lalokau henia dainai ita ura iena taravatu ibounai ita badinaia, badina ita diba ia be kara maoromaoro bona lalokau Diravana bona ena taravatu be iseda namo totona. (Isaia 48:17; 1 Ioane 5:3) Badina iharuana be, ia helalo-kerehai lasi tauna ita dadaraia neganai, unai kara ese ita bona ma haida eda hetura karana Dirava ida ia gimaia bona kongrigeisen ena ladana namona ia abia isi. (1 Korinto 5:6, 7) Badina ihatoina be, Baibel ena hakaua herevadia ita badinaia dainai, idia atoa siri tauna do ia durua ia helalo-kerehai totona. Hahemaoro komiti edia hahemaoro karana ita abia dae neganai, unai ese kerere tauna ena lalona ia veria diba elda taudia edia heduru ia abia dae totona, ena be guna edia sisiba ia abia dae lasi. Ia lalokau henia taudia ia bamoa lasi neganai, unai ese ‘ena lalona do ia kehoa,’ bona do ia itaia ia be kara dika badana ia karaia, bona dala do ia tahua Iehova dekenai ia giroa lou totona.—Luka 15:17.

Bema iseda varavara ta idia atoa siri be edena bamona? Unai bamona ia vara neganai, ita lalokau henia dainai Iehova ena taravatu hegeregerena ia ita dadaraia be do ia auka. Vadaeni, kongrigeisen amo idia atoa siri varavara be edena bamona do ita kara henia? Gau ibounai ita herevalaia diba lasi, to gau rua do ita laloa be namo.

Nega haida, idia atoa siri varavara be reana ena ruma bese ida ia do noho. Ena be ia idia atoa siri, to ena ruma bese be ia danu dina ta ta ai idia karaia gaudia idia karaia diba. To, iena kara dainai, ena ruma bese taudia bona ia huanai Dirava idia hesiai henia hebou karana ia hadikaia. Unai dainai, iena ruma bese taudia be ia ida Dirava ena hesiai gaukara idauidau do idia karaia lasi. Hegeregere, bema idia atoa siri tauna ia noho, ia be ruma bese taudia edia stadi lalonai do ia vareai lasi. To, bema idia atoa siri natuna ta be ia do matamata bona tama sina edia naria henunai ia do noho, tama sina be mai edia maduna ia do idia hadibaia bona matahakani henia totona. Unai dainai, lalokau tama sina be dala idia karaia diba edia natuna ida Baibel idia stadilaia totona.b—Aonega Herevadia 6:20-22; 29:17.

Nega haida, idia atoa siri varavara tauna be ruma bese ida ia noho lasi. To, bema ruma bese lalonai hekwakwanai ta ia vara, unai nega sibona ai ia idia hereva henia diba, to namona be nega momo ia ida do idia herevahereva lasi. Namo lasi Dirava idia badinaia noho ruma bese taudia be ekskius idia tahua edia ruma dekenai ia noho lasi varavara idia hereva henia totona. To, Iehova bona ena orea idia badinaia dainai, namona be unai ese edia lalona ia veria Baibel ena sisiba atoa siri karana dekenai idia badinaia totona. Unai bamona idia karaia be kerere ia karaia tauna ena namo totona, bona ia abia matahakani ese ia durua diba.c—Heberu 12:11.