Dirava Ena Hereva be Momokani
1 Salamo torea tauna ia gwau: “Oiemu hereva ibounai edia anina be momokani.” (Sal. 119:160) Iehova ese ena lauma amo ia havaraia Herevana amo, mauri ena anina bada henanadaidia ia haerelaia. Lalo-hisihisi taudia edia lalona ia hagoadaia bona helaro ia henia. Bona ita dekenai ia kahirakahira ita lao dalana ia hadibaia. Dirava ena Hereva ia laloa bada hahinena ta ia gwau: “Baibel amo hereva momokani oi dibaia be hegeregere dibura gabuna amo oi raka-lasi bona ia diari daiutuna dekenai oi vareai.” Oi hekwarahi nega ibounai Dirava ena Hereva amo hereva momokani be ma haida dekenai oi herevalaia totona, a?
2 Mauri Ia Haidaua Bona Taunimanima ese Idia Ura Henia: Baibel ena hereva momokani be mai ena siahu taunimanima edia kudouna ia veria bona mauri ia haidaua totona. (Heb. 4:12) Hahine matamatana ta ladana Rosa be ariara karana ia karaia, danu ia inuinu kekero bona drag ia ania. Ia gwau: “Dina ta, lau lalo-metau bada neganai, headava Witnes tauna bona ena adavana ese lau dekenai Baibel ese ita ia durua iseda hekwakwanai ita hamaoromaoroa dalana idia herevalaia. Dirava ena Hereva lau stadilaia matamaia, bona unai hereva ese egu lalona ia veria. Hua ta lalonai lau hegeregere egu mauri dalana lau haidaua bona mauri dalana matamatana lau badinaia. Hari egu mauri be mai ena badina dainai, kekero muramura eiava drag ena heduru lau tahua lasi. Bona lau ura bada Iehova ena turana ai lau lao dainai, egu lalona lau hadaia iena taravatu hegeregerena lau noho totona. Bema Dirava ena Hereva amo ia mai aonega lau abia lasi, lau diba hari egu mauri lau hadokoa vadaeni.”—Sal. 119:92.
3 Hari idia noho buka hegeregeredia lasi, Baibel ese “bese idauidau, iduhu idauidau, kopina idauidau, bona gado idauidau” taudia edia lalona ia veria. (Apok. 7:9) Dirava ena ura be “taunimanima ibounai ese mauri do idia davaria, bona hereva momokani do idia diba.” (1 Tim. 2:4) Unai dainai, ita gwau lasi ta ena noho dalana dainai ia be sivarai namona do ia kamonai lasi. To, ibounai dekenai Basileia ena sivarai ita hadibaia, bema mai dalana namona be Baibel ita gaukaralaia.
4 Baibel Oi Herevalaia: Haroro gaukara lalonai dala namodia momo idia noho Baibel oi gaukaralaia totona. Magasin oi hahedinaraia neganai, idia gwauraia hariharilaia dalana ta amo ia noho siri ta oi gaukaralaia toho. Hua ena henia gauna idia gaukaralaia neganai, haida idia davaria edia hamatamaia hereva amo idia abia hidi siri namona idia duahia, unai ese anina namona ia havaraia. Lou henia oi karaia neganai, nega ta ta ai Baibel siri ta eiava haida oi gaukaralaia ruma tauna oi durua diba maorona ia abia noho totona. Baibel stadi oi karaia neganai, siri badadia oi herevalaia namonamo. Haroro gaukara oi karaia lasi neganai, Baibel oi abia hegaegae unai amo nega bona dala idauidau amo dala ia kehoa neganai oi haroro diba.—2 Tim. 2:15.
5 Iseda haroro gaukara lalonai, nega iboudiai dala ita tahua Baibel ita gaukaralaia ma haida ita durua Dirava ena Hereva ena hereva momokani ena siahu amo namo idia abia totona.—1 Tes. 2:13.
[Study Questions]
1. Baibel lalonai dahaka mai anina bada herevana ia noho?
2. Edena dala ai Baibel ese taunimanima edia mauri ia hanamoa?
3. Dahaka dainai Baibel ena sivarai be haida dekenai ita hadibaia lalonai ita gari lasi be gau badana?
4. Ta ita haroro henia neganai, Baibel be edena dala ai ita gaukaralaia diba?
5. Dahaka dainai haroro gaukara lalonai ita hekwarahi be namo Baibel ita gaukaralaia totona?