Dirava Tomadiho Henia Bukana Stadilaia

Dirava Momokani Tamona Tomadiho Henia bukana idia karaia dalana be kamonai matamata taudia ese Diba bukana idia haorea murinai do idia stadilaia. Unai buka be buka stadi dekenai ita stadilaia neganai, haroro gaukara lalonai ita gaukaralaia totona ita do ia hegaegaelaia, bona ita do ia durua Iehova bona iena orea dekenai iseda lalokau bona laloa bada karana ita habadaia totona. Dirava Tomadiho Henia bukana stadilaia karana amo dahaka namo ita davaria diba?

Stadi Oi Karaia Neganai: Pura ta ta iboudiai karoa tamona do ita karaia dainai, buka stadi naria taudia ese mai aonega ida nega do idia haria be namo. Stadi lalonai paragraf ginigunadia do idia herevalaia momo lasi, unai amo mai anina bada paragraf, nega momo idia be paragraf gabedia dekenai nega bada do ia noho idia herevalaia totona. Stadi ena dokonai, nega sisina lalonai riviu mauana umui herevalaia, unai ese hebou taudia do ia durua hereva badadia idia laloatao totona.

Lalohadailaia bona herevalaia totona idia noho henanadaidia be kahirakahira Dirava Tomadiho Henia bukana ena karoa 50 pesen bamona lalonai idia noho. Haheitalai be rau 48-9 dekenai oi davaria diba. Paragraf ida unai henanadai oi duahia be gau badana lasi. Grup ida umui herevalaia neganai, naria tauna ese idia gwauraia siridia ia abia hidi be namo idia duahia bona herevalaia totona bema nega ia noho.

Hegaegae Guna: Stadi totona ita hegaegae namonamo ena anina be haere ita makaia sibona lasi. Idia gwauraia siridia be mai guriguri ida ita laloa dobu ese ita do ia durua iseda haere sibona lasi, to mai anina bada gauna be, iseda kudouna ia hegaegaelaia danu. (Esr. 7:10) Mai hemataurai ida ita haere amo ita ibounai ese ta ta ita hagoadaia heheni diba.​​—Roma 1:​11, 12.

Dirava Tomadiho Henia bukana stadilaia karana ese ita do ia durua Iehova kahirakahira ita lao totona bona ita do ia hegaegaelaia kudou-maoro taudia ita durua ita ida Iehova idia tomadiho henia totona. (Sal. 95:6; Iam. 4:8) Namona be ita ibounai ese unai lauma dalanai ita abia heduruna amo namo bada ita abia.