Matamata Taudia E—Vaira Negana Totona Badina Namona Umui Atoa
1 Emui lalona dekenai dahaka be gau badana? Dahaka gaudia oi laloa? Hari idia noho gaudia oi laloa bada, eiava vaira negana bona Dirava ia gwauhamata gaudia oi laloa bada? (Mat. 6:24, 31-33; Luka 8:14) Aberahamo bona Mose edia haheitalai amo ita itaia hegeregerena, abidadama goadana be gau badana Dirava ena gwauhamata ita badinaia totona. (Heb. 11:8-10, 24-26) Unai bamona abidadama bona “badina namona [oi] abia hegaegae, vaira dinadia totona” be edena bamona oi habadaia diba?—1 Tim. 6:19, NW.
2 Iehova Oi Tahua: Bema hanaihanai emui ruma bese ida lauma dalanai gau haida umui karaia, unai be namo herea. To oi laloa lasi unai ese abidadama goadana do ia havaraia. “Dirava do oi diba” totona, oi sibona ese Iehova oi tahua be namo. (Aon. 2:3-5; 1 Siv. 28:9) King Iosaia be unai bamona ia karaia. Ena be lauma dalanai ia goada ruma bese lalonai ia tubu daekau lasi, to ena mauri lagani be 15 neganai, “ia ese iena sene tauna king Davida ena Dirava ia tahua hamatamaia.”—2 Siv. 34:3.
3 Edena dala ai Iehova oi tahua diba? Oi abia dae gaudia oi tahua namonamo bona ‘do oi diba momokani’ edena be hereva momokani. (Roma 12:2) Hegeregere, Baibel ena hereva rara dekenai oi gwauraia hedinarai diba, eiava Dirava ena Basileia be lagani 1914 ai ia lohia matamaia oi hamomokania diba, a? Vaira negana totona badina namona oi atoa totona “hereva momokani” ena diba maoromaorona oi abia be gau badana.—1 Tim. 2:3, 4.
4 Iosaia ese Dirava ia tahua dainai anina namona ia havaraia. Ena mauri lagani 20 ia do abia lasi neganai, mai gari lasi ida unai tano amo tomadiho koikoi ia kokia. (2 Siv. 34:3-7) Unai hegeregerena, lauma dalanai oi goada oi lao dalana be emu kara ese do ia hahedinaraia. (1 Tim. 4:15) Bema oi be bapatiso lasi pablisa ta, oi hekwarahi emu haroro gaukara oi hanamoa totona. Oi laloa lasi buka hariharilaia karana sibona be hegeregere. Emu tahua gauna be taunimanima ida oi herevahereva neganai Baibel oi gaukaralaia, bona oi davaria kamonai tauna ena ura oi habadaia. (Roma 12:7) Unai ese oi do ia durua lauma dalanai oi tubu totona.
5 Iehova Dekenai Oiemu Gau Hereadia Oi Henia: Bapatiso amo Iehova dekenai emu mauri oi gwauhamatalaia neganai, oi be Dirava ena hesiai tauna ai oi lao. (2 Kor. 3:5, 6) Unai ese dala ia kehoa ful-taim hesiai gaukara lalonai Iehova oi hesiai henia totona. Inai gaukara haida be painia gaukara, Betele gaukara bona Kingdom Hall haginia gaukara. Danu emu haroro gaukara oi habadaia totona dala ma haida be gado ma ta oi dibaia, eiava haroro taudia be momo lasi gabuna dekenai oi lao.
6 Oibe, unai hesiai gaukara be ibounai ese idia karaia diba lasi, to ita ta ta ese Iehova dekenai eda gau hereadia ita henia diba. (Mat. 22:37) Herevana emu noho dalana be edena bamona, Iehova hesiai henia karana be emu tahua gauna ai oi halaoa. (Sal. 16:5) Unai bamona oi karaia neganai, vaira negana totona badina namona do oi atoa noho.
[Study Questions]
1. Dahaka dainai Keristani matamata taudia ese abidadama goadana idia abia be namo?
2. King Iosaia ena haheitalai amo dahaka ita dibaia?
3. Hari inai negai, edena dala ai Keristani matamata taudia ese Iehova idia tahua diba?
4. Bapatiso lasi pablisa taudia be edena dala ai idia hahedinaraia diba idia goada idia lao?
5. Idia bapatiso vadaeni Keristani taudia be edena dala haida amo edia haroro gaukara idia habadaia diba?
6. Edena bamona ita ibounai ese vaira negana totona badina namona ita atoa diba?